საქართველოს ეროვნული 7-კაცა ნაკრები 2020 წლის ზაფხულის ოლიმპიური თამაშების საგზურისთვის ბრძოლას აგრძელებს.

ჩვენმა გუნდმა კოლომიეში (საფრანგეთი) მიმდინარე შესარჩევი ტურნირის პირველ დღეს ერთი თამაში მოიგო, გატანილ-გაშვებული ქულებით მესამე ადგილოსნებს შორის რუსეთს აჯობა და ხვალ თასის მეოთხედფინალში ითამაშებს.

პირველი შეხვედრა გერმანიის ნაკრებთან გვქონდა, თამაში არ წაგვივიდა და მეტოქემ 33:7 იმარჯვა.

ინგლისთან გამოჩნდა, რომ გუნდს პოტენციალი ჰქონდა. საქართველოს ნაკრებმა პირველ ტაიმში კარგად ითამაშა დაცვასა და შეტევაში, მის შუაში ლამაზი იერიში ივანე ხელაიას ლელოთი დასრულდა და გარდასახვაც ზუსტი იყო. მეორე ტაიმის პირველი ნახევარი ბურთს კვლავ ჩვენ ვაკონტროლებდით, მაგრამ სინბინის გამო კაცნაკლულები დავრჩით და დასკვნით 3,5 წუთში მეტოქემ 4 ლელო გაიტანა - 7:24.

ჯგუფური ეტაპის დასკვნით შეხვედრაში, ლიეტუვასთან ფავორიტები ვიყავით და გუნდმა მოლოდინი სრულად გაამართლა. საქართველომ მეტოქეს 6 უპასუხო ლელო გაუტანა, 38:0 დაამარცხა, რითაც გატანილ-გაშვებული ქულათა ბალანსი მნიშვნელოვნად გაიუმჯობესა და რუსეთის უკან მოტოვებით, მოწინავე რვეულში შევიდა.

თასის მეოთხედფინალში საქართველოს მეტოქე მასპინძელი, საფრანგეთის ნაკრები იქნება. მატჩი საქართველოს დროით 14 საათზე დაიწყება

სტრიმი: RUGBYEUROPE.TV

rugby.ge