საქართველოს მორაგბეთა ეროვნული ნაკრებისა და საფრანგეთის მეორე ელიტარულ დივიზიონ Pro D2-ის “ორიაკის” შუამარბი მერაბ შარიქაძე 2014 წლის საუკეთესო მორაგბეა!

“აკადემიის” აღზრდილი 21 წლის მორაგბე ეროვნულ გუნდში 2012 წლიდან გამოჩნდა და ასაკის მიუხედავად, ბოლო ორი სეზონია “ბორჯღალოსანთა” ერთ-ერთ საუკეთესო მოთამაშედ იქცა. განვლილ 3 წელიწადში მან 28 კეპი მოაგროვა და 7 ლელო გაიტანა. ის გამორჩეული იყო ისეთ გუნდებთან თამაშში, როგორებიც სამოასა და იაპონიის ნაკრებები არიან. გასული სეზონი შარიქაძემ Pro D2-ის “ბურგ-ან-ბრესში” გაატარა, მიმდინარე სეზონში ამავე დივიზიონის “ორიაკში” გადავიდა და 9 მატჩში 1 ლელო გაიტანა. მას დამსახურებულად ერგო ეს ჯილდო!

ასევე დამსახურებულად, საქართველოს ჩემპიონატის 2013/2014 წლების სეზონის საუკეთესო მორაგბე “ლელო სარასენსისა” და ეროვნული ნაკრების მგეზავი ლაშა ხმალაძე გახდა. მან უდიდესი წვლილი შეიტანა კლუბის ჩემპიონობაში და ნაკრებისთვის პრობლემატურ პროზიციაზე 34 თამაშში 4 ლელო მიითვალა. ის ერთ-ერთი საუკეთესო იყო “თბილისის კავკასიელების” შემადგენლობაშიც და საუკეთესო ფაქტობრივად უკონკურენტოდ გახდა.

ჩემპიონი “ლელო სარასენსის” მთავარი მწვრთნელი ლევან მაისაშვილი გახდა სეზონის საუკეთესო მწვრთნელი და როგორც ნადირობის ტრფიალმა, რაგბის კავშირისგან საჩუქრად “ბერეტას” ტიპის სანადირო თოფი მიიღო.

გასული სეზონის საუკეთესო მსაჯი ნიკა ამაშუკელი გახდა, საუკეთესო ქალი მორაგბე ანა პოღოსიანი, 9 გატანილი ლელოთი მელელოვის ტირული არავის დაუთმო “არმიას” გარემარბმა ალექსი ტუჩაშვილმა, ხოლო 223 ქულით საუკეთესო ბომბარდირის პრიზი “ლელო სარასენსის” ფულბეკმა ირაკლი ყიასაშვილმა დაისაკუთრა.

ტრადიციულად, დასახელდა 2013/2014 წლების სეზონის სიმბული ნაკრები, რომელიც ასე გამოიყურება: 15. ბექა წიკლაური, 14. ირაკლი გეგენავა, 13. გიორგი ფრუიძე, 12. გიგა გაგოშვილი, 11. ლევან გოგოლაშვილი, 10. ლაშა ხმალაძე, 9. გიორგი ბეგაძე; 1. გიორგი სანიკიძე, 2. დავით ხიდეშელი, 3. დავით გურგენაძე, 4. მიხეილ არჩუაშვილი, 5. სანდრო ქოიავა, 6. გიორგი თხილაიშვილი, 7. გუჯა სურგულაძე, ბექა ბიწაძე.

ეს ყველაფერი დაჯილდოვების ცერემონიალის დასკვნით ნაწილში მოხდა, მანამდე კი, საქართველოს რაგბის კავშირის შემაჯამებელი ღონისძიება მამა ილიას დალოცვით დაიწყო, რომელმაც იქ შეკრებილები და სრულიად საქართველოს სარაგბო ოჯახი დალოცა. ამის შემდეგ იყო წუთიერი დუმილი “არმაზისა” და ახალგაზრდული ნაკრების მთავარი მწვრთნელის, დავით ვართანიანის გარდაცვალების გამო, რომელიც სპორტის სამინისტროს საკუთარ სიაში გამორჩა, მაგრამ ქართულ სარაგბო თემს ის არასდროს დაავიწყდება. შეგახსენებთ, რომ იმავე სპორტის სამინისტრომ საქართველოს რაგბის კავშირი წლის საუკეთესო ფედერაციად აღიარა და სიტყვაც სრკ-ს პრეზიდენტმა გიორგი ნიჟარაძემ აიღო:

“ესაა ყველა იმ ადამიანის ჯილდო, ვინც აღმოსავლეთიდან დასავლეთით და სამხრეთიდან ჩრდილოეთით ქართულ რაგბიში მოღვაწეობს. 2014 წელი კარგი იყო, ხოლო 2015 გარდამტეხი იქნება. სწორედ აქ უნდა გამოჩნდეს ჩვენი 4-წლიანი მუშაობის შედეგი. დარწმუნებული ვარ, საქართველოს ეროვნული ნაკრები ქართველ ხალხს მომავალი წლის ოქტომბერში (2015 წლის სექტემბერ-ოქტომბერში ინგლისში გაიმართება მსოფლიო თასი, რომელშიც საქართველოს ნაკრები ზედიზედ მეოთხედ მიიღებს მონაწილეობას) კიდევ ერთხელ გაახარებს”.

2014 წლის სანაკრებო თამაშების მოკლე მიმოხილვის ხილვის შემდეგ, დაჯილდოვების დრო დადგა და დაჯილდოვდნენ “ლელო სარასენსის” დუბლშემადგენლობა, რომელიც გაისად ჩემპიონი გახდა, პირველი ლიგის გამარჯვებული “თიბიეს უნივერსიტეტი”, 7-კაცას საქართველოს ჩემპიონატის გამარჯვებული რუსთავის “ხარები” და ეროვნული პირველობის პრიზიორები - თბილისის “ლოკომოტივი” (მე-3 ადგილი და ბრუნჯაოს მედლები), თბილისის “არმია (მეორე ადგილი და ვერცხლის მედლები) და საქართველოს ჩემპიონი “ლელო სარასენსი” (პირველი ადგილი და ოქროს მედლები).

ბოლო დროს ტრადიციად იქცა და სრკ-ს არც ამჯერად დავიწყებია ვეტერანთათვის პატივის მიგება. წელს პირველად დაჯილდოვდა 80 წლის ვეტერანი მორაგბე - ნოდარ კაჭარავა, მის გარდა კი, მრგვალი თარიღი მიულოცეს 70, 60 და 50 წლის ვეტერანებს.

სულ ბოლოს გიორგი ნიჟარაძემ შეკრებილთ ერთი სამწუხარო ამბავი ამცნო - ნაკრებს ემშვიდობება “ბორჯღალოსანთა” კაპიტანი ირაკლი მაჩხანელი, რომელმაც თავად მიიღო ეს გადაწყვეტილება. მან ნაკრების კვართი 73-ჯერ მოირგო, 13-ჯერ იყო გუნდის კაპიტანი და ჯამში 24 ლელო გაიტანა. ნიჟარაძემ დადო პირობა, რომ ის აუცილებლად დასაქმდება საქართველოს რაგბის კავშირში და მაჩხანელს გადასცა წმინდა გიორგის მედალიონი, რომელზეც ირაკლი მაჩხანელის სახელი და გვარი, ასევე მის მიერ ჩატარებული მატჩების რაოდენობაა ამოტვიფრული. ქართველ მორაგბეთაგან მსგავსი საჩუქარი აქამდე მხოლოდ ირაკლი აბუსერიძეს ჰქონდა მიღებული და ახლა მას მეორე ირაკლი დაემატა.

მაჩხანელის ოფიციალური გაცილება 2015 წლის ერთა თასზე რუსეთთან მატჩისთვის იგეგმება, მანამდე კი, 33 წლის მორაგბემ განაცხადა: მივიღე გადაწყვეტილება და სანაკრებო კარიერა დავასრულე. უბედნიერესი ადამიანი ვარ, ამდენი ხნის განმავლობაში ეროვნული გუნდის მაისურით რომ ვთამაშობდი. მომავალ მსოფლიო თასზე “ბორჯღალოსნების” უდიდესი გულშემატკივარი ვიქნები - ბიჭებს წარმატებებს ვუსურვებ”.