ფრანგული „მონპელიეს“ მეპატრონე და ქუთაისის „აიას“ სპონსორი მოედ ალტრადი ინგლისის „ავივა პრემიერშიპის“ კლუბ „გლოსტერის“ აქციების საკონტროლო პაკეტის შეძენას გეგმავდა, მაგრამ სწორედ პრემიერშიპმა მას ამის უფლება არ მისცა.

სირიელ ბიზნესმენს აქციების 45%-ის შეძენა სურდა, მაგრამ ბრიტანელებმა მას მხოლოდ 20%-ის შეძენის ნება დართეს, რის შემდეგაც მილიარდერმა საკუთარ წამოწყებაზე საერთოდ უარი განაცხადა.

„პრემიერშიპმა იმედი გამიცრუა. არა მგონია, მათი გადაწყვეტილებით რაგბი მოგებული დარჩეს. „გლოსტერი“ უფრო ძლიერი გახდებოდა როგორც ინგლისში, ისე ევროპულ არენაზეც, და გულშემატკივრების დიდ ინტერესს გამოიწვევდა. გაჩნდებოდა შესაძლებლობა ბრიტანეთში ახალი ინვესტორების მოსაზიდად. მოლაპარაკება რამდენიმე თვე გრძელდებოდა და მისმა შედეგებმა გული დამწყვიტა. სამწუხაროდ, დღესაც არ ვიცი, რა იყო უარის მიზეზი“, - განაცხადა ალტრადმა Sky Sports-თან საუბარში.