„ბორჯღალოსნების“ მომავალი მეტოქე სამოას ნაკრები, ნოემბრის ტესტ-მატჩებს დიდი დანაკლისით ხვდება და შესაბამისად, თბილისსაც შესუსტებული შემადგენლობით ეწვევა.

ტრავმების გამო კუნძულელები შემდეგ ლიდერებს მოისაკლისებენ: „სტად ფრანსეს“ ბურჯი პოლ ელო-ემილი, „გლოსტერი“ კვაჭი მოტუ მატუუ, „სეილ შარქსის“ ფლანკერი თი-ჯეი იოანე, „ბრისტოლის“ ნახევარმცველი ტუსი პისი, „უოსპსის“ ცენტრი ალაპათი ლეიუა და „ჩიფსის“ ფულბეკი ტიმ ნანაი-უილიამსი.

საქართველოს ნაკრებს ნოემბერში სამი თამაში ელის, აქედან ორი თბილისში. 12 ნოემბერს საქართველოს დედაქალაქს იაპონია ეწვევა, რომელსაც სხვადასხვა მიზეზით 10 ლიდერი აკლია. სამოა თბილისში 19 ნოემბერს ითამაშებს და ორივე ეს შეხვედრა „მიხეილ მესხზე“ 15 საათზე დაიწყება. ტესტ-სერიას საქართველო შოტლანდიაში სტუმრობით ასრულებს.

მანამდე, იაპონელები 5 ნოემბერს ტოკიოში არგენტინას მასპინძლობენ, ხოლო თბილისის შემდეგ ევროპულ ტურნეს განაგრძობენ და კარდიფში უელსს, ხოლო საფრანგეთში ფიჯის ეთამაშებიან. სამოა 12 ნოემბერს ტულუზში საფრანგეთს შეხვდება, სადაც თბილისური მატჩის შემდეგ დაბრუნდება და გრენობლში კანადას შეერკინება.

ზურა ქსოვრელი