ანზორ სიჭინავამ და გიორგი ილურიძემ ქუთაისის ‘ბაგრატს’ ორ-ორი ლელო გაუტანეს და თბილისის ‘აკადემიას’ დიდი 10-ის მიმდინარე სეზონის პირველი წრის დასკვნით შეხვედრაში 34:5 მოაგებინეს.

„მხატვრებს“ გნვლილ 8 მატჩში სულ 9 ლელო ჰქონდათ გატანილი, თუმცა უშუალო კონკურენტთან მაგრად მოინდომეს და გამარჯვება ბონუსით აღნიშნეს. ურთიერთშეხვედრამდე გუნდებს თითო თამაში ჰქონდათ მოგებული და აუტსაიდერების ჯახში დაქვეითების პოტენციური კანდიდატი უნდა გამოვლენილიყო.

‘ავჭალაზე’ თამაში სტუმართა დომინირებით დაიწყო. ისინი დაახლოებით 25 წუთი ბურთსა და ტერიტორიას აკონტროლებდნენ, მაგრამ მხოლოდ 5 ქულას გამორჩნენ. ‘ბაგრატი’ შეხვედრის მე-2 წუთზე დაწინაურდა, როდესაც ბაკურ გოშაძემ თავისი გადაკიდებული ბურთი აიღო და გოგა კობახიძეს გადაცემა არ დაუგვიანა. იოსებ კიკვაძეს გარდასახვა და მოგვიანებით ჯარიმა გაუცუდდა, ქუთაისელებმა ორი სალელოვე შანსიც ვერ გამოიყენეს, ტაიმის ბოლოს კი დაღლა დაეტყოთ.

‘აკადემიას’ გასახურებლად დიდი დრო დაჭირდა და მათ პირველ ლელომდე რეფერიმ ორი ‘ბაგრატის’ და ერთიც მათი მოთამაშე გაასინბინა. თბილისელთა პირველი ლელო არეული თამაშის შემდეგ გავიდა, ანზორ სიჭინავამ მცველი მოძრაობაზე დაიჭირა და თავი 36-ე წუთზე გამოიჩინა, ხოლო უკანასკნელ წუთზე „მხატვრებმა“ თავისი ნახევრიდან ხელდახელ შეუტიეს, 75 მეტრი პასაობით დაფარეს, მერე გიორგი ილურიძე მბოჭავებს დაუსხლტა და ლამაზი ლელო გაიტანა. დავით მოძღვრიშვილმა ორივე გარდასახვა გამოიყენა - 14:5.

მანვე მეორე ტაიმის საწყის 10 წუთში ორი ჯარიმა გაიტანა. მის დარტყმებს შორის ‘ბაგრატს’ მეორე ლელო უნდა დაედო, თუმცა მურმან საკანდელიძემ თავისუფალ სერგი კვერნაძეს ბურთი არ მიაწოდა და უკვე ლელოში შესული სამი მცველის ბოჭვის მსხვერპლი გახდა. 55-ე წუთზე ქუთაისელებმა შალვა კიკვაძე წითელი ბარათით დაკარგეს და ‘აკადემიამ’ დასკვნით 20 წუთში, კვლავ არეულ თამაშში საწადელს მიაღწია.

62-ე წუთზე სიჭინავამ შექცეული პასი შეირგო, ინდივიდუალური ოსტატობის ხარჯზე მცველებს შორის გაძვრა და დუბლი შეასრულა. მატჩის მიწურულს მბოჭავებს უკვე ილურიძე გაექცა და ლელომდე 45 მეტრი ირბინა. მოძღვრიშვილმა ეს გარდასახვებიც გაიტანა და ‘აკადემიამ’ 34:5 მოგებით მე-7 პოზიციაზე გადაინაცვლა.

ახლა დიდ 10-ში კიდევ ორკვირიანი შესვენებაა, 1-3 დეკემბერს გუნდები მე-10 ტურის შეხვედრებს მოილევენ და დიდ შესვენებაზე გავლენ, რომლის დროსაც ‘ბათუმი’ ‘კონტინენტის ფარის’ ჯგუფური ეტაპის ორ თამაშს გამართავს.

საქართველოს რაგბის კავშირი