‘ბათუმმა’ გორში ‘ჯიქს’ 24:7 აჯობა და სატურნირო ცხრილში ლიდერის პოზიცია კიდევ უფრო გაიმყარა.

მასპინძლებმა 2019 წელი კარგად დაიწყეს და იყო მოლოდინი, რომ ლიდერს პრობლემებს შეუქმნიდნენ, მაგრამ ასე არ მოხდა. ზღვისპირელებმა თავიდანვე მოიპოვეს უპირატესობა, ის ხელიდან აღარ გაუშვეს და საქმე ლოგიკურ გამარჯვებამდე მიიყვანეს.

ანგარიში მე-14 წუთზე ხვიჩა ბუჯიაშვილმა გახსნა, როდესაც 5-მეტრიანი შერკინების შემდეგ თავისუფალი სწრაფად გაითამაშა და მცველები მას მოუმზადებლები დახვდნენ. 25-ე წუთზე ხუთმეტრიანი დერეფნის შემდეგ აგორებული მოლიდან გადმოვარდნილი ბურთით ვაჟა ხუციშვილმა დაუცველ მოკლე ფრთაზე შეუტია და მეორე ლელო გაიტანა, ხოლო მამუკა ნინიძემ ორივე გარდასახა.

ნინიძეს პირველი ტაიმის ბოლოს ერთი და მეორეს დასაწყისში ორი ჯარიმა გაუცუდდა. შესვენების შემდეგ გორელებმა შეტევების ორგანიზება სცადეს, თუმცა 59-ე წუთზე ცენტრში ბურთი დაკარგეს, ის ანზორ სიჭინავამ აიტაცა და ლელომდე ირბინა. ნინიძის გარდასახვა ამჯერადაც ზუსტი იყო. 66-ე წუთზე ‘ჯიქმა’ ერთი ლელოს გატანა მოახერხა, გურამ შენგელიამ რაქიდან შეუტია და სანდრო ფურცხვანიძემ გარდასახა. მალე ნინიძემ ჯარიმა მეოთხე ცდიდან გაიტანა და საბოლოო შედეგი დააფიქსირა - 24:7.

www.rugby.ge