ბოლო დროს საქართველოს ჩემპიონატის მომსახურე მსაჯების მიმართ უკმაყოფილებამ პიკს მიაღწია და სადამსჯელო სვლამაც არ დააყოვნა. თბილისის “თიბიეს უნივერსიტეტმა” ქუთაისის “აია” 15:8 რომ დაამარცხა, ამ მატჩის მსაჯობამ კიდევ უფრო მეტი კითხვა გააჩინა და საქართველოს რაგბის კავშირმა მსაჯთა დასჯა გადაწყვიტა, რასაც ქმედებაც მალევე მოჰყვა:

საქართველოს რაგბის კავშირის პრეზიდენტის, გიორგი ნიჟარაძის 2014 წლის 15 დეკემბრის ბრძანება თბილისის “თიბიეს”-სა და ქუთაისის “აია”-ს შორის 7 დეკემბერს, ავჭალის სარაგბო სტადიონზე გამართული მატჩის (2014-15 წლის უმაღლესი ლიგის XI ტური) მსაჯობასთან დაკავშირებით:

საქართველოს რაგბის კავშირის საშეჯიბრო კომიტეტის 2014 წლის 7 დეკემბრის წერილის საფუძველზე, რომელიც ეხებოდა ქ. თბილისში თბილისის “თიბიეს”-სა და ქუთაისის “აია”-ს შორის გამართული მატჩის მსაჯობას.

ვბრძანებ

1. გამოეცხადოს მსაჯთა კომიტეტის თავმჯდიმარეს დავით შუბითიძეს, მსაჯთა განვითარების მენეჯერს და მსაჯთა მწვრთნელს ლუკა კილასონიას საყვედური.
2. მატჩის მომსახურე მსაჯთა ბრიგადას (მთავარი მსაჯი საბა აბულაშვილი, თანამსაჯები გიორგი ტრაპაიძე და ნიკა ამაშუკელი) არ აუნაზღაურდეს კონკრეტული მატჩის ჰობორარი, ხოლო მატჩის მეთვალყურეს გოგი ჭიჭინაძეს დაექვითოს ჰონორარის 50%.
3. მსაჯთა კოლეგიამ თბილისის “თიბიეს”-სა და ქუთაისის “აია”-ს შორის გამართული მატჩის მომსახურე მსაჯთა ბრიგადას მატჩის ტენდენციურად და არაკვალიფიციურად ჩატარებისათვის (რამაც ზეგავლენა იქონია მატჩის რეზულტატზე) მიიღოს შესაბამისი დამსჯელი ზომები, რომელიც განსაზღვრულია მსაჯთა კოლეგიის დებულებით.
4. მსაჯთა კომიტეტმა შეიმუშაოს შესაბამისი დებულება, რომელიც განსაზღვრავს კონკრეტულ მატჩებზე შესაბამისი კვალიფიკაციისა და გამოცდილების მქონე მსაჯების დანიშვნის საკითხს.

საქართველოს რაგბის კავშირის პრეზიდენტი გიორგი ნიჟარაძე