ბიძინა სამხარაძემ რუმინეთის თასის ფინალში „ტიმიშოარა-სარასენსს“ ლამაზი ლელო გაუტანა და თავისი გუნდი 5:3 დააწინაურა, მაგრამ გამარჯვებისთვის ეს საკმარისი არ აღმოჩნდა.

რუმინეთში სარაგბო სეზონი თასის გათამაშებით დაიწყო და „რიჟასთვის“ ეს ლელო მესამეა დასრულებულ გათამაშებაში. ამავდროულად, სამხარაძე ქვეყნის ჩემპიონატის, თასის თუ სუპერთასის ფინალში, „ტიმიშოარა-სარასენსსთან“ ზედიზედ მეხუთედ დამარცხდა და მისთვის ერთგვარ დაუძლეველ ბარიერად იქცა. თავის მხრივ, ამ უკანასკნელმა ზედიზედ მესამედ მოიგო ქვეყნის თასი და ბუქარესტის „დინამოს“ რეკორდი გაიმეორა.

ანგარიში ვალენტინ კალაფეტეანუმ ჯარიმით გახსნა, რაზეც სამხარაძემ მე-15 წუთზე ლელოთი უპასუხა. ის მოხერხებულად გაძვრა მცველებს შორის და ჩათვლის მოედანს უწია, მაგრამ გარდასახვა არაზუსტი იყო. თუმცა კალაფეტეანუს შეჩერება ვერ მოხერხდა. მან ჯამში საკუთარ გუნდს 22 ქულა შესძინა - 1 ლელო, 4 გარდასახვა და 3 ჯარიმა. ტაიმი „ტიმიშოარამ“ 16:5, ხოლო თამაში 37:12 მოიგო.

ზურა ქსოვრელი