ქართული

12:55 | 14.05.2018 | ნანახია 1825 - ჯერ

„აკადემია“ - მე-9 ადგილი 7-კაცაში

თბილისის „აკადემიამ“ ევროპის საკლუბო ჩემპიონატზე 7-კაცა რაგბში პირველ დღეს სამივე თამაში დათმო, მეორე დღეს ორივე მოიგო და საბოლოოდ მხოლოდ მე-9 ადგილს დასჯერდა.

აკადემიელებმა პირველი დღე ძალიან ცუდად ჩაატარეს, უამრავი შეცდომა დაუშვეს და ჯგუფურ ეტაპზე სამივე შეხვედრა დათმეს, მათ შორის არასარგბო ქვეყნების წარმომადგენლებთან.

პირველ შეხვედრაში თბილისელებმა ჩეხურ „დუკლასთან“ ქულა ვერ აიღეს, თავად 4 ლელო მიიღეს და 0:24 დამარცხდნენ; მეორე მატჩში ლატვიის „მიესნიეკმა“ „აკადემიას“ ორი ლელო გაუტანა და ერთი გარდასახა, ქართველებმა მხოლოდ ერთი ლელოთი უპასუხა და მეტოქემ 12:5 იმარჯვა; ჯგუფური ეტაპის დასკვნით მატჩში რუსულმა „ყუბანმა“ 29:0 გაიმარჯვა.

„აკადემია“ ჯგუფში ბოლო ადგილზე დარჩა და მეორე დღეს მხოლოდ მე-9 ადგილისთვის პლეი-ოფში იბრძოლა, რომლის ნახევარფინალში ფინურ „ჰელსინკის“ 38:7 სძლია, ფინალში კი „მიესნიეკთან“ წინა დღის მარცხისთვის რევანში აიღო, 14:7 სძლია და ქვედა ოთხეულში პირველი ადგილი დაიკავა.

თასის ფინალში „ყუბანი“ საფრანგეთის მეორე ნაკრებს, „ბალტრექსს“ შეხვდა და 31:7 მოგებით 7-კაცა რაგბის ევროპის საკლუბო ჩემპიონატის გამარჯვებული გახდა.


კომენტარები (1)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
23:00 | 14.05.2018
piki (4)

ქართულ რაგბს გაუმარჯოს.

0.075714