იტალიის მორაგბეთა A ნაკრები, რომელიც 20 ნოემბერს პალმანოვაში საქართველოს ეროვნულ გუნდს უნდა დაუხვდეს, გასულ კვირაში, “ერთა თასსა” და 2011 წლის მსოფლიოს ჩემპიონატის შესარჩევ ეტაპზე საქართველოს ნაკრების პრინციპულ მეტოქეს, რუმინეთს ეთამაშა და 33:6 დაამარცხა.
იტალიელებმა აგრესიული დაცვა და კარგი შეტევა აჩვენეს, განსაკუთრებით კი, მათი შერკინების მესამე ხაზი გამოირჩა. რუმინელები იტალიას შესუსტებული შემადგენლობით ეწვივნენ, თუმცა, ძალიან მალე, მე-3 წუთზე, ვლაისუს ჯარიმით დაწინაურდნენ. მასპინძლებმა სტუმრებს თავხედობა არ აპატიეს, მე-6 წუთზე ბუსომ ალამთან ლელო გაიტანა და საკუთარი გუნდი დააწინაურა. არაზუსტი რეალიზაციის შემდეგ, იტალიელებმა გარისკვა აღარ ისურვეს და დასარტყმელი ჯარიმები ბოჩინომ ძელებსშუა ორჯერ გააძვრინა, რაზეც ვლაისუმ ერთი ზუსტი ჯარიმით უპასუხა და მასპინძლებმა ტაიმი 11:6 მოიგეს.
მე-2 ტაიმში იტალიელები შეუჩერებელნი იყვნენ. მათ კარგად გამოიყენეს სტუმართა 10-წუთიანი კაცნაკლულობა და ჯერ ბოჩინოს ჯარიმით, შემდეგ კი დერბიშირის ლელოთი, 19:6 დაწინაურდნენ. ამის შემდეგ, მასპინძლებმა აქცენტი ლელოების გატანაზე აიღეს და მატჩის ბოლომდე სეპემ და კუარტაროლიმ თავი ორჯერ გამოიჩინეს, რომელთა შემდეგაც ბოჩინიმ გარდასახვები ზუსტად შეასრულა და საბოლოო შედეგი დააფიქსირა.
საგულისხმოა, რომ “ბორჯღალოსნების” მეტოქეთა რიგებში 10 ისეთი მორაგბე იყო, რომელთაც ეროვნულ ნაკრებში არ უთამაშიათ - 5 მათგანი ძირითად შემადგენლობაში იყო, ერთი მაგდენი კი თამაშში სათადარიგოთა სკამიდან ჩაერთო. რაც შეეხება დანარჩენ 12 მორაგბეს, მათ ეროვნულ ნაკრებში, მეტ-ნაკლები რაოდენობით აქვს თამაშები ჩატარებული. მთლიანობაში, გუნდი იტალიურ კლუბებში მობურთალი მორაგბეებით იყო დაკომპლექტებული. თუმცა, იტალიური კლუბები ევროთასების - “ჰეინეკენის თასისა” და “ჩელენჯ ქაფის” აქტიური მონაწილეები არიან და ძლიერ გუნდებთან თამაში მათთვის უცხო ხილი სულაც არაა.

პიაჩენცა. “ვალტერ ბელტრამეტი”
იტალია A - რუმინეთი 33:6
იტალია : 15. პაოლო ბუსო, 14. ტომაზო ბენვენუტი, 13. რობერტო კუარტაროლი, 12. ანდრეა პრატიჩეტი (ენრიკო პატრიციო 41), 11. მიჩელ სეპე, 10. რიკარდო ბოჩინო, 9. ფაბიო სემენზატო (ედუარდო გორი 72); 1. მიჩელ რიზო (პლინიო სკიამანა 67), 2. დავიდე ჯიაზონი (ტომაზო დაპისე 75), 3. ლორენცო ჩიტადინი (მასიმილიანო რავალე 72), 4. ანტონიო პავანელო, 5. ვალერიო ბერნადო, 6. ფრანცისკო მინტო (ტომაზო რეატო 70), 7. პაულო დერბიშირი (მანტვიდას ტვერაგა 73), 8. მანოა ვოსავაი.
4 ლელო: ბუსო (6), დერბიშირი (49), სეპე (67), კუარტაროლი (80)
2 გარდასახვა: ბოჩინო (68, 80)
3 ჯარიმა: ბოჩინო (15, 19, 47)
სინბინი: სემენზატო (24)
მწვრთნელი: ჯანლუკა გუიდი
რუმინეთი: 15. ფლორიან ვლაისუ, 14. იონუტ ბოტეზატუ, 13. დან დუმიტრუ, 12. რობერტო დესკალუ, 11. ჯორჯ კატუნა (კსაბა გალი 59), 10. იულიან დუმიტრასი, 9. ლუსიან სირბუ (ვალენტინე კალაფეტეანუ 41); 1. პეტრისო ტოდერასკი (ანდრეი რადიო 59), 2. მარიუს ტინკუ (დრაგოს დიმა 65), 3. იონ პაულიკა, 4. კრისტი პეტრე, 5. ვალენტინე ურსაჩე (აგუსტინ პეტრიჩე 41), 6. სტელიან ბურკეა (სერგიუ ურსაჩე 70), 7. მიჰაი მაკოვეი, 8. ოვიდიუ ტონიტა.
2 ჯარიმა: ვლაისუ (3, 25)
2 სინბინი: კატუნა (45), დიმა (80)
მწვრთნელი: სერგე ლაირლე

ზურა ქსოვრელი