საქართველოს 20-წლამდე მორაგბეთა ნაკრების მომავალმა მეტოქემ მანჩესტერში მიმდინარე მსოფლიოს ჩემპიონატზე, ექვსი ერის დიდი სლემით მომგებმა უელსმა, პირველი მატჩისგან განსხვავებით შემადგენლობაში რვა ცვლილება განახორციელა.

პირველ ტურში უელსი 20 წუთის შემდეგ ირლანდიას სამი ლელოთი 17:0 უგებდა, მაგრამ საბოლოოდ 25:26 დამარცხდა და თასის ნახევარფინალში გასვლის შანსი მნიშვნელოვნად შეუმცირდა. გუნდის მთავარი მწვრთნელი ჯეისონ სტრეინჯი ქართველთა შერკინებას უფრთხის და გასაკვირი არა მთელი პირველი ხაზი რომ გამოცვალა. მთლიანობაში, შერკინებაზე ხუთი ცვლილება მოდის.

„ცვლილებებს ორი მიზანი აქვს - ამ დონეზე თამაშის და განვითარების შანსი ყველას უნდა მიეცეს; გარდა ამისა, თამაშებს შორის ოთხდღიანი ინტერვალის პირობებში, ყველა მოთამაშეს უდიდესი როლი ენიჭება. მნიშვნელოვანია ბურთზე კონტროლი მოვიპოვოთ და თუ ეს შევძელით, მერე ვიცით რაც უნდა ვქნათ.

საქართველოს ნაკრები ფიზიკურ ძალაზე ორიენტირებული გუნდია. მათი 9 ნომერი შარშან უფროსების მსოფლიო თასზე თამაშობდა და 8 ნომერი „კლერმონის“ მოთამაშეა. ამრიგად, მეტოქე ხარისხის ნაკლებობას არ განიცდის, მაგრამ თუ ავამუშავეთ ჩვენი სისწრაფეები, ვიცით რისი ჩვენებაც შეგვიძლია“ - ამბობს სტრეინჯი.

უელსელთა მწვრთნელი ცდება, რადგან ხვალ ვასილ ლობჟანიძე სასტარტო შემადგენლობაში არ იქნება და თამაშს გელა აფრასიძე იწყებს, ხოლო ახალ ზელანდიასთან შერკინების შემკვრელად მოთამაშე ოთარ გიორგაძე მეორე ხაზში გადაინაცვლებს, 8 ნომერზე კი, ბექა გორგაძე დადგება.

ზურა ქსოვრელი