ქართული

13:10 | 10.08.2017 | ნანახია 3545 - ჯერ

შკინინმა, დარასელიამ და ქორიძემ რუსეთი დატოვეს

„მსოფლიო სპორტი“ დაახლოებით ერთი თვის წინ წერდა, რომ რუსეთის ჩემპიონატში მოასპარეზე კლუბ „მეტალურგს“ 4 ქართველი მორაგბე შეუერთდა. ქალაქ ნოვოკუზნეცკის კლუბმა თავდაპირველად ბურჯი ირაკლი ქორიძე და მესამეხაზელი ლევან დარასელია დაიმატა, შემდეგ მათ ბორჯღალოსანი უკანახაზელი გიორგი შკინინი შეუერთდა, ხოლო სულ ბოლოს „მეტალურგმა“ „კრასნი იარიდან“ სეზონის ბოლომდე ბურჯი მიხეილ წიკლაური ინათხოვრა. ახლა კი ირკვევა, რომ ამ ოთხეულიდან „მეტალურგში“ წიკლაურიღა რჩება.

„რა დასამალია, ეს მორაგბეები საქართველოს ჩემპიონატში თამაშობენ და ეს მათთვის პრიორიტეტული ტურნირია. იმ პერიოდში, როცა საქართველოს ჩემპიონატი დასრულებულია და მომდევნო ჯერ არ დაწყებულა, მორაგბეებს აქვთ უფლება, სხვაგან ითამაშონ. ჰოდა, ზედიზედ მეორე წელია, „მეტალურგი“ ამ პერიოდში ქართველ მორაგბეებს იწვევს. 2016/17 წლების სეზონის მსვლელობისას ინტერესთა გადაკვეთა არ მომხდარა და ლეგიონერებმა აქ ფაქტობრივად სეზონის ბოლომდე ითამაშეს. 2017/18 წლების სეზონში ქართულ ჩემპიონატში განაცხადების გაფორმების ვადები და პირობები შეიცვალა. ივლისის ბოლომდე მორაგბეებს არათუ ყველა აუცილებელი საბუთი უნდა წარედგინათ, არამედ განაცხადის შეტანას პირადად უნდა დასწრებოდნენ. სწორედ ესაა მიზეზი, რომ დარასელია, ქორიძე და შკინინი სამშობლოში გაემგზავრნენ“, - ახსნა სიტუაცია „მეტალურგის“ მწვრთნელმა ვლადიმირ ნეგოდინმა.

„ამ ბიჭების დაბრუნება თეორიულად შესაძლებელი იყო, მაგრამ რა აზრი აქვს? ამხელა მანძილებზე მგზავრობაში მორაგბეები გუნდთან ერთად ვერ ვარჯიშობენ და ცხადია, ფიზიკურ კონდიციებსაც კარგავენ. გადავწყვიტეთ, რომ ასე ჩვენც გავწვალდებით და თავად მორაგბეებიც. თუმცა, არ გამოვრიცხავ, მომავალში კვლავაც დავიხმაროთ ქართველი მოთამაშეები, ოღონდ ყველა ნიუანსს თავიდანვე შევათანხმებთ, რათა თავი მოულოდნელი პრობლემებისგან დავიცვათ“.


კომენტარები (1)

კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია

FB ავტორიზაცია
15:59 | 10.08.2017
პანტელეიმონი (1218)

"ენისეი"-ის და "კრასნი იარი"-ის გარდა სხვა გუნდებს არ უნდა გაეკარონ ქართველები.

0.074192