იტალიის ნაკრების მგეზავმა ტომაზო ალანმა საფრანგეთის დატოვების და სამშობლოში დაბრუნების გადაწყვეტილება მიიღო.

23 წლის მორაგბე პრო დ2-ის „პერპინიენის“ ღირსებას იცავდა, ახალ სეზონს კი, „ბენეტონში“ დაიწყებს და „კელტების ლიგაში“ ითამაშებს.

„ყოველთვის მსურდა იტალიაში დაბრუნება და როგორც კი „პერპინიენთან“ კონტრაქტი დამისრულდა, შესაძლებლობით ვისარგებლე. „ბენეტონს“ უდიდესი პოტენციალი, მდიდარი ისტორია და გულშემატკივრებისგან დიდი სიყვარული აქვს. სახლში დაბრუნებით გახარებული ვარ. აქ მუდამ ნაკრების მწვრთნელის თვალთახედვის არეში ვიქნები“ - შეაფასა მგეზავმა საკუთარი გადაწყვეტილება.

ალანი ვიჩენცაში დაიბადა და ჯერ ინგლისში „უოსპსის“, მერე კი სამხრეთ აფრიკაში „სტორმერსის“ აკადემიაში ხვეწდა ოსტატობას. რადგან ტომაზოს მამა შოტლანდიელი ყავს, შოტლანდიის 20-წლამდელთა ნაკრების მიწვევას დათანხმდა და ამ გუნდის შემადგენლობაში 2011-2013 წლებში 16 თამაში ჩაატარა (89 ქულა). 2013 წელს ის „პერპინიენში“ გადავიდა და პირველ სეზონში ტოპ 14-სა და „ჰაინეკენის თასზე“ თამაშობდა, ხოლო მომდევნო ორი წელიწადი პრო დ2-ში გაატარა. 2013 წელსვე, ალანმა, რომელსაც დედა ყავს იტალიელი, იტალიის ეროვნული ნაკრებში თამაში გადაწყვიტა და „აძურას“ შემადგენლობაში 22 თამაში ჩაატარა (103 ქულა). ის 2015 წლის მსოფლიო თასის მონაწილეა.

ზურა ქსოვრელი