საქართველოს მორაგბეთა A ნაკრებმა, უკრაინის ეროვნული გუნდი 26:10 კი დაამარცხა, მაგრამ მათმა თამაშმა ცხადყო, რომ ამ გუნდში და ზოგადად ქართულ რაგბში, უდიდესი სამუშაოა გასაწევი, რათა პირველმა ნაკრებმა ღირსეული შეცვლა მიიღოს და საკუთარი წარმატებით მომავალშიც გაახაროს ქართველი გულშემატკივარი.
უკრაინა საქართველოს სხვადასხვა მიზეზების გამო შესუსტებული შემადგენლობით ეწვია, თუმცა, პირველივე წუთებიდან ცხადლივ გამოჩნდა, რომ ის ერთი კვირის წინ განადგურებული პოლონეთის ეროვნულ გუნდზე ძლიერი იყო. ისინი ბევრად უფრო სწრაფები, განსწავლულები იყვნენ და ბოჭვებზე უკეთ თამაშობდნენ, რასაც ქართველი მორაგბეები აშკარად არ ელოდნენ, რასაც ისიც დაერთო, რომ საწყის წუთებში მათ თამაში ვერ დაალაგეს და პირველმა 15-მა წუთმა ქართველთა ნახევარზე ჩაიარა. უკრაინელებს ფეხით გადაჰქონდათ ბურთი მასპინძელთა ნახევარზე და აგრესიული დაცვით მათ წინ წაწევის საშუალებას არ აძლევდნენ.
მალე უკრაინელებმა ჯარიმის შესრულების უფლება მოიპოვეს, მაგრამ ტიურიკოვმა 45 მეტრიდან კარს ააცილა, მერე კი ცერკოვნის საშუალო მანძილიდან არეკნი არ გამოუვიდა. ამის შემდეგ უპირატესობა ქართველებმა იგდეს ხელთ და რამდენჯერმე კარგად გაჭრეს მეტოქის დაცვის ხაზი. ჯერ ჯიმშელაძემ იყოჩაღა, მაგრამ მას მხარი ვერ აუბეს, მერე ასეიშვილმა ისარგებლა მომენტით და უკრაინელებმა ჩათვლის მოედნიდან ორიოდე მეტრში შებოჭეს, ამას რამდენიმე დაჯახება და მოლის აგორება მოყვა, რის შემდეგაც სტუმრები დაჯარიმდნენ. რადგან ანგარიში 0:0 იყო, ყიასაშვილმა ჯარიმა კარში დაარტყა და 21-ე წუთზე ანგარიში გახსნა. კიდევ 5 წუთში ყიასაშვილს მეორედ მიეცა ჯარიმის შესრულების შესაძლებლობა და სხვაობა 6 ქულამდე გაზარდა, კიდევ 5 წუთში კი მანვე კარის გასწვრივ დაახლოებით 40 მეტრიდან ერთხელაც ზუსტად დაარტყა (9:0).
მთლიანობაში, საქართველოს ნაკრებმა პირველი ტაიმის ბოლო 25 წუთი კარგად ჩაატარა, თუმცა 33-ე წუთზე უკრაინელებმა ერთი ჯარიმის გატანა მაინც მოახერხეს, მაგრამ ქართველმა მორაგბეებმა ჯარიმის კარში დარტყმა აღარ ისურვეს, ტაიმის ბოლოს მოლით დაახლოებით 25 მეტრი დაფარეს და უკრაინას ლელო გაუტანეს, ყიასაშვილის ზუსტი რეალიზაციის შემდეგ კი ტაიმი 16:3 დასრულდა, რადგანაც მსაჯის მიერ დამატებულ წუთებზე ტიურიკოვს კიდევ ერთი ჯარიმა გაუფუჭდა.
მეორე ნახევარმა სრულად სტუმართა უპირატესობით ჩაიარა და ოდნავ უკეთ რომ ეთამაშათ, სხვაობაც უცილობლად შემცირდებოდა, მაგრამ ჯერ ტიურიკოვს ჯარიმა გაუფუჭდა, ცერკოვნის ფეხით გადაკიდების შემდეგ კი, მისიკი, კოლიშკინი და გარკავი ყიასაშვილისა და ჩხიკვაძის წინააღმდეგ დარჩნენ, თუმცა რიცხობრივი უპირატესობა ვერ გამოიყენეს და დაზღვევაზე გადასულმა გეგენავამ გარდაუვალი ლელოსგან ჯარიმის ხარჯზე გვიხსნა. სტუმრებმა უპირატესობა იგრძნეს და ჯარიმა კარში არ დაარტყეს, შეტევა მიძალებით გაგრძელდა, ბოლოს ცერკოვნიმ ბურთი ფეხით მარჯვენა ფლანგზე გადაკიდა, სადაც ერთბაშად 3 უკრაინელი ერთი ქართველის წინააღმდეგ დარჩა, თუმცა სტუმრებმა ბურთის შემაგრება ვერ შეძლეს და სიტუაცია დროებით განიმუხტა. მეორე ტაიმის 30-მა წუთმა ლამის სრულად საქართველოს ნახევარზე განვლო და უკრაინელები ქართველთა 22 მეტრში საკმაოდ დიდი ხნით ყოვნდებოდნენ. ტურიკოვს ჯარიმა კიდევ ერთხელ გაუფუჭდა, ქართველებმა კი ამ ეპიზოდში მხოლოდ ერთხელ მოახერხეს ცენტრალური ხაზის გადაკვეთა და ყიასაშვილმა არეკნი კარს ააცილა.
67-ე წუთზე სტუმართა აქტიურობა ლოგიკურად დასრულდა. ხმალაძემ საკუთარი 22-დან ფეხით ქვეშ გაგორებით სცადა ბურთის გამოტანა, მაგრამ მეტოქე ჩანაფიქრს მიუხვდა, ბურთი მარცხენა ფლანგზე ჩაათამაშა და ტურიკოვმა ზედ ალამთან ლელო გაიტანა, რეალიზაციაც თავადვე შეასრულა და სხვაობა 6 ქულამდე დაიყვანა (10:16). დასკვნით 10 წუთში მასპინძლებმა იძალეს, მეტოქეს მოლით შეუტიეს და მეტოქეს დაჯარიმება აიძულეს, რომელიც ყიასაშვილმა გამოიყენა. ქართველთა შეტევა ამის შემდეგაც გაგრძელდა, ახლა უკვე ჯარიმა აუტში გაიტანეს და ლელოზე ითამაშეს, მიძალების შემდეგ ხმალაძემ ბურთი ფეხით მეტოქის ჩათვლის მოედანში შეაგორა, მას ჩხიკვაძე შეჰყვა და სტუმრებს მეორე ლელო უძღვნა, ყიასაშვილმა კი ეს რეალიზაციაც გამოიყენა და საბოლოო ანგარიში დააფიქსირა.

მატჩისშემდგომი პრესკონფერენცია
ვალერი კოჩანოვი: “უპირველესად მადლობას გეტყვით ამ დიდ ზეიმზე მოწვევისთვის. სამწუხაროდ, თბილისს უძლიერესი შემადგენლობით ვერ ვეწვიეთ, რადგანაც ოდესის “კრედო” საფრანგეთში მიემგზავრება შეკრებაზე, სხვა ძლიერი გუნდი ჩვენს ქვეყანაში ხარკოვის “ოლიმპიაა” და ნაკრების ბირთვსაც ეს კლუბი წარმოადგენდა. თქვენს ქვეყანაში რაგბს უფრო დიდი ყურადღება ექცევა ვიდრე უკრაინაში და რესურსი არ გვყოფნის, ამ შეხვედრაში კი რამდენიმე ახალბედა გამოვცადეთ. რაიმე კონკრეტულ გეგმას არ ვისახავდით, უბრალოდ გაშლილი რაგბის თამაში გვსურდა, მაგრამ, სამწუხაროდ თამაშის სანახაობრივი მხარე მაინცდამაინც კარგი არ გამოვიდა. საქართველოს მსოფლიოში ერთ-ერთი ძლიერი ნაკრები ჰყავს და ეს დღესაც დამტკიცდა”.
ლევან მაისაშვილი: “საქართველოს A ნაკრებმა სულ მეორე თამაში ჩაატარა და გუნდი ფორმირების პროცესშია. ძალიან დიდი იყო ტექნიკური წუნი. ყველამ ნახა, რომ უკრაინის გუნდი პოლონეთისას ბევრად ჯობდა, დიდ წინააღმდეგობას წავაწყდით, რაღაც მომენტში, მორაგბეთა მხრიდან მეტოქის შეუფასებლობასაც ჰქონდა ადგილი და ჩანაფიქრის განხორციელება არ გამოგვივიდა. გვსურდა ყველა გამოძახებული მორაგბისთვის მიგვეცა თავის გამოჩენის შანსი და შეუთამაშებლობაც სახეზე იყო. ამ მორაგბეთაგან, ზოგი ეროვნულ გუნდს იტალიაში გაყვება ადგილობრივი ქვეყნის A ნაკრებთან სათამაშოდ, მაგრამ მათ ვინაობას ამ ეტაპზე ვერ დაგისახელებთ”.
ნიკოლოზ ჭავჭავაძე: “მოდით პირდაპირ ვთქვათ, რომ სპორტსმენებმა მიცემული დავალებები ვერ შეასრულეს. გვსურდა, რომ გაშლილი რაგბი გვეთამაშა, მაგრამ ღია თამაშში ვერ ვივარგეთ. მომავალ წელს, სავარაუდოდ, სამ ამხანაგურ შეხვედრას გავმართავთ, მაგრამ ვისთან და როდის ეს ჯერ უცნობია”.

თბილისი. “ბორის პაიჭაძე” ( 4 000)
საქართველო A - უკრაინა 26:10
საქართველო A: 15. ირაკლი ყიასაშვილი, 14, ირაკლი ჩხიკვაძე, 13. გიგა კორკელია, 12. გიორგი ჯიმშელაძე (24. ბექა წიკლაური 71), 11. ირაკლი გეგენავა (22. სანდრო ნიჟარაძე 59), 10. ლაშა ხმალაძე, 9. გიორგი კაჭარავა; 1. კარლენ ასეიშვილი, 2. ჯაბა ბრეგვაძე (16. ირაკლი ჭყონია 48), 3. ვასილ კაკოვინი (18. დაჩი ყუფარაძე 41), 4. ილია სურგულაძე (26. დავით ლოსაბერიძე 56), 5. კახა უჩავა (23. შოთა საყვარელიძე 41), 6. ლაშა თავართქილაძე (19. ზვიად მაისურაძე 48), 7. ვიტო კოლელიშვილი, 8. ბესიკ უდესიანი (კაპიტანი).
2 ლელო: ბრეგვაძე, ჩხიკვაძე
2 გარდასახვა: ყიასაშვილი
4 ჯარიმა: ყიასაშვილი
მწვრთნელები: ლევან მაისაშვილი, ნიკოლოზ ჭავჭავაძე
უკრაინა: 15. მაქსიმ ტიურიკოვი (იგორ სნისარენკო 69), 14. ოლეგ კარასოვი, 13. სერგეი გარკავი, 12. ვადიმ კოლიშკინი, 11. ვადიმ მისიკი (სერგეი იანჩი 53), 10. სერგეი ცერკოვნი, 9. მაქსიმ კრავჩენკო; 1. სერგეი სუხიხი, 2. ნიკოლაი კირსანოვი (ალექსანდრ კიშინევი 53), 3. ოლეგ ლიტვინენკო, 4. ვიაჩესლავ კრასილნიკი, 5. ალექსეი ცაპენკო, 6. ჯაბა მალაღურაძე (ალექსეი ზატოვი 53), 7. ალექსანდრ ლომაკინი (დიმიტრი მუხინი 41), 8. ანდრეი მელნიკოვი.
ლელო: ტიურიკოვი
გარდასახვა: ტიურიკოვი
ჯარიმა: ტიურიკოვი
მწვრთნელი: ვალერი კოჩანოვი

ზურა ქსოვრელი