საფრანგეთის ნაციონალური ლიგის, LNR-ის [რომელიც ტოპ 14-ისა და პრო დ2-ის ჩატარებაზეა პასუხისმგებელი] პრეზიდენტი პოლ გოზი ტოპ 14-ის შეკვეცის და მასში მონაწილე გუნდების 12-მდე შემცირების წინააღმდეგია.

ქვეყნის ეროვნული გუნდის მსოფლიო თასზე და ექვს ერზე წარუმატებელი გამოსვლის შემდეგ, ქვეყანაში გამოსავლის ძიება დაიწყეს და გუნდებში ლეგიონერების შემცირების შემდეგ, ტოპ 14-ში მონაწილეთა რაოდენობის შემცირებას მიადგნენ. ყოველ შემთხვევაში, ასეთია LNR-ის ტექნიკური და საფრანგეთის რაგბის კავშირის გაერთიანებული კომიტეტის რეკომენდაცია.

„შესაძლოა, შორეულ პერსპექტივაში ეს შესაძლებელი გახდეს, მაგრამ ამჟამად მას უპირატეს ვარიანტად არც კი განვიხილავთ. ტოპ 12 საფრანგეთის ნაკრების პრობლემებს ვერ მოაგვარებს“ - აღნიშნა გოზიმ და მიანიშნა, რომ მინიმუმ 2019 წლამდე შემცირებაზე საუბარიც კი არ იქნება.

ზურა ქსოვრელი