საქართველოს მორაგბეთა ეროვნულმა ნაკრებმა, ქართული რაგბის 50 წლის იუბილე არგენტინის A ნაკრების ძლევით აღნიშნა და მსოფლიოს დაანახა, რომ “ბორჯღალოსანთა” მიერ ზაფხულში ნაჩვენები თამაში, როდესაც ისინი “ჩერჩილის თასზე” წარუმატებლად გამოვიდნენ, სხვადასხვა მიზეზებმა განაპირობეს.
“იაგუარები” (არგენტინის A ნაკრების თიკუნი) მსოფლიოში ერთ-ერთი ყველაზე ძლიერი ნაკრებია. არგენტინის ეროვნულმა გუნდმა (“პუმები”), მსოფლიოს 2007 წლის ჩემპიონატზე მე-3 ადგილი დაიკავა, რეიტინგში მუდამ მაღალ საფეხურზე იმყოფება, მათი სიძლიერის დასტურად კი, ისიც გამოდგება, რომ “სამი ერის” ორგანიზატორებმა გათამაშების გაფართოება გადაწყვიტეს და 2012 წლიდან, მსოფლიოს სამ უძლიერეს ნაკრებს - სამხრეთ აფრიკას, ახალ ზელანდიას და ავსტრალიას, “პუმებიც” შეუერთდებიან და ტურნირი “ოთხ ერად” გადაკეთდება. სწორედ ეროვნული გუნდის კანდიდატების შემოწმებას ისახავს მიზნად “იაგუარების” ამ ფორმაციის ნაკრების ჩამოყალიბება.
თბილისს ასეთი ძლიერი გუნდი აქამდე არასდროს სწვევია. არგენტინელთა რიგებში, 22-კაციან განაცხადში, მხოლოდ 2 იყო ისეთი მორაგბე, რომელსაც ეროვნული გუნდის მაისური აქამდე არ მოერგო, დანარჩენებს კი სხვადასხვა რაოდენობის კეპი აქვთ დაგროვილი. “იაგუარები” კანადისა თუ ამერიკის შეერთებული შტატების ეროვნულ ნაკრებებთან ხშირად თამაშობენ და უმეტესად გამარჯვებულნი რჩებიან. საქართველოს რაგბის კავშირის ძალისხმევამ შედეგი მოიტანა და ასეთი სიძლიერის ნაკრებმა ევროპული ტურნე სწორედ საქართველოდან დაიწყო.
არგენტინელები რომ სერიოზულად იყვნენ განწყობილნი, იქიდანაც ჩანს, რომ ისინი თბილისს თამაშამდე ლამის ერთი კვირით ადრე ეწვივნენ, ბანაკი სასტუმრო “რედისონში” დასცეს და მომავალი ჯახისათვის სრულფასოვნად მოემზადნენ. სტუმართა საბრძოლო განწყობა უშუალოდ თამაშის მსვლელობისას კიდევ ერთხელ გამოჩნდა, სულ ბოლოს კი, მარცხით გამოწვეული მათი გულისტკივილი მორაგბეთა და მწვრთნელთა მოწყენილ სახეებზე აისახა.
საქართველოს ნაკრების წინაშე სულ სხვა ამოცანა იდგა. გუნდის ავსტრალიელმა დამრიგებელმა, ტიმ ლეინმა, “იაგუართა” დასახვედრად, ლამის უძლიერესი შემადგენლობა შეკრიბა. მხოლოდ შერკინების პირველხაზელი დავით ზირაქაშვილი და უკანახაზელი ირაკლი გიორგაძე მოისაკლისა. მატჩამდე მწვრთნელები და მორაგბეები ერთხმად აღნიშნავდნენ, რომ მათი მიზანი ქართული რაგბის სიძლიერისადმი ბოლო დროს შეცვლილი დამოკიდებულის შეცვლა იყო. 2007 წლის საფრანგეთის მსოფლიო თასზე ნაჩვენები მძლავრი თამაშის შემდეგ, “ბორჯღალოსანთა” შესუსტებული შემადგენლობა გასული წლის ნოემბერში ჯერ შოტლანდიაში, ამ ქვეყნის A ნაკრებთან შერცხვა, მერე კი, მიმდინარე წლის ზაფხულში “ჩერჩილის თასზე” ლამის ძირითადი შემადგენლობის გარეშე გამოვიდა და იქაც უდიდესი იმედგაცრუება ელოდა.
სწორედ ამ მარცხის შემდეგ, მსოფლიო რაგბის მამებს გაუჩნდათ აზრი, რომ ქართული რაგბი უმაღლესი დონის სულაც არ იყო და მათ წინანდელ წარმატებებს ცოტა არ იყოს ალმაცერად უყურებდნენ. თუმცა, “ბორჯღალოსნებმა”, იუბილეს გამარჯვებით აღნიშვნასთან ერთად, მათ დაანახეს, რომ ქართველისთვის რაგბი სისხლხორციელი თამაშია. ქა¬რ-თველებმა მსოფლიოს მასშტაბით დაიბრუნეს პრესტიჟი და ეს მხოლოდ ანგარიშიდან გამომდინარე არაა. ვინც საქართველოსა და “იაგუარების” პირველ ტაიმს უყურა, ამაში უცილობლად დარწმუნდებოდა, აი მე-2 ტაიმში კი, მეტოქემ აშკარად იძალა, მაგრამ დიდი ძალისხმევისა და თავდადების ხარჯზე, გამარჯვება მაინც ქართველ მორაგბეებს დარჩათ.
დიახ, “ბორჯღალოსნებმა” არგენტინელთა წინააღმდეგ ორი განსხვავებული ტაიმი ჩაატარეს. პირველ ნახევარში მასპინძლები ლამის იდეალურად თამაშობდნენ, მაყურებელმაც უმაღლესი დონის, სწრაფი, კომბინაციებით დახუნძლული რაგბი იხილა, “ბორჯღალოსანთა” უკანა ხაზმა აჩვენა ის, რასაც მისგან მწვრთნელები და გულშემატკივრები ელიან და ეს ყველაფერი ანგარიშზეც აისახა. მე-2 ტაიმში სიტუაცია შეიცვალა, ახლა უკვე არგენტინის ნაკრებმა იძალა, ქართველებს კი მხოლოდ ანგარიშის შენარჩუნებაზე უწევდათ ზრუნვა. ამას ობიექტური და სუბიექტური მიზეზები ჰქონდა - რეფერიმ ქართველები მოედანზე ორჯერ დატოვა 10-10 წუთით კაცნაკლული და არგენტინელთა ძლიერმა გუნდმაც რიცხობრივი უპირატესობის გამოყენება მოახერხა. ისე, სამართლიანობა მოითხოვს აღინიშნოს, რომ დროის ამ მონაკვეთში სტუმრები საგრძნობ უპირატესობას ფლობდნენ და რომ არა მათი შეცდომები და აცილებული ჯარიმები, შესაძლოა, საფინალო სასტვენის შემდეგ ტაბლოზე საქართველოს სასარგებლო შედეგი არც დაფიქსირებულიყო.
მატჩის წინა დღეს გაცხადებულ შემადგენლობაში, ტიმ ლეინს “ძირითადში” ერთი იძულებითი ცვლილების გაკეთება მოუხდა - მალხაზ ურჯუკაშვილმა კუნთების პრობლემები ვერ მოაგვარა და მისი ადგილი ალექსანდრე თოდუამ დაიკავა, სათადარიგოთა სკამზე კი, საქართველოს A ნაკრებიდან ირაკლი ჩხიკვაძე დაწინაურდა.
მიუხედავად ცივი, წვიმიანი ამინდისა, “ბორის პაიჭაძეზე”, ბოლო წლებთან შედარებით, დიდი რაოდენობით მაყურებელმა მოიყარა თავი და თამაში გახურდა.
მატჩის დებიუტი შედეგიანი გამოდგა. მე-2 წუთზე არგენტინელები რაქში არასწორედ შესვლისათვის დაჯარიმდნენ და მერაბ კვირიკაშვილმა, დაახლოებით 45 მეტრიდან, კარისგან ოდნავ მარჯვნიდან ანგარიში გახსნა. შეიყვანეს სტუმრებმა თამაშში ბურთი და ახლა ქართველი მორაგბეებმა დაარღვიეს იგივე წესი, რითაც მარტინ ბუსტოს მოიანომ ისარგებლა და წინასწორობა აღადგინა - 3:3. თანაბარი ანგარიში მხოლოდ ორ წუთს იყო, მერე კი სტუმრები 22 მეტრის ხაზთან დაჯარიმდნენ და “მეკომ” ზუსტი დარტყმით მაყურებელს ტაში კიდევ ერთხელ მოსწყვიტა. ამას ფეხით ბურთის გადაკიდებები მოჰყვა, ქართველთაგან კვირიკაშვილი ურტყამდა, მეტოქის მხრიდან კი მატიას ვიასო აბრუნებდა ბურთს და ორივე გუნდი მეტოქის შეცდომას ელოდა. სტუმრებმა ორჯერ გადაიტანეს კარგად ბურთი აუტში საქართველოს 22 მეტრში და ორივე მათგანი ლაბაძემ მოიგო, რის შემდეგაც სიტუაციის განმუხტვა მოხერხდა. დაახლოებით, 10 წუთი “ბორჯღალოსნებმა” მეტოქის ნახევარზე გადასვლა ვერ შეძლეს. მე-12 წუთზე, ჯარიმის შესრულების უფლება არგენტინელებმა მოიპოვეს, მაგრამ კარის გასწვრივ, დაახლოებით, 37 მეტრიდან, ბუსტოს მოიანოს დარტყმა გაუფუჭდა. თუმცა, ანგარიში მალე მაინც გათანაბრდა - მე-15 წუთზე, მიერესმა, დაახლოებით, 40 მეტრიდან არეკნი დაჰკრა და ანგარიში 6:6 გახდა.
თითქოს ამას ელოდნენო და ქართველი მორაგბეები გააქტიურდნენ. ფეხით გადაკიდებული ბურთი სტუმრებმა პირველად ვერ დაიჭირეს და ხაზის გაჭრის რამდენიმე კარგი მცდელობის შემდეგ, “ბორჯღალოსნებს” ის წინ დაუვარდათ, მაგრამ რეფერიმ უპირატესობა დაგვიბრუნა. ამჯერად, კვირიკაშვილმა ის კარში აღარ დაარტყა და მასპინძლებმა ლელოზე ითამაშეს. აუტიდან მოწოდების შემდეგ კარგი მოლი დადგა, მეტოქე დაჯარიმდა და ისევ აუტი, რასაც კვლავ მოლით მიწოლა მოჰყვა, იქიდან თამაში რაქში გადავიდა, ჩათვლის მოედნიდან დაახლოებით სამ მეტრში ბურთი თედო ზიბზიბაძემ აიტაცა, მცველზე მძლავრად წავიდა, დაჯახებით არგენტინელი გადააქცია და მარცხენა ალამთან ლელო გაიტანა, კვირიკაშვილმა კი, რეალიზაციაც გამოიყენა და ანგარიში 13:6 გახდა.
ახლა უკვე არგენტინელებმა დაიწყეს ლელოზე თამაში, მაგრამ ხისტი ბოჭვებით და რაქში აგრესიული თამაშით, მასპინძლებმა სტუმრებს სალელოვე შეტევის წარმართვის საშუალება არ მისცეს, თუმცა, მათ კარგი ჯარიმის უფლება მოიპოვეს და მოიანომ კარის წინ, 8 მეტრიდან სხვაობა შეამცირა. 7-ქულიანი სხვაობა მალევე აღდგა, როდესაც რეფერიმ უპირატესობა დაგვიბრუნა და 30-ე წუთზე კვირიკაშვილმა შორეული ჯარიმა ზუსტად შეასრულა, მალე კი “ბორჯღალოსნებმა” მეტოქეს მეორე ლელო უძღვნეს. არგენტინელთა ფეხით გადაკიდებული ბურთი საქართველოს ნაკრების უკანახაზელებმა თავის ნახევრიდან კარგად წაიღეს, სწრაფ კომბინაციაში ხაზის თითქმის ყველა მოთამაშემ მიიღო მონაწილეობა, მათ უშეცდომოდ გაიარეს მეტოქის დაცვის ხაზი, მაგრამ ზიბზიბაძეს მიძალება სტუმრებმა ჩათვლის მოედნიდან, დაახლოებით, ხუთ მეტრში შეაჩერეს; აბუსერიძემ რაქიდან სწრაფად აწია ბურთი, სიჩქარეაკრეფილი ხინჩაგიშვილი მოძებნა, რომელმაც თანაგუნდელის დახმარებით “იაგუარების” ბოლო დაცვის ზღუდე გადალახა და ანგარიში 21:9 გახდა, მეკოს კი ამჯერად რეალიზაცია გაუფუჭდა.
პირველი ტაიმის მეორე ნაწილში თამაში, პრაქტიკულად, მეტოქის ნახევარზე მიმდინარეობდა. ქართველი მორაგბეები კარგად ადიოდნენ მათ ნახევარზე და მეტოქეს იქვე ავიწროვებდნენ, მაგრამ 35-ე წუთზე, ამ პერიოდისთვის მათი იშვიათი შეტავა “ბორჯღალოსანთა” დაჯარიმებით დასრულდა და მოიანომ 23 მეტრიდან ჯარიმა ზუსტად შეასრულა. შესვენებამდე უპირატესობას კვლავ ქართველი მორაგბეები ფლობდნენ, ჩხაიძის წამოწყებული შეტევისა და რამდენიმე ფაზის შემდეგ, მალაღურაძემ არეკნი სცადა, მაგრამ დარტყმა გაუფუჭდა და რამდენიმე წამში მორის იონკერმა შესვენება ბრძანა.
შესვენებაზე, “ბორის პაიჭაძის” სარბენ ბილიკზე საბჭოთა კავშირის ჩემპიონატის სამგზის გამარჯვებული, მრავალგზის პრიზიორი და ორჯერ თასის მფლობელი ქუთაისის “აია”-ს ვეტერანი მორაგბეები გამოჩნდნენ, რომელთაც 20 წლის წინათ საკავშირო თასი ბოლოჯერ მოიპოვეს. მათ მისალმებას, ძლიერი წვიმა მოჰყვა, რომელმაც მეორე ნახევარს საკუთარი კვალი დაამჩნია.
არგენტინელებმა ტაქტიკა შეც¬ვალეს და ბურთს ფეხით ახლა უკვე მოკლეზე ჰკიდებდნენ, მერე კი მის დასაუფლებლად იბრძოდნენ. სტუმრებმა სიჩქარეს უმატეს და მასპინძლებმა მათი შეჩერება ჯარიმის ხარჯზე მოახერხეს, რის შედეგადაც მოიანომ 22 მეტრიდან სხვაობის შემცირება მოახერხა. 50-ე წუთზე რეფერიმ ხინჩაგიშვილი გაასინბინა, ძლიერი გუნდები კი მეტოქის კაცნაკლულობით ხშირად სარგებლობენ. მატიას ვისაომ ხაზი გაჭრა, თითქოს ლელოც გარდაუვალი იყო, მაგრამ ქარ¬თველებმა ბოლოსკენ იყოჩაღეს და ის უკნიდან წააქციეს, შეტევის ტემპის ახლიდან განვითარებამდე, უკან დახევა მოასწრეს და “იაგუართა” მიძალება ზედ ხაზთან საბოლოოდ ჩაახშეს. “ბორჯღალოსნებმა”, კაცნაკლულობის მიუხედავად, მე-2 ნახევარში ერთი კარგი შეტევის წარმართვა შეძლეს, ფეხით კარგად აიტანეს ბურთი და 56-ე წუთზე კვირიკაშვილმა 32 მეტრიდან გატანილი ჯარიმით 9-ქულიანი ჰანდიკაპი აღადგინა.
დასკვნითმა 20-მა წუთმა თითქმის სრულად არგენტინელთა შეტევებში ჩაიარა. 67-ე წუთზე, შეცვლაზე შესულ გონსალეს იგლესიასს ჯარიმის გატანის კარგი შესაძლებლობა მიეცა, მაგრამ საბედნიეროდ მიზანმა უმტყუნა, მერე ისევ ვიასომ გაჭრა ხაზი, მაგრამ კვირიკაშვილის მოტყუებას, ან კონტაქტში შესვლას გადაცემის გაკეთება არჩია და ბურთი აბუსერიძეს ჩააბარა, რითაც ასპროცენტიანი ლელოსგან გვიხსნა. ამას ლამის გუნდური ჩხუბი მოჰყვა. რეფერიმ ჩხაიძე დაადანაშაულა და 10 წუთით კვლავ კაცნაკლული დაგვტოვა, იგლესიასმა კი, 25-26 მეტრიდან, ჯარიმა ამჯერადაც არაზუსტად დაარტყა. კაცნაკლული “ბორჯღალოსნები” უდიდესი თავგანწირვით ახერხებდნენ “იაგუართა” შეტევების შეჩერებას. სტუმრები რიცხვობრივ მეტობას იყენებდნენ და ფლანგზე მცველებზე მეტნი რჩებოდნენ, მაგრამ ქართველები მათი მიძალების შეჩერებას გარკვეულ პერიოდამდე ახერხებდნენ. ბოლოსკენ ფიზიკურმა დაღლილობამ იჩინა თავი, არეულ თამაშში მარტინ ლანდხარომ დრო იხელთა და ცენტრში ლელო ლამის დაუბრკოლებლივ გაიტანა, გონსალესმა კი, რეალიზაცია სწრაფადვე გამოიყენა და ანგარიში ორ ქულამდე დაიყვანა.
რეფერის მიერ დამატებულ წუთებიანად, სტუმრებს ანგარიშის სათავისოდ შესაცვლელად, დაახლოებით, 8 წუთი რჩებოდათ, მაგრამ “ბორჯღალოსნებმა” ეს პერიოდი კარგად ჩაატარეს, მეტოქე საკუთარ ნახევარზე ამყოფეს, ბურთი შეინარჩუნეს და დამსახურებული გამარჯვება მოიპოვეს.
მატჩისშემდგომი პრესკონფერენცია
ხოსე ორენგო: “საქართველოში რომ უნდა წამოვსულიყავით “ჩერჩილის თასზე” თამაშისას შევიტყვე. მადლობა ასეთი მასპინძლობისთვის და თამაშისთვის. იმედია, ჩვენი გუნდები მომავალშიც ხშირად ითამაშებენ და ორივე ჩვენგანს გამოცდილების მიღების კარგი შანსი ექნება. უშუალოდ ეს შეხვედრა დაძაბული და საინტერესო გამოდგა, პირველ ტაიმში ფეხით თამაში არ წაგვივიდა, შეცდომები დავუშვით და 2 ლელო მივიღეთ. ბიჭები არ დაიბნენ და მე-2 ნახევარში უკეთ ვითამაშეთ, მაგრამ შეცდომების, ამინდისა და ქართველთა ზეწოლის გამო, გამარჯვება ვეღარ შევძელით”
ლეონარდო სენატორე (“იაგუარების” კაპიტანი): “ისეთი თამაში გამოვიდა, როგორსაც ველოდი. ქართველებმა პირველ ტაიმში შესანიშნავად ითამაშეს, მე-2 ნახევარში კი, კარგი დაცვა დაგვიპირისპირეს. საქართველოში გატარებული კვირით კმაყოფილი ვარ. ჩვენი ევროპული ტურნე შესანიშნავად დაიწყო”.
ტიმ ლეინი: “ქართული რაგბის 50 წლის იუბილეზე მაყურებელმა ბრწყინვალე სპექტაკლი იხილა. მე-2 ტაიმში იგივე თამაშის ჩვენება გვსურდა, რაც პირველ ნახევარში ვაჩვენეთ, მაგრამ ცუდმა ამინდმა და არგენტინელთა აქტიურობამ ამაში ხელი შეგვიშალა. საქართველოს ნაკრებმა შესანიშნავი თამაში აჩვენა და მისი ხარისხი იუბილეს სრულად შეესაბამებოდა. ვიმედოვნებ, რომ ურთიერთობები გაღრმავდება და მსგავსი სიძლიერის გუნდებთან თამაშები ხშირად მოგვიწევს, არგენტინელებთან დაპირისპირებას კი, მსოფლიო თასზეც ველი. მთლიანობაში, განვლილი წლით კმაყოფილი ვარ. “ერთა თასის” მოგების შემდეგ, “ჩერჩილის თასზე” ჩავარდნა გვქონდა, რაც ძირითადი გუნდის მორაგბეთა არყოფნით იყო გამოწვეული. აუცილებელია, რომ საქართველოს ნაკრებს მაღალი დონის 20-30 სარეზერვო მორაგბე ყავდეს და ამ კუთხით უდიდესი სამუშაოა ჩასატარებელი. ნოემბრის გეგმა წარმატებით სრულდება, დასანანი კი ისაა, რომ იტალიის A ნაკრებთან გასამართი მატჩისთვის, რამდენიმე საკვანძო მორაგბე მოგვაკლდება. ჩემი სურვილი იყო, რომ ამ ბიჭებს ერთად რაც შეიძლება დიდი დრო გაეტარებინათ”.
ლეინის განცხადებით, იტალიის A ნაკრებთან 20 ნოემბერს გასამართი მატჩისთვის, მას, სხვადასხვა მიზეზით, დაახლოებით, 6-7 მორაგბე დააკლდება. ტრავმის გამო, ვერ ითამაშებენ ურჯუკაშვილი და დათუნაშვილი. საკუთარ კლუბებს უნდა დაუბრუნდნენ გიორგაძე, შველიძე, ლაბაძე და გორგოძე. შესაძლოა, ვერ ითამაშოს კვირიკაშვილმაც, რომელმაც “იაგუა¬რებთან” მატჩი მტკივანი ფეხით ჩაამთავრა. მათ სათადარიგოთა სკამიდან ქუბრიაშვილი და ნატრიაშვილი შეცვლიან, A ნაკრებიდან კი ეროვნულ გუნდში ვასილ კაკოვინი, ჯაბა ბრეგვაძე, სიმონ მაისურაძე, ლაშა ხმალაძე, ირაკლი ჩხიკვაძე და ვიტო კოლელიშვილი დაწინაურდებიან. ეროვნული გუნდის სრული შემადგენლობა დღეს-ხვალ გახდება ცნობილი სრული ცვლილებებიც ორშაბათ-სამშაბათს გაცხადდება.

თბილისი. "ბორის პაიჭაძე" (28 000)
საქართველო - იაგუარები (არგენტინა A) 24:22 (21:12)
საქართველო: 15. მერაბ კვირიკაშვილი, 14. ალექსანდრე თოდუა, 13. დავით კაჭარავა, 12. თედო ზიბზიბაძე (რევაზ გიგაური 73), 11. ირაკლი მაჩხანელი, 10. ლაშა მალაღურაძე, 9. ირაკლი აბუსერიძე (ბიძინა სამხარაძე 71); 1. დავით ხინჩაგიშვილი, 2. აქვსენტი გიორგაძე (ირაკლი ნატრიაშვილი 71), 3. გოდერძი შველიძე (გიორგი ჩხაიძე 60), 4. გიორგი ნემსაძე (ლევან დათუნაშვილი 57), 5. ილია ზედგინიძე, 6. გია ლაბაძე (რატი ურუშაძე 72), 7. გიორგი ჩხაიძე (დავით ქუბრიაშვილი 53), 8. მამუკა გორგოძე.
2 ლელო: ზიბზიბაძე (21), ხინჩაგიშვილი (33)
1 გარდასახვა: კვირიკაშვილი (22)
4 ჯარიმა: კვირიკაშვილი (2, 6, 29, 55)
2 სინბინი: ხინჩაგიშვილი (50), ჩხაიძე (69(
მწვრთნელი: ტიმ ლეინი
ფიზმომზადების მწვრთნელი: ჯონი ნამუ
იაგუარები: 15. მარტინ ბუსტოს მოიანო (ფრანსისკო ხოსე მერელიო 57), 14. ველისარიო აგულია, 13. მიგელ ავრამოვიჩი, 12. მატიას ვიასო, 11. ტომას დე ვედია, 10. იგნასიო მიერესი (სანტიაგო გონსალეს იგლესიასი 57), 9. მარტინ ლანდხარო; 1. პაბლო ხენი (უგო შიერანო 71), 2. ალვარო ტეხედა (ნაუელ ტეტას ჩაპარო 67), 3. ხუან გომესი, 4. ტომას როანი, 5. მარიანო გალარსა, 6. იგნასიო პასმანი (აგუსტინ გუსმანი 71), 7. როდრიგო ბრუნო, 8. ლეონარდო სენატორე.
ლელო: ლანდხარო (78)
გარდასახვა: გონსალეს იგლესიასი (78)
4 ჯარიმა: ბუსტოს მოიანო (4, 27, 35, 46)
არეკნი: მიერესი (15)
მწვრთნელი: ხოსე ორენგო
ფიზმომზადების მწვრთნელი: ხორხე რუისი

ზურა ქსოვრელი