საქართველოს მორაგბეთა ეროვნული ნაკრების მგეზავმა ლაშა მალაღურაძემ, “ბორჯღალოსანთა” შეკრებაზე გამოცხადებამდე საფრანგეთის რანგით მესამე, ნახევრადპროფესიული “ფედერალ 1” დივიზიონის მე-7 ტურის მატჩში 4 ჯარიმა, თითო-თითო არეკნი და გარდასახვა გაიტანა და საკუთარ გუნდს მნიშვნელოვანი გამარჯვების მოპოვებაში დაეხმარა.

დივიზიონში 17 ნოემბრამდე შესვენება ცხადდება, მანამდე კი, გუნდებმა მე-7 ტურის თამაშები გამართეს და რადგან ქართველი ლეგიონერებიდან ქულები მხოლოდ მალაღურაძემ ჩაიწერა, მიმოხილვაც მე-4 ჯგუფის თამაშებით დავიწყოთ. ლაშა მალაღურაძის, სიმონ მაისურაძის, გიორგი მჭედლიშვილის, ბექა ურჯუკაშვილისა და ლადო გუნიავას “ბანიერმა” “ბლანიაკს” უმასპინძლა და მალაღურაძის 17 ქულის წყალობით 22:17 იმარჯვა. მასპინძლებმა უამრავი შეცდომა დაუშვეს, რის გამოც სათამაშო უპირატესობა სათანადოდ ვერ გამოიყენეს და 28-ე წუთზე 80-მეტრიანი კონტრშეტევის შემდეგ ლელოც გაუშვეს.

მანამდე, მე-5 და მე-15 წუთებზე მალაღურაძეს ორი ჯარიმა ჰქონდა გატანილი, მათ შუაში ერთი ზუსტი დარტყმა სტუმრებმაც შეასრულეს და “ბანიერმა” ტაიმი 6:8 დათმო. ქართველმა მგეზავმა მეორე ტაიმის საწყის 10 წუთში ჯარიმებით ორჯერ დააწინაურა საკუთარი გუნდი, მაგრამ მეტოქემ ჯარიმით და არეკნით მალევე უპასუხა. და მაინც, დასკვნით 20 წუთში მასპინძლებმა იმძლავრეს. მე-60 წუთზე გატანილი ლელო მალაღურაძემ გარდასახა, “ბლანიაკმა” ჯარიმით ჩამორჩენა 2 ქულამდე დაიყვანა, მაგრამ 75-ე წუთზე ლაშამ არეკნი დაკრა და საკუთარ გუნდს 22:17 მოაგებინა.

მატჩში მონაწილეობა მასპინძელთა ხუთივე ქართველმა ლეგიონერმა მიიღო. მალაღურაძე სრულად გაისარჯა, მაისურაძე შესვენებისას შეცვალეს, ხოლო ურჯუკაშვილმა პირველიდან 48-ე წუთამდე ითამაში. შესვენების შემდეგ გამოჩნდა მოედანზე მჭედლიშვილი, გუნიავა კი, თამაშში 53-ე წუთიდან ჩაერთო. ამრიგად, “ბანიერს” 17 ქულა აქვს, მე-3 ადგილზეა და დამატებითი მაჩვენებლებით უსწრებს კიდევ ორ გუნდს, რომელთაც ასევე 17-17 ქულა აქვთ.

მიხეილ გაჩეჩილაძის “აჟეტმო” “ოლორონთან” სტუმრად დამარცხდა - 18:28. ქართველმა მეორეხაზელმა შეუცვლელად ითამაშა, მაგრამ 23-ე წუთზე ყვითელი ბარათი მიიღო და 10 წუთი დასჯილთა სკამზე გაატარა. “აჟეტმოს” პრემიალური ქულის აღება შეეძლო, მაგრამ ბოლო წუთზე ლელო-გარდასახვა გაუშვა და 13 ქულით მე-8 პოზიციაზეა.

პირველ ჯგუფში დავით აშვეთიას, დავით დადუნაშვილის, არჩილ კობაურის, ელიზბარ ყუფარაძისა და შალვა სუთიაშვილის “მასი” “ვანთან” 16:20 დამარცხდა. დადუნაშვილი და აშვეთია სასტარტო შემადგენლობაში იყვნენ, პირველმა 56 წუთი ითამაშა, ხოლო აშვეთია 52-ე წუთზე ყუფარაძემ შეცვალა. მიუხედავად მარცხისა, “მასი” 27 ქულით ლიდერობას ინარჩუნებს და უახლოეს მდევარს მთელი 5 ქულით უსწრებს.

მდევარი კი ნოდარ ჭეიშვილის “ნევერია”, რომელმაც ირაკლი ნინიძის “დიჟონს” 34:10 სძლია და პრემიალური ქულაც ჩაიწერა. ქართველ ლეგიონერთაგან განაცხადში მხოლოდ ნინიძე იყო, რომელიც ტრავმირებული თანაგუნდელის ნაცვლად შეცვლაზე მე-12 წუთზე შევიდა. მისი “დიჟონი” 6 ქულით ბოლო ადგილზეა.

ქართულ დერბიში თემურ გელანტიასა და რევაზ გიგაურის “მონლიუსონმა” შოთა საყვარელიძისა და გიორგი ტორაძის “სენ-ჟენი” 18:3 დაამარცხა. მასპინძელთა ორივე ქართველი ლეგიონერი სასტარტო შემადგენლობაში იყო და გიგაურმა გარემარბად შეუცვლელად ითამაშა, ხოლო პირველხაზელი გელანტია 54-ე წუთზე შეცვალეს. სტუმართა განაცხადში მხოლოდ საყვარელიძე იყო, რომელიც შერკინების მესამე ხაზში სრულად გაისარჯა. ახლა “მონლიუსონი”, რომელსაც 10 ქულა აქვს ჩამოკლებული, 7 ქულით ბოლოსწინა მე-9 პოზიციაზეა, ხოლო “სენ-ჟენი” 13 ქულით მე-6 პოზიციაზეა.

ბაჩუკი გუჯარაიძის “სენტ-ნაზერი” სტუმრად “ბობინთან” მხოლოდ პრემიალურ ქულას დასჯერდა - 16:22. ქართველმა ლეგიონერმა შეცვლაზე 71-ე წუთიდან ითამაშა, მისი გუნდი კი, 19 ქულით მე-5 პოზიციაზეა.

მეორე ჯგუფში ავთო კოპალიანის “მაკონიმ” “ტომანი” პრემიალური ქულით, 33:10 დაამარცხა და 25 ქულით ჯგუფის ლიდერია. მასპინძლებმა ტაიმი 30:0 მოიგეს და ყველაფერი იქვე გადაწყდა. ქართველმა პირველხაზელმა შეცვლაზე ბოლო 20 წუთი ითამაშა. საბა ქართველიშვილის “ჩამბერი” “ობნასთან” სტუმრად 19:50 დამარცხდა. ქართველი პირველხაზელი სასტარტო შემადგენლობაში იყო და 48-ე წუთზე შეცვალეს, მისი გუნდის ასეთი მარცხი კი, დიდწილად 23-ე წუთზე “ჩამბერის” 9 ნომრის მიერ მიღებულმა წითელმა ბარათმა განაპირობა. ქართველის გუნდი 18 ქულით მე-5 ადგილზეა.

მერაბ კვირიკაშვილისა და ზერო პეტრიაშვილის “ვიენი” “ლა ვულტთან” 10:30 დამარცხდა. ქართველ ლეგიონერთაგან განაცხადში მხოლოდ კვირიკაშვილი იყო, რომელიც შეცვლაზე 47-ე წუთზე შევიდა. აღსანიშნავია, რომ მასპინძლები 30:0 იგებდნენ, მაგრამ დასკვნით სამ წუთში ორი ლელო გაუშვეს და პრემიალური ქულა დაკარგეს. “ვიენს” 10 ქულა აქვს და ბოლოსწინა მე-9 ადგილზეა.

გიორგი ჯაშიტაშვილის “შალონმა” გიორგი კუთარაშვილის “ანესი” 33:16 დაამარცხა. ქართველ ლეგიონერებს მატჩში მონაწილეობა არ მიუღიათ, “შალონი” 13 ქულით მე-8, ხოლო “ანესი” 7 ქულით ბოლო ადგილზეა.

მესამე ჯგუფში სამმატჩიანი მოუგებელი სერია შეწყვიტა თედო ზიბზიბაძის, გიორგი გაბელიასა და ნიკოლოზ მაღალდაძის “პერიგომ”, რომელმაც “სენ ჟან დე ლუზის” უმასპინძლა და 14:9 დაამარცხა. ქართველ ლეგიონერთაგან მხოლოდ ზიბზიბაძემ ითამაშა, რომელიც შუამარბას სრულად გაისარჯა. “პერიგო” 19 ქულით მე-4 ადგილზეა.

ნიკოლოზ გიორგაძის “ჰენდაი” “ლიმოჟს” დაუზავდა - 24:24. ქართველი პირველხაზელი სასტარტო შემადგენლობაში იყო, მაგრამ მე-7 წუთზე დაშავდა და შეცვალეს. გიორგი ტალახაძის “როდეზი” ქართველის გარეშე “ლანგონთან” 7:26 დამარცხდა. “როდეზი” 10 ქულით მე-8 პოზიციაზეა, ხოლო “ჰენდაის” მხოლოდ 4 ქულა აქვს და ბოლო ადგილზეა.

“ფედერალ 1”-ის მომდევნო ტურის თამაშები სამი კვირის შემდეგ, 17 ნოემბერს გაიმართება.