საქართველოს მორაგბეთა ნაკრებმა რაგბი ევროპას მიმდინარე გათამშებაში მეორე მატჩი ჩაატარა და ესპანეთის ნაკრებს მძიმე ბრძოლაში მოუგო. „ბორჯღალოსნებმა“ მორიგი უფერული თამაში აჩვენეს და საკმაოდ ბევრი ნერვიულობა მოუწიათ.

პორტუგალიასთან ლევან მაისაშვილის გუნდი პირველი ტაიმის შემდეგ საერთოდაც მარცხდებოდა, მაგრამ მაშინ მეორე ნახევარში თამაშში გარდატხის შეტანა შეძლო. ახლაც, არანაკლებ რთული თამაში გამოდგა. არადა, დასაწყისი იდეალური იყო. მე-4 წუთზე თორნიკე ჯალაღონიამ ლელო მიითვალა და თედო აბჟანდაძემ გარდასახა.

7-ქულიანი უპირატესობა 3 წუთში განიავდა, რადგან ესპანელებმა გარდასახული ლელოთი გვიპასუხეს. პირველ ტაიმში გუნდებმა თითო ჯარიმაც გაცვალეს და - 10:10.

ცხადია, ეს არ იყო შედეგი, რასაც დადებითი ეთქმოდა. მეორე ტაიმი ესპანელების ჯარიმით დაიწყო და პირინელები პირველად დაწინაურდნენ. თუმცა, ამას აკა ტაბუცაძის ლელო და აბჟანდაძის გარდასახვა მოჰყვა და ისევ წინ გავედით. უნდა აღინიშნოს, რომ ესპანეთის ნაკრები არაფრით ნებდებოდა და ჯარიმით სხვაობა მინიმუმამდე დაიყვანეს. „ბორჯღალოსნებმა“ ჯაბა ბრეგვაძის მესამე ლელოთი შეძლეს ცოტათი თამაშის დამშვიდება, რომელიც აბჟანდაძემ ისევ ზუსტად გარდასახა. ესპანელებმა 67-ე წუთზე კიდევ ერთი ჯარიმა გაიტანეს და სხვაობა 6 ქულამდე შემცირდა.

ბოლო წუთებში საქართველოს ნაკრებს ნერვიულობა მოუწია, მაგრამ ანგარიში შეინარჩუნა და 25:19 იმარჯვა, ბონუს ქულის გარეშე. ამრიგად, ლევან მაისაშვილის გუნდს ორი ტურის თავზე 9 ქულა აქვს და სატურნირო ცხრილის ლიდერია, ხოლო მომდევნო მატჩს 20 მარტს, კალინინგრადში, რუსეთის ნაკრებთან გამართავს.

ესპანეთი - საქართველო 19:25 (10:10)

ქულები: 0:5 ჯალაღონია (4), 0:7 აბჟანდაძე (5), 5:7 ლინკლატერი (8), 7:7 გემესი (9), 7:10 აბჟანდაძე (17), 10:10 გემესი (42), 13:10 გემესი (44), 13:15 ტაბუცაძე (45), 13:18 აბჟანდაძე (59), 16:18 ლინკლატერი (65), 16:23 ბრეგვაძე (65), 16:25 აბჟანდაძე (66), 19:25 ლინკლატერი (67)