თბილისის „ლოკომოტივის“ მარცხით „ბათუმმა“ და ქუთაისის „აიამ“ ისარგებლეს და სატურნირო ცხრილში თითო საფეხურით დაწინაურდნენ.

დიდი 10-ის 2016/2017 წლების სეზონი მე-12 ტურის მატჩებით განახლდა და ოთხ მათგანში გამარჯვება სტუმრებმა მოიპოვეს. უკვე ვწერდით, რომ თითქმის მთელი მატჩი იგებდა სტუმარი „არმიაც“, თუმცა 78-ე წუთზე გაშვებული ჯარიმით ჩემპიონ „ლელო-სარასენსთან“ 26:27 დამარცხდა. პორველ სათამაშო დღეს, პირველ ტაიმში მოპოვებული 10-ქულიანი უპირატესობა შეინარჩუნა და „ლოკომოტივთან“ 10:6 იმარჯვა „აკადემიამ“.

მეორე დღეს „ბათუმი“ თბილისში ბოლნისის „ყოჩებს“ ეწვია და „შევარდენის“ ხელოვნურსაფარიან მოედანზე 40:10 სძლია. ზღვისპირელებს თავბრუდამხვევი დასაწყისი ჰქონდათ და სწრაფი შეტევებით 20 წუთში სამი ლელო დაამიწეს. თავი გარემარბებმა გამოიჩინეს - ბებიაშვილმა ორჯერ და ტუჩაშვილმა ერთხელ. „ყოჩებმა“ ხიდეშელის ლელოთი და ჯინაშვილის გარდასახვით და ჯარიმით გაიბრძოლა, თუმცა შესვენებამდე სოხაძისგან არეკნი და კობახიძისგან ჯარიმა გაუშვა - 10:23.

მეორე ტაიმში კობახიძემ ლელო, ჯარიმა და ორი გარდასახვა გაიტანა, ხოლო ერთი ლელო გოგიტიძის ანგარიშზე. ეს კურიოზული ლელო იყო - კობახიძის დარტყმული ჯარიმა მიზანს აცდა, მაგრამ სანამ ბოლნისელებმა ბურთის დამიწება მოიფიქრეს, მასთან ბათუმელმა მიმყოლმა მიირბინა.

გორში „ჯიქი“ ქუთაისის „აიას“ დაუხვდა და პირველი ტაიმის შემდეგ 3:15 ჩამორჩა, ხოლო მეორე ნახევრის დასაწყისში კიდევ ჯარიმა გაუშვა. მასპინძლებმა გაიბრძოლეს, ჩამორჩენა შეამცირეს და ერთი პრემიალური ქულა ჩაიწერეს აქტივში - 13:18.

ქუთაისში გასავარდნი ზონის სიახლოვეს მყოფი გუნდები თამაშობდნენ და დიდი ბრძოლა იყო მოსალოდნელი, მაგრამ ასე არ მოხდა. თბილისის „არმაზმა“ ქუთაისის „ბაგრატი“ 57:0 გაანადგურა და მასთან ჩამორჩენა შეამცირა.

დიდი 10. XII ტური

ლოკომოტივი - აკადემია 6:10

ლელო-სარასენსი - არმია 27:26

ყოჩები - ბათუმი 10:40

ჯიქი - აია 13:18

ბაგრატი - არმაზი 0:57