საფრანგეთის რანგით მესამე, ფედერალ 1-ის შესარჩევ პლეი ოფში ქართველების „მასიმ“ „ნევერი“ 17:14 დაამარცხა და პრო დ2-ში აღსაზევებლად „ვანის“ წინააღმდეგობა აქვს დასაძლევი.

შერკინების მწვრთნელის, ვიქტორ დიდებულიძის და მორაგბეების - ვახტანგ ახობაძის, დავით აშვეთიას, ხვიჩა ბუჯიაშვილისა და დავით დადუნაშვილის გუნდს სტუმრად მოუწია თამაში. „მასიმ“ პირველი ტაიმი მაღალ დონეზე ჩაატარა და 25 წუთის შემდეგ ორი ჯარიმით და ლელოთი 11:0 იგებდა, ხოლო ტაიმი 8-ქულიანი უპირატესობით დაასრულა - 14:6. მეორე ტაიმი „ნევერის“ ჯარიმით დაიწყო, რაზეც სტუმრებმა 75-ე წუთზე ჯარიმითვე უპასუხეს და მართალია ბოლოში ლელო გაუშვეს, მაგრამ გამარჯვებულები დარჩნენ - 17:14.

განვლილი მატჩი სასტარტო შემადგენლობაში დაიწყეს ბურჯებმა დადუნაშვილმა და ახობაძემ. ისინი 70-ე წუთზე შეცვალეს და ამ დროს თამაშში კიდევ ერთი ქართველი ბურჯი, აშვეთია ჩაერთო. ნახევარფინალის პირველ მატჩში „მასი“ 8 მაისს „ვანს“ უმასპინძლებს, ხოლო განმეორებითი შეხვედრა 15 მაისს სტუმრად ექნება და თუ ეს ეტაპიც გადალახა, ელიტა 2-ში დაბრუნდება.

თორნიკე ლომიძისა და ილია კაიკაციშვილის „ოში“ „ბურგ ენ ბრესს“ ქართველი ლეგიონერების გარეშე ეწვია და 14:15 დამარცხდა. სტუმართა 9 ნომერი 34-ე წუთზე წითელი ბარათით დაისაჯა, ამ დროს „ოში“ 0:12 ჩამორჩა და რთულ სიტუაციაში აღმოჩნდა. ტაიმის მიწურულს მათ კიდევ ერთი ჯარიმა მიიღეს, მეორე ტაიმის მიწურულს კი, სტუმართა მონდომებამ შედეგი გამოიღო, 69-ე და 79-ე წუთებზე ორი ლელო დადეს და გარდასახვებიც ზუსტი იყო, მაგრამ მეტის მისაღწევად უბრალოდ დრო აღარ დარჩა.

ამრიგად, ფედერალ 1-ის მეორე ნახევარფინალურ წყვილში შალვა სუთიაშვილის, საბა ქართველიშვილის და ლაშა თავბერიძის „ანგულემის“ მეტოქე „ბურგ ენ ბრესი“ იქნება. „ანგულემი“ პირველ ეტაპზე ისვენებდა და მეტოქეს სწორედ ორრაუნდიან ნახევარფინალში ელოდა.

ზურა ქსოვრელი