საქართველოს 18 წლამდე ასაკის მორაგბეთა ნაკრები ევროპის ჩემპიონატის 1/4-ფინალურ ეტაპზე კანადის ნაკრებს შეხვდება.

ორი წლის წინ ტურნირი ინგლისმა, ირლანდიამ, უელსმა, შოტლანდიამ და იტალიამ დატოვეს, რის შემდეგაც ექვსი ერის გუნდებიდან ევროპის ჩემპიონატის ელიტურ დივიზიონს მხოლოდ საფრანგეთი შემორჩა. „რაგბი ევროპამ“ ჩემპიონატის დონის ასამაღლებლად ფორმატი შეცვალა და გათამაშებას აშშ, კანადა და იაპონია დაამატა.

წლეულს ევროპის ჩემპიონატი საფრანგეთში, ბრეტანში გაიმართება. მეოთხედფინალური ეტაპის თამაშები 7 აპრილსაა ჩანიშნული. საქართველო კანადას, საფრანგეთი - ესპანეთს, აშშ - პორტუგალიას, ხოლო იაპონია ბელგიას ეთამაშება. ქართველი 18-წლამდელები ბოლო ორი წელია, ფინალში გადიან, ჩემპიონი კი საფრანგეთი ხდება.