ქვედა ოთხეულის გუნდებმა ფავორიტებს პირველ ტაიმში დიდი წინააღმდეგობა გაუწიეს, მაგრამ მეორეში ვეღარ გაძლეს და ლიდერებმა დაგეგმილი ქულები მოიპოვეს.

დიდი 10-ის XI ტურის ორი თამაში თბილისში, ხოლო ერთი ქუთაისში გაიმართა. „ავჭალაზე“ „არმიამ“, რომელსაც წლის ექვსეულში დასრულების შანსი ჰქონდა, „ლოკომოტივს“ ტაიმი 3:0 მოუგო, თუმცა შესვენების შემდეგ ქულაც ვეღარ აიღო. სამაგიეროდ, „რკინიგზელების“ ტაქტიკამ გაამართლა, მათ 26:3 იმარჯვეს და პრემიალური ქულაც მიიღეს.

„შევარდენზე“ „არმაზმა“ „ლელო-სარასენსს“ ორი ლელოს წილ ორი ჯარიმა გაუტანა და ტაიმი 6:12 დათმო. შესვენების შემდეგ ჩემპიონმა კიდევ ორი ლელო დადო და ერთი გარდასახა, თავად ერთი ჯარიმა გაუშვა და 24:9 მოგებით პრემიაც მიითვალა.

ქუთაისში ბოლნისის „ყოჩებმა“ პირველი ტაიმი 8:10 დათმო, მაგრამ მეორეში მონაგარს ვერაფერი შემატა, თავად 8 ქულა მიიღო და „აიამ“ 18:8 იმარჯვა. მასპინძლებს გული იმაზე თუ დაწყდებათ, რომ პრემია ვერ აიღეს.

დიდი 10-ში თვენახევრიანი შესვენება გამოცხადდა. ახალ წელს ცხრილის სათავეში „ლელო-სარასენსი“ და „ლოკომოტივი“ ხვდებიან, რომელთაც 37-37 ქულა აქვთ. მათ 2-2 ქულით ჩამორჩებიან „ბათუმი“ და „აია“, ხოლო გორის „ჯიქს“ 33 ქულა აქვს. ძნელად სავარაუდოა, ამ ხუთ გუნდს პლეი-ოფში გასვლის მხრივ პრობლემა შეექმნას, ხოლო მე-6 ადგილისთვის „აკადემია“ და „არმია“ იბრძოლებენ.