საქართველოს ნაკრების ყოფილმა 9 ნომერმა ბიძინა სამხარაძემ, რომელიც რუმინული „ბაია მარეს“ კაპიტანია, ამ ქვეყნის თასის გათამაშების ნახევარფინალში ლელო გაიტანა და თავისი გუნდის წარმატებას საფუძველი ჩაუყარა.

„ბაია მარემ“ ბუქარესტის „დინამოს“ უმასპინძლა და ჯარიმით ჩამორჩა, მე-14 წუთზე კი, ქართველმა ლეგიონერმა ლელო დადო და ზუსტი გარდასახვის შემდეგ მასპინძლები 7:3 დაწინაურდნენ. სტუმართა მორიგ ჯარიმას ლუკ სამოამ სამი ზუსტი დარტყმით უპასუხა, ხოლო ტაიმის ბოლოს „ბაია მარემ“ მეორე ლელო დადო და 23:6 დაწინაურდა. „დინამომ“ თამაშის განახლებიდან 5 წუთში ერთი საპასუხო ლელო გაიტანა, მაგრამ დასკვნით მეოთხედში ორი გარდასახული ლელო და ჯარიმა გაუშვა და სამხარაძის გუნდმა 40:13 იმარჯვა.

რუმინეთის თასის ფინალში ქართული დერბი არ შედგება, რადგან მეორე ნახევარფინალში მიხეილ არჩუაშვილის ბუქარესტის „სტიაუა“ რუმინული რაგბის ფლაგმანს, „ტიმიშოარა-სარასენსს“ სტუმრად შეხვდა და 7:36 დამარცხდა. სტუმრებმა ერთი ლელო გაიტანეს, მაგრამ თავად 4 მიიღეს, ორი გარდასახვა ზუსტი იყო და კიდევ 4 ჯარიმა გაუშვეს. არჩუაშვილი სასტარტო შემადგენლობაში იყო.

ამრიგად, რუმინეთის თასის ფინალში ბოლო წლების ტრადიციული მეტოქეები, „ბაია მარე“ და „ტიმიშოარა-სარასენსი“ ითამაშებენ. ქვეყნის ჩემპიონატში, თასზე და სუპერ თასზე, ამ გუნდებმა ბოლო ოთხ ფინალში ითამაშეს და სამხარაძის გუნდი ყველა ჯერზე დამარცხდა. იმედია, წელს ეს ტრადიცია დაირღვევა.

ზურა ქსოვრელი