საქართველოს მორაგბეთა ეროვნული ნაკრები, თბილისს აქამდე ნასტუმრები გუნდთაგან ყველაზე ძლიერ მეტოქეს, არგენტინის "იაგუარებს" დაუხვდება და მისი ძლევით გასული წლის ნოემბერში შოტლანდიის A ნაკრებთან და მიმდინარე წლის ზაფხულში "ჩერჩილის" თასზე" წარუმატებლობით შელახული რეპუტაციის აღდგენას ეცდება.
ქართული რაგბის 50 წლისთავისადმი მიძღვნილი შეხვედრა, 14 ნოემბერს ბორის პაიჭაძის სახელობის ეროვნულ სტადიონზე 16:15 საათზე დაიწყება და გულშემატკივარს მასზე დასწრება უფასოდ შეეძლება. "ოღონდ მოვიდნენ და მხარი დაგვიჭირონ, ჩვენ კი მათ გასახარებლად სრულად დავიხარჯებით" - ასეთი განწყობაა "ბორჯღალოსანთა" რიგებში და იმედია, ამ ღირშესანიშნავ დღეს ქართველ მორაგბეებს მხარდამჭერები მართლაც არ დააკლდებათ. ამისათვის ხომ სერიოზული წინაპირობაა შექმნილი - ქართულ რაგბს 50 წელი შეუსრულდა, დამოუკიდებელი ქართული რაგბის არსებობიდან (საბჭოთა რაგბიდან განცალკევებისგან) 20 წელი გავიდა, თბილისს უძლიერესი გუნდი ეწვია (აქამდე თბილისს ძლიერ გუნდთაგან სამხრეთ აფრიკისა და საფრანგეთის A ნაკრებები წვევიან, რომელთაც, დღევანდელი მონაცემით, არგენტინის A ნაკრები ("იაგუარები") სჯობნის).
მწვრთნელებმა ძირითადი და სათადარიგო მორაგბეები უკვე ჩამოწერეს. ტიმ ლეინმა სასტარტო შემადგენლობა ერთიანად საფრანგეთში მოასპარეზე მორაგბეებით დააკომპლექტა. რაც შეეხება მეტოქეს, არგენტინელების შერკინების პირველ ხაზს სრულად ლეგიონერები შეადგენენ, მთლიანობაში კი, 22-კაციან განაცხადში სულ 2 მორაგბეა ისეთი, რომელთაც ეროვნულ გუნდში აქამდე არ უთამაშიათ, დანარჩენებს კი "პუმების" რიგებში გარკვეული რაოდენობის მატჩები ჩატარებული აქვთ. მათგან 4 (მიგელ ავრამოვიჩი, ტომას დე ვედია, ალვარო ტეხედა და პაბლო ხენი) ეროვნული გუნდის წევრად ახლაც ითვლება, დანარჩენები კი უახლოესი რეზერვია და ბობოლა სარაგბო ქვეყნების წინააღმდეგ სათამაშოდ ნებისმიერ წამს მზად უნდა იყვნენ, რასაც A ნაკრებში თამაში და საერთაშორისო გამოცდილების მიღება ემსახურება.
მატჩის წინა დღეს გუნდებმა ტრადიციულად, მომავალ “ბრძოლის ველზე”, ამჯერად "ბორის პაიჭაძეზე" ივარჯიშეს, ოღონდ არგენტინელებს დახურული ვარჯიში ჰქონდათ. "ბორჯღალოსნებმა" სრული შემადგენლობით ივარჯიშეს და მას გუნდის კაპიტანი ირაკლი აბუსერიძე უძღვებოდა, ლეინი კი მზადებას შორიდან აკვირდებოდა და შიგადაშიგ მითითებებს აძლევდა. აბუსერიძემ თანაგუნდელებს სხვადასხვა სიტუაციებიდან კომბინაციების წარმართვა გაამეორებინა და აქცენტი შეტევათა მიმართულებების ცვლაზე გაკეთდა. ერთადერთი, ვინც სრულად ვერ დაიტვირთა მალხაზ ურჯუკაშვილია, რომელსაც კუნთები აწუხებს პერიოდულად მას ჯონი ნამუ ფიზიოთერაპიის კურსს უტარებდა.
პრესკონფერენციამდე "მსოფლიო სპორტი" გია ნიჟარაძეს არგენტინელი "იაგუარების" თბილისში ჩამოსვლის დაყოლიებაზე დაეკითხა.
გია ნიჟარაძე: "არგენტინელების თბილისში სტუმრობა, დუბაიში, 7-კაცა მსოფლიოს ჩემპიონატზე გადაწყდა. დღეს დავხვდი არგენტინის რაგბის კავშირის პრეზიდენტს, რომელთანაც კარგი ურთიერთობა მაქვს. სხვათა შორის, დუბაის მსოფლიო თასზე მას საკუთარი ნაკრების წარმატების იმედი არ ჰქონდა, მაგრამ როდესაც ეს ბიჭები ვარჯიშზე ვნახე მასთან სანაძლეო დავდე, რომ ფინალში გავიდოდნენ. პირობა "იაგუარების" თბილისში ჩამოყვანა იყო და მანაც დანაპირები შეასრულა. რა თქმა უნდა, ძირითადი მიზეზი ეს არ ყოფილა. 2007 წლის მსოფლიო ჩემპიონატის შემდეგ, სადაც არგენტინას დიდი წინააღმდეგობა გავუწიეთ, ამ ქვეყანაში ქართულ რაგბს დიდ პატივს სცემენ. არგენტინელთაგან ბევრი საფრანგეთში თამაშობს და ჩვენი ნაკრების წევრებს კარგად იცნობენ. კეთილ ნებასთან ერთად, პრაგმატული გათვლაც იყო - 2012 წლიდან არგენტინის ნაკრები "სამ ერს" შეუერთდება და "იაგუარების" ამ ფორმაციის ნაკრების შექმნა მომავალი თამაშებისათვის კარგი ნაკადის მოძიებაა. მჯერა, რომ კარგი თამაში იქნება და მოვუწოდებ გულშემატკივარს, მოვიდეს სტადიონზე და საქართველოს ნაკრებს მხარი დაუჭიროს".
საქართველოს ნაკრების ავსტრალიელი მთავარი მწვრთნელი ტიმ ლეინი, გუნდის შემადგენლობით კმაყოფილია და იმედოვნებს, რომ "ბორჯღალოსნები", "ჩერჩილის თასზე" ნაწილობრივ შელახულ რეპუტაციას არგენტინელთა ძლევით აღიდგენენ.
ტიმ ლეინი: "ქართული რაგბის 50 წლის იუბილეა და ამ შეხვედრას უაღრესად დიდ მნიშვნელობას ვანიჭებ. ვიმედოვნებ, მაყურებელი მხურვალედ დაგვიჭერს მხარს. ვითამაშებთ იმ სტილით, რასაც ბოლო 2 წლის განმავლობაში ვამუშავებდით. "ჩერჩილის თასის" შემდეგ ამ მატჩს ოპტიმისტურად ვუყურებ და მჯერა, რომ კარგ თამაშს ვაჩვენებთ, რადგანაც თითქმის ყველა ძლიერი მორაგბე გვყავს გამოძახებული. მხოლოდ დავით ზირაქაშვილი და ირაკლი გიორგაძე მოვისაკლისეთ. მართალია, მოსამზადებლად ცოტა დრო გვქონდა, მაგრამ ჩემი შეგირდებისგან კარგ თამაშს ველი. უდიდესი ტრადიციების მქონე ქვეყნის ნაკრები ჩამოვიდა, რომელიც გაშლილ რაგბს ანიჭებს უპირატესობას. ასე რომ, თამაში სწრაფი, დაძაბული და საინტერესო უნდა გამოვიდეს".
"ჩერჩილის თასზე" ნაჩვენები ცუდი თამაშისა და შედეგის შემდეგ, რეპუტაციის აღდგენის ეიმედება საქართველოს ნაკრების უკანახაზელ დავით კაჭარავასაც.
დავით კაჭარავა: "არგენტინასთან თამაში დიდი ზეიმი იქნება. "ჩერჩილის თასის" შემდეგ, ქართული რაგბის მიმართ შეხედულება შეიცვალა და ხვალინდელი გამარჯვებით ყველა უნდა ავალაპარაკოთ, რომ უკეთ თამაში შეგვიძლია. იმედია, სტადიონზე მაყურებელი მრავლად მოვა. ჩვენ კი 100 პროცენტით დავიხარჯებით და მათ გახარებას შევეცდებით".
მომავალი მატჩის მნიშვნელობაზე არგენტინელი "იაგუარების" მთავარმა მწვრთნელმა ხოსე ორენგომაც ისაუბრა:
ხოსე ორენგო: "მადლობა საქართველოს რაგბის კავშირს საიუბილეო თამაშზე მოწვევისა და ასეთი ტურნეს მოწყობისთვის. გუნდის 90 პროცენტს ახალგაზრდა, პროფესიონალი და ნახევრადპროფესიონალი მორაგბეები შეადგენენ. ჩვენი მიზანია, მოთამაშეებმა საერთაშორისო დონეზე თამაშის გამოცდილება მიიღონ და დაამტკიცონ, რომ განვითარების პერსპექტივა აქვთ. ამავე მიზნით დავიმატეთ ლეგიონერებიც. ჩვენი გუნდის 4 მორაგბე ეროვნული ნაკრების უცვლელი წევრია, დანარჩენებს კი ნებისმიერ დროს შეუძლიათ იქ მოხვედრა".
აქვე გეტყვით, რომ საქართველოს ეროვნული ნაკრები, მომავალ კვირაში იტალიაში გაემგზავრება და ქალაქ პალმანოვაში 20 ნოემბერს ამ ქვეყნის A ნაკრებს შეხვდება. იმის გამო, რომ ლეგიონერთა ნაწილი საკუთარ კლუბებს დროულად უნდა დაუბრუნდნენ, აპენინის ნახევარკუნძულს "ბორჯღალოსნები" სახეშეცვლილი შემადგენლობით ეწვევიან, მანამდე კი მათი თითქმის უძლიერესი შემადგენლობა "იაგუარების" მოთვინიერებას შეეცდება.

14 ნოემბერი. თბილისი. "ბორის პაიჭაძე" (16:15 საათი)
საქართველო - იაგუარები (არგენტინა A)
საქართველო: 15. მერაბ კვირიკაშვილი ("ფიჟაკი", საფრანგეთი, 36 კეპი), 14. მალხაზ ურჯუკაშვილი ("ფიჟაკი", საფრანგეთი, 58), 13. დავით კაჭარავა ("ნიცა", საფრანგეთი, 29), 12. თედო ზიბზიბაძე ("პერიგო", საფრანგეთი, 41), 11. ირაკლი მაჩხანელი ("სენტ ეტიენი", საფრანგეთი, 34), 10. ლაშა მალაღურაძე ("ბეზიე", საფრანგეთი, 18), 9. ირაკლი აბუსერიძე ("ოსერი", საფრანგეთი, ნაკრების კაპიტანი, 59); 1. დავით ხინჩაგიშვილი ("ბრივი", საფრანგეთი, 23), 2. აქვსენტი გიორგაძე ("კასტრი", საფრანგეთი, 54), 3. გოდერძი შველიძე ("მონტობანი", საფრანგეთი, 51), 4. გიორგი ნემსაძე ("მასი", საფრანგეთი, 10), 5. ილია ზედგინიძე ("კარკერედნიერი", საფრანგეთი, 53), 6. გია ლაბაძე ("მერსეი-ვიტროლი", საფრანგეთი, 55), 7. გიორგი ჩხაიძე ("მონპელიე", საფრანგეთი, 34), 8. მამუკა გორგოძე ("მონპელიე", საფრანგეთი, 34).
სათადარიგოები: 16. ირაკლი ნატრიაშვილი ("ფარულ კონსტანცა", რუმინეთი, 20), 17. დავით ქუბრიაშვილი ("ტულონი", საფრანგეთი, 9), 18. ლევან დათუნაშვილი ("ორიაკი", საფრანგეთი, 29), 19. რატი ურუშაძე ("ენისეი-სტმ", რუსეთი, 39), 20. ბიძინა სამხარაძე ("ფარულ კონსტანცა", რუმინეთი, 40), 21. რევაზ გიგაური ("სენაკი", საფრანგეთი, 24), 22. ალექსანდრე თოდუა ("ლელო", თბილისი, 12).
მწვრთნელი: ტიმ ლეინი
ფიზმომზადების მწვრთნელი: ჯონი ნამუ

იაგუარები: 15. მარტინ ბუსტოს მოიანო ("კორდობა ატლეტიკი", არგენტინა, 5 კეპი), 14. ველისარიო აგულია ("ინდუა", არგენტინა, 5), 13. მიგელ ავრამოვიჩი ("ასოსიასიონ ალუმნი", არგენტინა, 15), 12. მატიას ვიასო ("ბურგუენი", საფრანგეთი, 3), 11. ტომას დე ვედია (შ.I.ჩ. არგენტინა, 9), 10. იგნასიო მიერესი ("სტად ფრანსე", საფრანგეთი, 7), 9. მარტინ ლანდხარო (ჩ.A.შ.I. არგენტინა, 6); 1. პაბლო ხენი ("ბრივი", საფრანგეთი, 10), 2. ალვარო ტეხედა ("ოვერმახ პარმა", იტალია, 3), 3. ხუან გომესი ("ლიდსი კარნეგი", ინგლისი, 13), 4. ტომას როანი ("ლა პლატა", არგენტინა, 5), 5. მარიანო გალარსა ("უნივერსიტარიო დე ლა პლატა, არგენტინა, 7), 6. იგნასიო პასმანი ("ჩამპანიატი", არგენტინა, 2), 7. როდრიგო ბრუნო ("ხოკეი დე ვილია მარია", არგენტინა, 6), 8. ლეონარდო სენატორე (G.E.ღ. არგენტინა, კაპიტანი, 10).
სათადარიგოები: 16. მატიას კორტესი ("ლისეო", არგენტინა, 2), 17. ნაუელ ტეტას ჩაპარო ("ლა პლატა", არგენტინა, 0), 18. უგო შიერანო ("ტალა", არგენტინა, 0), 19. აგუსტინ გუსმანი ("ტუკუმანი", არგენტინა, 7), 20. ფრანსისკო ალვარასინი ("ლა პლატა", არგენტინა, 5), 21. სანტიაგო გონსალეს იგლესიასი ("ასოსიასიონ ალუმნი", არგენტინა, 2), 22. ფრანსისკო ხოსე მერელიო ("რეგეტას დე ველია ვისტა", არგენტინა, 12).
მწვრთნელი: ხოსე ორენგო
ფიზმომზადების მწვრთნელი: ხორხე რუისი

ზურა ქსოვრელი