საფრანგეთის ეროვნული ნაკრების მგეზავი ფრანსუა ტრინ-დუკი ადასტურებს, რომ მიმდინარე სეზონის დასრულების შემდეგ მშობლიურ კლუბს, “მონპელიეს” დატოვებს.

29 წლის მორაგბე მონპელიეში დაიბადა და მთელი კარიერა მშობლიურ კლუბს მიუძღვნა, რომლის რიგებშიც დებიუტი 2004 წელს ჰქონდა. უმრავლესობის აზრით, ის საფრანგეთში ყველაზე შემოქმედებითი მგეზავია და მოცემული მომენტისთვის მასზე პრეტენზიას “ტულონი” და “ტულუზი” აცხადებენ.

“მე მივდივარ “მონპელიედან”, მაგრამ ჯერ ვერ გეტყვით სად გავაგრძელებ კარიერას” - თქვა მოთამაშემ.

ტრინ-დუკს “მონპელიესთან” მოქმედი კონტრაქტის ვადა მიმდინარე სეზონის ბოლოს ეწურება. ის არ ჯდება გუნდის ამჟამინდელის მთავარი მწვრთნელის, სამხრეთ აფრიკელი ჯეკ უაითის სათამაშო სტილში, რომელმაც 10 ნომრის პოზიციაზე თანამემამულე დემეტრი კატრაკილისი მიიწვია და ფრანსუასაც წასვლის მეტი, სხვა გზა აღარ დარჩა.

ტრინ-დუკი “მონპელიეში” მე-12 სეზონს ატარებს და ამ პერიოდში ტოპ 14-ის 169 მატჩში 541 ქულა გააკეთა, ჩემპიონთა თასის 12 მატჩში 10 ქულა მოაგროვა, ხოლო ჩელენჯ ქაფის 15 შეხვედრაში გუნდს 43 ქულით შეეწია. ქვეყნის ეროვნულ გუნდში ის 2008 წლიდან თამაშობს და 49 მატჩში ნაკრებს 73 ქულა შესძინა.