ევროპული პროფესიული საკლუბო რაგბის (ეპკრ) გადაწყვეტილებით, ევროთასების ფინალური მატჩების მსაჯობა ინგლისელს, ფრანგსა და უელსელს დაეკისრათ.

12 მაისს ბილბაოს სახელგანთქმულ „სან მამესზე“ ჩემპიონთა თასის ფინალური მატჩი გაიმართება - ფრანგული „რასინგი“ ირლანდიურ „ლენსტერს“ დაუპირისპირდება. ამ მატჩზე რეფერიდ ინგლისელი უეინ ბარნსი დაინიშნა. ამ ცნობილ არბიტრს აქვს ასეთი დონის მატჩების გაძღოლის გამოცდილება: 2010 წელს ბარნსმა ჩემპიონთა (იმხანად - „ჰაინეკენის“) თასის ფინალს უმსაჯა. მისი ასისტენტები ჯეიპი დოილი და ტომ ფოული იქნებიან, ვიდეორეფერის ფუნქციას როუან კიტი შეასრულებს, ხოლო ფინალის კომისრობა შოტლანდიელ ჯონ მონტგომერის დავალა.

ერთი დღით ადრე, 11 მაისს, იგივე „სან მამესზე“ ჩელენჯ კაპის ფინალიც გაიმართება, სადაც ერთმანეთს უელსური „კარდიფ ბლუზი“ და ინგლისური „გლოსტერი“ შეხვდებიან. ამ თამაშის განსჯის პატივი წილად ასევე ავტორიტეტულ რეფერის, ფრანგ ჟერომ გარსეს ხვდა, ვისთვისაც ეს იქნება ჩელენჯ კაპის უკვე მესამე ფინალი. გარსეს დაეხმარებიან თანამემამულეები - რომენ პუატი და პასკალ გოზერი. ვიდეორეფერი - კიდევ ერთი ფრანგი ფილიპ ბონური, ხოლო კომისარი - იტალიელი მაურიციო ვანჩინი.

12-ში კიდევ ერთი ფინალია. ვიდრე ბილბაოში მთავარი ევროთასის გადამწყვეტი მატჩი დაიწყება, ბასკეთშივე, ქალაქ გეჩოს „კამპო რაგბი ფადურაზე“ კონტინენტური ფარის გადამწყვეტი მატჩია: რუსეთის „ენისეი“ - გერმანიის „ჰაიდელბერგი“. შეხვედრას უელსელები მოემსახურებიან: რეფერი ბენ უაითჰაუსი და ასისტენტები - იენ დეივისი და დენ ჯონსი, ასევე ვიდეორეფერი ნილ ჰენესი. კომისარი - ინგლისელი დეივ გაიანი.

შეხსენებისთვის: ამ ფინალებში 4 ქართველი მორაგბე მიიღებს მონაწილეობას: „რასინგის“ ღირსებას მარცხენა ბურჯი ვასილ კაკოვინი იცავს, „კარდიფ ბლუზის“ მარჯვენა ბურჯია ანტონ ფეიქრიშვილი, ხოლო „ენისეიში“ ირჯებიან მესამეხაზელი მიხეილ გაჩეჩილაძე და შუამარბი დავით კაჭარავა.