15 სექტემბრის პირველი მატჩი 15 საათზე რუსთავში დაიწყება და ქვემო ქართლელები შიდა ქართლელებს შეხვდებიან.

რუსთავის ‘ხარებმა’ და გორის ‘ჯიქმა’ ახალი სეზონის სტარტზე ერთნაირი შედეგი აჩვენეს, თითო თამაში მოიგეს და სატურნირო ცხრილში 5-5 ქულით მეზობლად არიან.

‘ხარებს’ მოგება პირველ ტურშიც შეეძლო, როდესაც ‘ლელო-სარასენსს’ უმასპინძლა და მხოლოდ 3 ქულით ჩამორჩა - 26:29. რუსთაველებმა შანსი ხელიდან ბათუმში აღარ გაუშვეს და ზღვისპირელებს 15:8 აჯობეს.

იმ მატჩის შემდეგ მწვრთნელმა სასტარტო შემადგენლობაში რამდენიმე მოთამაშე შეცვალა. შერკინების პირველ ხაზში კვაჭი უჩა აღაშვილი, ხოლო მარჯვენა ბურჯი რევაზ წიკლაური იქნება. მეორე ხაზში ძირითადში დაწინაურდა ნიკა ბერძული. ფრთაზე თამაშს იწყებს გიორგი ნარიმანიძე.

გორის ‘ჯიქი’ პირველ ტურში მარნეულის ‘არმაზს’ შეხვდა, მეორე ტაიმის შუაში სამი ლელო გაუშვა და 15:38 დამარცხდა. ერთი კვირის წინ გორელებმა თბილისის ‘აკადემია’ მიიღეს, პირველ ტაიმში 3 ლელო გაიტანეს, მეორეში ანგარიში აღარ შეცვლილა და ‘ჯიქმა’ ბონუსიც აიღო - 21:6.

ერთი კვირის წინანდელ შემადგენლობასთან შედარებით, სასტარტო 15-ში რამდენიმე ცვლილებაა. კვაჭად თამაშს იწყებს დავით ხიდეშელი, მეორე ხაზში არსენ ტრაპაიძე დაწინაურდა, ხოლო შერკინების შემკვრელი ნიკა სუხაშვილი იქნება. შეიცვალა ღერძი და 9 ნომერი ლაშა ნადირაძე, ხოლო მგეზავი ირაკლი სვანიძე არიან. ცენტრში გიორგი წიკლაურის ნაცვლად დევსურაშვილს სამხარაძე შეუწყვილდება.

www.rugby.ge