საქართველოს რაგბის კავშირის პრეზიდენტმა გოჩა სვანიძემ, საქართველოში იაპონიის ელჩს, ტადაჰარუ უეჰარას უმასპინძლა.

შეხვედრას იაპონიის საელჩოს პირველი მდივანი შინჯი სოიამა, სრკ-ს მარკეტინგის ხელმძღვანელი მიხეილ ხარატი და საზოგადოებასთან ურთიერთობის სამსახურის ხელმძღვანელი ზურაბ ზოიძე ესწრებოდნენ.

საქართველო და იაპონია მსოფლიოს მასშტაბით ერთ-ერთი ყველაზე სწრაფად მზარდი სარაგბო ქვეყნებია. მათ შორის კარგი პარტნიორული ურთიერთობაა და მხარეებმა გამოთქვეს სურვილი, რომ ეს ურთიერთობები კიდევ უფრო გაღრმავდეს.

საუბრის მეორე თემა სოციალურ მიმართულებას შეეხო. მოგეხსენებათ, ამა წლის მაის-ივნისში საქართველომ მსოფლიო რაგბის 20-წლამდელთა ჩემპიონატს უმასპინძლა, რომლის ფარგლებშიც არაერთი სოციალური აქტივობა განხორციელდა. ამ აქტივობებმა მსოფლიო რაგბისგან უმაღლესი შეფასება მიიღო.

2019 წელს იაპონია მსოფლიო თასს მასპინძლობს, რომლის ფარგლებშიც ასევე იგეგმება სხვადასხვა სოციალური აქტივობები და იაპონელებს ჩვენი გამოცდილების გაზიარება სურთ, რაზეც რაგბის კავშირისგან სრული მხარდაჭერა მიიღო.