„ოლსტერის“ უნივერსალმა უკანახაზელმა ჯარედ პეინმა ირლანდიის რაგბის კავშირთან მოქმედი კონტრაქტი კიდევ ორი წლით გაახანგრძლივა და რავენჰილზე 2018 წლის ივნისამდე დარჩება.

30 წლის ახალზელანდიელს „ოლსტერში“ დებიუტი „კარდიფ ბლუზთან“, 2011 წლის სექტემბერში ჰქონდა და პროვინციის სახელით ჩატარებულ 63 მატჩში 14 ლელო გაიტანა. მისი საერთაშორისო დებიუტი 2014 წელს, სამხრეთ აფრიკის ნაკრებთან შედგა, დღემდე 12 კეპი მოუგროვდა და ორი ლელო გაიტანა.

„ჯარედმა საკუთარ შესაძლებლობებში დაგვარწმუნა. მან საუკეთესოდ წარმოაჩინა თავი უმაღლეს დონეზე და გუნდის ნამდვილი ლიდერია. მოხარული ვართ, რომ ირლანდიისა და „ოლსტერის“ სასარგებლოდ პეინი კიდევ ორი წელიწადი ითამაშებს“ - თქვა ირლანდიის რაგბის კავშირის აღმასრულებელმა დირექტორმა დევიდ ნიუსიფორამ.

„ჯარედი წარმოუდგენლად ნაყოფიერი და ჭკვიანი მოთამაშეა. ის სიმშვიდეს სძენს ჩვენს უკანა ხაზს და „ოლსტერისთვის“ უმნიშვნელოვანეს მოთამაშედ კიდევ დიდხანს დარჩება“ - დაამატა „ოლსტერის“ დირექტორმა ლეს კისმა.

ახალ შეთანხმებას თავად პეინიც გამოეხმაურა: „მოხარული ვარ, ირლანდიის რაგბის კავშირთან კონტრაქტი რომ გავახანგრძლივე. „ოლსტერში“ დარჩენა ჩემთვის უდიდესი პატივია. ვფიქრობ, ამ გუნდთან და ირლანდიის ნაკრებთან ერთად, კიდევ უფრო დიდი წარმატებების მიღწევა შემიძლია“.

ზურა ქსოვრელი