ვეტერანი ქართველი მორაგბე დავით ზირაქაშვილი საფრანგეთის ტოპ-14-ს სიმბოლურ ნაკრებში ზედიზედ მეორედ მოხვდა.
შეგახსენებთ, რომ ნოემბრის ბოლოს “ვულკანებმა” “ლიონი” 31:11 დაამარცხეს და ქართველი ბურჯი პირველად მაშინ დააფასეს. ჩვენებურს ტემპი არც მე-11 ტურში დაუგდია და “მონპელიესთან” მოგებულ (28:23) მატჩშიც გამორჩეული იყო.
გასულ ტურში დავითი ტრადიციულად სასტარტო შემადგენლობაში გახლდათ და იმ 52 წუთში, რაც მოედანზე გაატარა, უდიდესი სამუშაო გასწია. საინტერესოა, რომ “მონპელიეს” მხრიდან მის პირისპირ საქართველოს ნაკრების წევრი მიხეილ ნარიაშვილი იდგა.
საინტერესოა ისიც, რომ ამავე შეხვედრაში მასპინძელთა რიგებში ლევან ჩილაჩავამა და ტრავმამოშუშებულმა კონსტანტინე მიქაუტაძემაც ითამაშეს.
11 ტურის თავზე “კლერმონი” 41 ქულით პირველ ადგილზე იმყოფება და უახლოეს კონკურენტ “ტულუზას” 3 ქულით უსწრებს. “ვულკანები” მომდევნო მატჩს 23 დეკემბერს სწორედ ტულუზელებთან გამართავენ.