20-წლამდელთა მსოფლიო ჩემპიონატის დაწყებამდე, ექვსი ერის დიდი სლემით მომგები უელსი ახალ ზელანდიასთან ერთად ერთ-ერთ მთავარ ფავორიტად მიიჩნეოდა, მაგრამ გუნდი ირლანდიასთან დამარცხდა და თასისთვის ბრძოლის გაგრძელება სათუო გაუხდა.

არადა, „ახალგაზრდა დრაკონებს“ საუცხოო დასაწყისი ჰქონდათ, 20 წუთში სამი ლელო დადეს და 17:0 დაწინაურდნენ, თუმცა მებრძოლმა ირლანდიამ თამაში სათავისოდ შემოაბრუბა, მეორე ტაიმში 26:20 დაწინაურდა და საფინალო სასტვენამდე ორიოდე წუთით ადრე უელსისგან ლელო გაუშვა, მაგრამ გარდასახვა არაზუსტი იყო. ოთხი ლელოს გატანამ 25:26 მარცხმა უელსს 2 პრემიალური ქულა შესძინა, რაც მინიმუმ 4 დაგეგმილთან შედარებით ნამდვილად ცოტაა და განრისხებულები ხვალ საქართველოს ეკვეთებიან.

უელსის ნაკრები 20-წლამდელთა მსოფლიოს ჩემპიონატში მისი დაარსების დღიდან, 2008 წლიდან მონაწილეობს და ჯგუფში მესამე ადგილზე ერთადერთხელ, 2015 წელს დარჩა. ის თასის ნახევარფინალში დღემდე სამჯერ გავიდა, ხოლო საუკეთესო შედეგი 2013 წელს ჰქონდა და მაშინ ფინალში ინგლისთან დამარცხდა. წელს, პირველ ტურში აღებული იმ 2 ქულის ხარჯზე, მას ჯგუფში პირვბელზე თუ არა საუკეთესო მე-2 ადგილზე გასვლის შანსი ნამდვილად აქვს და ამისათვის საქართველოსთან პრემიალური ქულით გამარჯვება ჭირდება.

თავის მხრივ, მსოფლიოს ჩემპიონატის სადებიუტო მატჩში „უმცროსი ბორჯღალოსნები“ ახალ ზელანდიასთან 0:55 დამარცხდნენ. ეს მოსალოდნელი შედეგი იყო, თუმცა არა სასურველი და ახლა გულშემატკივერი უკეთეს თამაშის ხარისხს და ლელოებს ელოდება, თორემ უელსთან გამარჯვების შანსი თითქმის ისეთივეა, როგორც ახალ ზელანდიასთან გვქონდა. შეხვედრა მანჩესტერ სიტის აკადემიის სტადიონზე თბილისის დროით 18:45 საათზე დაიწყება და მისი პირდაპირი რეპორტაჟი საზოგადოებრივი მაუწყებლის მეორე არხზე შედგება.

„ჯუნიორ ოლ ბლექსთან“ შეხვედრის მეორე დღეს, სამწვრთნელო შტაბმა გუნდი დაასვენა. „უმცროსმა ბორჯღალოსნებმა“ მთელი დღე რეაბილიტაციასა და ვიდეო ანალიზს დაუთმეს - გადიოდნენ წინა მატჩზე დაშვებულ შეცდომებს და და სწავლობდნენ მომავალ მეტოქეს, რომელთანაც ადვილი მატჩი ნამდვილად არ გველის. როგორც კილასონიამ უელსელების შეფასებისას განაცხადა - „უელსმა მოსაგები თამაში წააგო. ამის გამო, ასეთი დონის გუნდი აუცილებლად გაასმაგებული ძალითა და მოტივაციით ეცდება გააკეთოს ის, რაც წინა თამაშში არ გამოუვიდა. ეს იქნება ძალიან რთული თამაში დიდ გუნდთან, სადაც გაზრდის ასევე დიდი შესაძლებლობა გვექნება და ჩვენი მიზანი სათამაშო პოტენციალის უკეთ წარმოჩენაა“.

განტვირთვის დღეს რამდენიმე მორაგბე - გიორგი კვესელაძე, ლადო მიმინოშვილი, ილია სპანდერაშვილი, მირიან მოდებაძე და ფიზ-მომზადების მწვრთნელები, გიორგი და გივი ნადარეიშვილები უეიდის სკოლას ესტუმრნენ, სადაც 10-15 წლამდე გოგონებსა და ბიჭებს რაგბის სახალისო გაკვეთილები ჩაუტარეს და ეთამაშნენ.

გუშინ გუნდმა პირველი ტურის შემდეგ პირველად ივარჯიშა. „უმცროსი ბორჯღალოსნები“ ტრადიციულად ვიდნესის რაგბის კლუბის ბაზაზე მივიდნენ და საათნახევრიანი ვარჯიში გამართეს. დღეს კი კაპიტნის ვარჯიშია. წინა ტურის მსგავსად, დღესაც ვიდნესში ვივარჯიშებთ, რათა გზაში დიდი დრო არ დავკარგოთ.

„ყოველთვის რთულია თამაში ძლიერ გუნდთან, რომელსაც წაგებული აქვს წინა მატჩი. ვიცით, რომ უელსმა დამაჯერებლად მოიგო 20-წლამდელთა 6 ერი, ხოლო მსოლფიო ჩემპიონატის ჯგუფურ ეტაპზე ალბათ, ირლანდიასთან ყველაზე მნიშვნელოვანი მატჩი წააგო. უელსი საკმაოდ რთული, კარგად დაბალანსებული, კონტაქტური და კარგად ორგანიზებული გუნდია. ჩვენი ბიჭები „გაბრაზებულები“ არიან, იმიტომ რომ ვერ მოახერხეს ზელანდიასთან თავის რეალიზება - ელემენტალური შეცდომები მოგვდიოდა. ხვალისთვის აუცილებელია დავწყნარდეთ, დავმშვიდდეთ და კარგი თამაში ვითამაშოთ“ - შემადგენლობის დასახელებმადე განაცხადა ილია მაისურაძემ.

უელსთან მატჩამდე სამწვრთნელო შტაბმა გუნდში რიგი გადანაცვლებები განახორციელა, რაზეც მწვრთნელები თბილისშიც საუბრობდნენ, რომ ყველას მიეცემა თამაშის შესაძლებლობა და რომ ყველა მორაგბე იმგვარადაა შერჩეული, რამდენიმე პოზიციის გადაფარვა შეეძლოთ.

„შეუძლებელია და ძალიან რთულია გათვალო და ერთი შემადგენლობით ითამაშო მთელი ტურნირი. ამასთან, ჯერ კიდევ თბილისში, როდესაც სელექცია გავაკეთეთ, გავთვალეთ, რომ თითო თამაშში სხვადასხვა შემადგენლობა ითამაშებდა. ეს საჭიროა, რადგან ყველას უნდა დაუგროვდეს სათამაშო პრაქტიკა, ყველას მიეცეს თამაშის შესაძლებლობა. დარჩენილ ორ სამ შეხვედრაში გამოჩნდება სუსტი და ძლიერი მხარეები. ვის შეუძლია კარგად სირთულეებთან გამკლავება, კრიტიკულ მომენტში სწორი გადაწყვეტილების მიღება“ - ასევე დასძინა მაისურაძემ.

ხვალ სასტარტოში მატარაძე, ხუროშვილი და ტაბიძე იქნებიან, ხოლო ნეფარიძე და მელიქიძე მარქაფაშია არიან. მესამე ხაზიდან მეორეში გადაინაცვლა ოთარ გიორგაძემ, ცხადაძე მარქაფაშია, ხოლო 6 ნომერზე თამაშს ილია სპანდერაშვილი იწყებს.

პირველ მატჩში მარქაფაში ვიხილეთ ნაკრების ვიცე-კაპიტანი ბექა გორგაძე, რომელიც ხვალ 8 ნოემრზე დაიწყებს და გუნდის კაპიტნის მოვალეობებს იტვირთავს.

ილია მაისურაძე: „ბექა გორგაძე თავისი მიდგომითა და პროფესიონალიზმით საერთაშორისო დონის მორაგბეა - მე და მთლიანად სამწვრთნელო შტაბს, ამ ბიჭის გვჯერა და ჩვენგან დიდ ნდობას იმსახურებს. წინა მატჩში ის შეცვლაზე შევიდა. თუმცა, მანამდე კითხვის ნიშნის ქვეშ იყო მისი სამატჩო განაცხადში შეყვანა, ვინაიდან კლუბში ნახევარფინალი არც თუ ისე დიდი ხნის წინ ითამაშა და გვინდოდა დაესვენა. მაგრამ მან მალევე გაიარა რეაბილიტაცია. ოთარ გიორგაძე დიდი ხნის განმავლობაში ემზადებოდა 8 ნომერზე სათამაშოდ, თუმცა, ახლა ვფიქრობთ, რომ ბექა მზადაა თამაში დაიწყოს და გიორგაძე მეორე ხაზში გადაინაცვლებს.“

გუნდის კაპიტანი ვასილ ლობჟანიძე ხვალ მარქაფაშია - „წინა მატჩში, იმ მცირე ეპიზოდებში, სადაც ჩვენ თავი გამოვიჩინეთ, ვასილ ლობჟანიძე მნიშვნელოვანი და გამორჩეული ფიგურა იყო, როგორც კაპიტანი და გამოცდილი მორაგბე. საერთოდ ძნელია, როდესაც გუნდს თამაში ვერ წაუვა, კაპიტანმა რაიმე რადიკალურად გამოასწოროს, თან ვასოს ისედაც დიდი პასუხისმგებლობა ჰქონდა. გარდა ამისა, ეს მსოფლიო ჩემპიონატია და საქმეში გელა აფრასიძეც უნდა ვნახოთ და მასაც ვენდოთ.“ საუბრის ბოლოს დასძინა მაისურაძემ.

უელსთან ასევე შემდეგი მორაგბეები ითამაშებენ, რომლებიც წინა მატჩის განაცხადში არ იყვნენ: გიორგი კვესელაძე, მირიან მოდებაძე, ლადო მიმინოშვილი და ლუკა გოგინავა.

სამატჩორაზმი
საქართველო - უელსი | მანჩესტერ სიტის აკად. სტადიონი, მანჩესტერი
11/06/2016 | 18:45 სთ (საქ. დროით) - პირდაპირირეპორტაჟი: საზოგადოებრივიმაუწყებლისმე-2 არხი

საქართველო: 15. მირიან მოდებაძე (აია), 14. ლადო მიმინოშვილი (ბათუმი), 13. გიორგი კოშაძე (ხარები), 12. გიორგი კვესელაძე (არმაზი), 11. სანდრო მერკვილიშვილი (არმია), 10. დავით მოძღვრიშვილი (აკადემია), 9. გელა აფრასიძე(ლელო სარ); 1. თორნიკე მატარაძე (აია), 2. გიორგი ხურიშვილი (არმაზი), 3. ლაშა ტაბიძე (ბორდო, საფ), 4.დემურ ეფრემიძე (ყოჩები), 5. ოთარ გიორგაძე (კლერმონ, საფ), 6. ილია სპანდერაშვიილ (არმია), 7. გიორგი ცუცქირიძე (ბრივ, საფ), 8. ბექა გორგაძე კაპ (მონ დე მარსან, საფ).

მარქაფა: 16. ლუკა გოგინავა (ლოკომოტივი), 17. ნიკა ნეფარიძე (კლერმონ, საფ), 18. გიორგი მელიქიძე (სტად ფრანსე, საფ), 19. მიხეილ ბაბუნაშვილი (აია), 20. ირაკლი ცხადაძე (არმაზი), 21. ვასილ ლობჟანიძე (არმაზი), 22. სანდრო ილურიძე (აკადემია), 23. რატი შანიძე (ლელო სარ).

საქართველოს რაგბის კავშირის ვებ-გვერდის მიხედვით