საკლუბო ტურნირების ორგანიზატორმა European Professional Club Rugby-მ რუსეთის რაგბის კავშირში დასტური აფრინა და აუწყა, რომ 2016 წლიდან მორაგბეთა საკლუბო ტურნირებში ამ ქვეყნის ორი გუნდი ჩაერთვება.

წერილში წერია, რომ „ენისეი“ 2016/2017 წლების ჩელენჯ ქაფის საკვალიფიკაციო ეტაპზე ითამაშებს, რომელიც ამა წლის აპრილში გაიმართება. იქვე მითითებულია, რომ ეს გუნდის 2015/2016 წლების ჩელენჯ ქაფის ჯგუფურ ეტაპზე წარმატებული თამაშის შედეგია.

შეგახსენებთ, რომ კრასნოაირსკელებმა, საქართველოს ნაკრების შუამარბ დავით კაჭარავასთან ერთად, სოჭში ფრანგული „ბრივი“ და ინგლისური „ნიუკასლი“ (კაჭარავამ ამ შეხვედრაში 2 ლელო გაიტანა) დაამარცხეს. მართალია მათ ჯგუფში ბოლო ადგილს თავი ვერ დააღწიეს, მაგრამ პატივისცემა დაიმსახურეს და ჯილდომაც არ დააყოვნა.

ამრიგად, ორრაუნდიან პლეი ოფში იტალიურ „როვიგოს“ ახლა სწორედ „ენისეი“ შეხვდება, ხოლო მეორე წყვილს ასევე იტალიური „კალვიზანო“ და რუმინული „ტიმიშოარა-სარასენსი“ შეადგენენ. შეგახსენებთ, რომ „როვიგომ“ და „ტიმიშოარა-სარასენსმა“ წელს ჩელენჯ ქაფის საკვალიფიკაციო ეტაპზე, რომელშიც 8 გუნდი მონაწილეობდა თავ-თავიანთ ჯგუფებში პირველი ადგილი დაიკავეს.

ორგანიზატორებმა „მშრალზე“ არც 2015 წლის რუსეთის ჩემპიონი „კრასნი იარი“ დატოვეს, რომელსაც პირველადი ინფორმაციით „როვიგოსთან“ „ენისეის“ მაგივრად უნდა ეთამაშა და ის 2016/2017 წლების ჩელენჯ ქაფის საკვალიფიკაციო ტურნირში ჩართო. წლევანდელთან შედარებით, საკვალიფიკაციო ტურნირი გაფართოვდება და 2016 წლის ოქტომბრიდან 2017 წლის იანვრის ჩათვლით გაიმართება. მონაწილე გუნდები ჯერ ცნობილი არაა და იმედია, გაფართოებულ ტურნირში მინიმუმ ერთი ქართული კლუბის მაინც მოხერხდება.

ზურა ქსოვრელი