საფრანგეთის მორაგბეთა რანგით მესამე, ნახევრად პროფესიულ ფედერალ 1-ში, რეგულარული პირველობის შედეგად გამოვლენილი თექვსმეტი წარმატებული გუნდი Pro D2-ის საგზურისთვის ბრძოლაში პლეი ოფში ჩაება.

მერვედ, მეოთხედ და ნახევარფინალებში შინ და გარეთ, ორ-ორი თამაში იმართება, ფინალში გასული ორი გუნდი კი, მომავალ ჩემპიონატს მეორე ელიტარულ დივიზიონში იწყებს. მერვედფინალში გასული 16 გუნდიდან 5 ქართველი ლეგიონერებისაა და მათგან მინიმუმ ერთი მეოთხედფინალში აუცილებლად გავა, რადგან ამ ეტაპზე ისინი ერთმანეთს ეთამაშებიან.

ირაკლი ნინიძის “რომანმა” ბაჩუკი გუჯარაიძისა და შოთა ცხოვრებაშვილის “სენ-ნაზერს” უმასპინძლა და 27:25 დაამარცხა. ქართველ ლეგიონერთაგან ამ მატჩში მონაწილეობა მხოლოდ მეორეხაზელმა გუჯარაიძემ მიიღო, რომელიც შეუცვლელად გაისარჯა. თამაში დაძაბული გამოდგა და მისი ბედი სტუმართა უდისციპლინობამ გადაწყვიტა. პირველ წუთზე გატანილი არეკნის შემდეგ, “რომანმა” 8 ჯარიმა გაიტანა.

68-ე წუთზე მასპინძლები” 24:11 დაწინაურდნენ, “სენ-ნაზერმა” საფრთხე იგრძნო და 77-ე წუთზე მატჩის მეორე ლელოთი ჩამორჩენა შეამცირა, ხოლო ორიოდე წუთში მესამე ლელოც მიითვალა და რადგან ორივე გარდასახვა ზუსტი იყო, 25:24 დაწინაურდა. და მაინც, სტუმრებს გამარჯვება არ ეწერათ, ბოლო წუთზე კიდევ ერთი ჯარიმა გაუშვეს და 28 აპრილს საკუთარ მოედანზე 2-ქულიანი ჩამორჩენის აღმოფხვრა მოუწევთ.

მერვედფინალის პირველი მატჩი თავის სასარგებლოდ დაასრულა თედო ზიბზიბაძის “პერიგომ”, რომელმაც “ვალანსს” უმასპინძლა და 25:23 იმარჯვა. 2-ქულიანი უპირატესობა Pro D2-იდან გასულ სეზონში გავარდნილ “პერიგოს” მოდუნების საშუალებას არ მისცემს და 28 აპრილს სტუმრად მძიმე ჯახის გადატანა მოუწევს. განვლილ მატჩში ქართველი შუამარბი სასტარტო შემადგენლობაში იყო და მოედანზე 71 წუთი გაატარა.

21-ე წუთამდე “პერიგომ” 3 ჯარიმა გაიტანა და 9:0 დაწინაურდა, მაგრამ ტაიმის მიწურულს ლელო გაუშვა, გარდასახვაც ზუსტი იყო და შესვენებაზე მასპინძლები 2-ქულიანი უპირატესობით გავიდნენ. მეორე ნახევრის დასაწყისში “პერიგომ” ორი ჯარიმით უპირატესობა გაზარდა, მაგრამ 2 ჯარიმა თავადაც გაუშვა. 67-ე წუთზე ჯარიმითვე ანგარიში 18:13 გახდა, თუმცა, 72-ე წუთზე “ვალანსმა” ლელოთი წონასწორობა აღადგინა და გარდასახვით დაწინაურდა. საფინალო სასტვენამდე ორი წუთით ადრე ლელო “პერიგომაც” გაიტანა და გარდასახვაც ზუსტი იყო, თუმცა, მასპინძლებმა 5-ქულიანი უპირატესობა ვერ შეინარჩუნეს და ბოლოს ჯარიმა გაუშვეს.

მერვედფინალის პირველი მატჩების შემდეგ, შანსები ძლიერ შეუმცირდათ ავთო კოპალიანისა და შოთა მელიქიძის “მაკონს” და გიორგი გაბელიასა და რევაზ ჟღენტის “სენტ-ეტიენს”. “მაკონი” “ნევერს” დაუხვდა და 14:27 დამარცხდა. ქართველ ლეგიონერთაგან მოედანზე მხოლოდ კოპალიანი გამოჩნდა, რომელიც შეცვლაზე შესვენების შემდეგ შევიდა. ამან საერთო სურათი ვერ შეცვალა და მათ ერთის საპასუხოდ ოთხი ლელო გაიტანეს.

“სენტ-ეტიენმა” “მონტობანს” უმასპინძლა და 9:15 დამარცხდა. ქართველ ლეგიონერთაგან მხოლოდ გაბელიამ ითამაშა და ის შეცვლაზე 64-ე წუთზე შევიდა. დაძაბული ბრძოლის ბედი ჯარიმებმა გადაწყვიტა და სტუმრებმა მიზანს ხუთჯერ უწიეს, ხოლო მასპინძლებმა სამჯერ. განმეორებითი თამაშები 28 აპრილსაა დანიშნული.