საქართველოსა და რუსეთის მორაგბეთა ნაკრებების შეხვედრამდე ერთი დღით ადრე “დინამო-არენას” საკონფერენციო დარბაზში ტრადიციული წინასამატჩო პრესკონფერენცია გაიმართა. ევროპის რაგბის ჩემპიონატის მორიგი ტურის თამაშამდე საქართველოს ნაკრების მთავარმა მწვრთნელმა მილტონ ჰეიგმა თქვა, რომ მოხარულია იმ ფაქტით, რომ გუნდს კაპიტანი მამუკა გორგოძე დაუბრუნდა. ახალზელანდიელმა ასევე ყურადღება ახალგაზრდა მოთამაშეებზე გაამახვილა და აღნიშნა, რომ მათ თამაშის უფლება უნდა მიეცეთ.

“ცვლილებები გამოწვეულია იმით, რომ გუნდს კაპიტანი და მიშა (ნარიაშვილი – რედ.) დაუბრუნდნენ. გარდა ამისა, ვეცდებით, შევქმნათ თამაშის დროს მეტი სირღმეები შეტევაში. გადაადგილებები სწორედ ამიტომ განვახორციელეთ, სხვა მიზეზი არ ყოფილა.

მიმაჩნია, რომ რამდენიმე ახალგაზრდა მორაგბემ საკუთარი თავი კარგად წარმოაჩინა და ძალიან კარგად იმუშავა. მაგალითად, ცუცქირიძამ ბრწყინვალედ ითამაშა და ამიტომ ხვალ სასტარტოში იქნება. ეს პროცესი იმიტომ მიმდინარეობს, რომ სანაკრებო დონეზე მოხდეს მათი გასინჯვა და ბიჭებს მიეცეთ შანსი, წარმოაჩინონ საკუთარი თავი.

რა თქმა უნდა, თამაშის წინ კარტებს ბოლომდე არ გავხსნით. ჩვენ ვაძლევთ მოთამაშეებს წინასწარ დავალებებს, მაგრამ ხშირად ყველაფერი მოედანზე კონკრეტულ სიტუაციებში წყდება”, - განაცხადა ჰეიგმა.

მამუკა გორგოძე: “მაქსიმალურად მოტივირებულნი უნდა ვიყოთ”

საქართველოს ნაკრების კაპიტანმა მამუკა გორგოძემ თქვა, რომ თუ გუნდი მაქსიმალურად მოტივირებული არ იქნება, წაგების დიდი ალბათობა დადგება.

“რაგბი ისეთი თამაშია, მოედანზე ვინც უნდა გავიდეს, ყოველთვის მოტივირებული უნდა იყოს. წინაღმდეგ შემთხვევაში, ეს ყველაფერი ცუდად დასრულდება.

რუსეთი ბრძოლისუნარიანი გუნდია. ათჯერ ვითამაშე მათთან, მაგრამ მაქსიმალურად კონცენტრირებულები უნდა ვიყოთ, პირველიდან ბოლო წუთამდე, თორემ შეიძლება წავაგოთ. ყურადღება არ უნდა მოვადუნოთ”, - განაცხადა გორგოძემ.

შეგახსენებთ, რომ საქართველოსა და რუსეთს შორის დაპირისპირება 12 მარტს თბილისის “დინამო არენაზე” 18 საათზე დაიწყება.

ალექსანდრ პერვუხინი, რუსეთის ნაკრების მწვრთნელი:

“მოხარული ვარ საქართველოში კიდევ ერთხელ ჩამოსვლით. აქამდე რა შედეგებითაც მოვედით, ყოველივეს თავისი ობიექტური თუ სუბიექტური მიზეზი აქვს. თუმცა, რაცაა ესაა. ახლა ორი დარჩენილი თამაშია მნიშვნელოვანი. ხვალინდელ მატჩში მთავარი ამოცანა დაშვებული შეცდომებიდან დასკვნების გამოტანაა. თუკი შინ რუმინელებთან წავაგეთ, იქნებ საქართველო სტუმრად დავამარცხოთ? რა არის ამაში წარმოუდგენელი? შანსი არსებობს, თანაც საკმაოდ რეალური”.