6 ოქტომბერს თბილისში, შევარდენის სანაკრებო ბაზა ოთხთა საერთაშორისო ტურნირს უმასპინძლებს 7-ქალა რაგბში.

საქართველოს ღია ტურნირზე ქალთა რაგბში 7-ქალა Georgia Ledy’s Sevens-ის სახელთ იასპარეზებს, ასევე მონაწილეობენ - დასავლეთის ნაკრები, აღმოსავლეთის ნაკრები და ისრაელის ეროვნული ნაკრები. შეხვედრები 11 საათიდან დაიწყება და 15 საათამდე გაგრძელდება.

Georgia Lady Sevens საქართველოს ეროვნული ნაკრების ბირთვს წარმოადგენს და იმ გოგონებით იქნება დაკომპლექტებული, რომლებიც თბილისში ვარჯიშობენ, ხოლო ნაკრების სხვა წევრები დასავლეთისა და აღმოსავლეთის ნაკრებებს დაემატებიან. ისრაელის 7-ქალა ნაკრები ევროპის „ალაფაზე“ თამაშობს, იქ, სადაც ჩვენი გუნდი წელს „კონფერენც დივიზიონის“ მოგებით აღზევდა.

ქალთა საერთაშორისო ტურნირი საქართველოში მეორედ იმართება. შარშან საბერძნეთის ნაკრები გვეწვია და 4-თა ტურნირს ქუთაისმა უმასპინძლა.

„ისევე, როგორც საბერძნეთთან, ისრაელის ნაკრების ხელმძღვანელობასთანაც კარგი ურთიერთობა გვაქვს. ისინი საქართველოს ტურისტული ვიზიტით ეწვევიან და ტურნირსაც ითამაშებენ. გოგონებს დიდი ხნის ნატვრა აუხდათ, რადგან ძალიან სურდათ თბილისში, მეგობრებისა და ოჯახის წევრების წინაშე ეთამაშათ. ეს ტურნირი ხელს შეუწყობს საქართველოში ქალთა სპორტის და ამ შემთხვევაში კონკრეტულად ქალთა რაგბის განვითარებას“ - განაცხადა საქართველოს 7-ქალა ნაკრების მთავარმა მწვრთნელმა ჯაბა მალაღურაძემ.

www.rugby.ge