გასულ უქმეებზე გამართულმა მსოფლიოს 2011 წლის თასის შესარჩევმა და ტესტ-მატჩებმა რაგბის საერთაშორისო საბჭოს განახლებულ რეიტინგში იმდენი ცვლილება გამოიწვია, IRB-ს ოფიციალურ ვებ-გვერდზე შესულთ უთუოდ თვალი აუჭრელდებოდათ. სიახლეებმა, უარყოფითად იმოქმედა საქართველოს ეროვნულ ნაკრებზე, რომელიც მე-17 საფეხურიდან აშშ-ს გუნდმა ჩამოაქვეითა.
შეგახსენებთ, რომ გასულ შაბათს “ბორჯღალოსნები”  თბილისში არგენტინის A ნაკრებს დაუპირისპირდნენ და უძლიერეს მეტოქესთან ჭიდილში 24:22 იმარჯვეს. სამწუხაროდ, “იაგუარებთან” მატჩი სარეიტინგო არ გახლდათ, ამდენად, ქართველებს 66.85 ქულა შერჩათ და ამერიკელთა “საკბილონიც” გახდნენ.
აშშ-ს გუნდს წინსვლა მსოფლიოს თასის შესარჩევ ციკლში ურუგვაელთა ძლევამ განაპირობა. ამერიკული ფლეი-ოფის პირველ შეხვედრაში, აშშ-მ მონტევიდეოში ურუგვაი 27:22 დაამარცხა და ახალ ზელანდიაში გასამართი მსოფლიოს თასისკენ დიდი ნაბიჯი გადადგა. ამერიკელებმა თავი 66.87 ქულას მოუყარეს და “ბორჯღალოსნებს” ორი მეასედი ქულით გაუსწრეს.
მოწინავე ოცეულში კიდევ არაერთი ცვლილება მოხდა, რომელთა შესახებაც თანმიდევრულად მოგახსენებთ. ცხადია, უპირველეს ყოვლისა, რეიტინგის სათავეში განხორციელებულ “როქზე” ვთქვათ. ახალი ზელანდიის “ოლ ბლექსმა” მილანის “სან სიროზე” იტალიას 20:6 სძლია და მართალია, ამით ქულათა მარაგს ვერაფერი შემატა, მსოფლიოს უძლიერესი გუნდის ტიტული მაინც დაიბრუნა.
აღნიშნულის მიზეზი ტულუზაში დაფიქსირებული შედეგი გახდა, სადაც მოქმედმა მსოფლიოს ჩემპიონმა სამხრეთ აფრიკის ნაკრებმა საფრანგეთთან 13:20 წააგო და პირველობის დათმობა მოუხდა.
“ქურციკებმა” წლევანდელ “სამი ერის” გათამაშებაში ზელანდიელებს სამივე მატჩი მოუგეს და ივლისიდან მოყოლებული, “შავები” ზურგს უკან ჰყავდათ მოტოვებული, თუმცა, ტულუზურმა ფიასკომ ყველაფერი უკუღმა დააყენა.
ცხადია, სასახელო გამარჯვებით იხეირეს ფრანგებმაც, რომელთაც თავი 83.20 ქულას მოუყარეს და ირლანდიასთან ერთად მეოთხე-მეხუთე ადგილებს იყოფენ.
ამ უკანასკნელთ ავსტრალიელებთან მატჩის გადარჩენა ბოლო წუთზე შეძლეს. დუბლინის “კროუკ პარკზე” გამართულ შეხვედრაში, მასპინძელთა კაპიტანმა ბრაიან ო’დრისკოლმა “ვოლაბიზი” უკანასკნელი შეტევისას დაალელოვა და საყაიმო ანგარიში – 20:20 დააფიქსირა. ამ ყაიმის შედეგად, ავსტრალიელებს 85.63 ქულა შერჩათ და მე-3 პოზიციას მშვიდად ინარჩუნებენ.
შინაურ კედლებში არგენტინელთა დამარცხების (16:9) ხარჯზე მერვედან მეექვსე ადგილს უწია ინგლისმა. “ვარდებმა” “პუმების” გარდა უელსის ნაკრებიც ჩამოიტოვეს, რომელმაც უმძიმეს ბრძოლაში სამოას 17:13 მოუგო.
მე-9 საფეხურისთვის ჭიდილში გლაზგოს “მარიფილდზე” შეიბნენ შოტლანდიისა და ფიჯის ნაკრებები. სქოთებმა 23:10 იმარჯვეს და მოწინავე ათეულის ბოლო ადგილი ოკეანეთის წარმომადგენლებს მიუჩინეს.
მოულოდნელი შედეგი დაფიქსირდა იაპონიის ქალაქ სენდაიში, სადაც მასპინძლებმა “ჩერჩილის თასზე” ჩვენი ერთ-ერთი გამაწარებელი კანადის ნაკრები 46:8 გაანადგურეს და მე-13 პოზიცია აართვეს.
კანადელებს დაკარგულის დაბრუნების შანსი ნოემბრის ბოლოს ექნებათ, როდესაც შინაურ კედლებში რუსებს დაუპირისპირდებიან და თუკი იმარჯვეს, სათავისოს გარდა, “ბორჯღალოსანთა” საქმესაც გააკეთებენ – “დათვები” მნიშვნელოვან ქულებს დაკარგავენ, რის გამოც, აშშ-სა და საქართველოს შემდეგ, მე-18 საფეხურზე აღმოჩნდებიან.
ტუნისის მიწაზე ისტორიის განმავლობაში პირველი გამარჯვება იზეიმა ნამიბიის ეროვნულმა ნაკრებმა. გასულ მსოფლიოს თასზე ქართველთა მიერ განადგურებულმა ნამიბიელებმა აფრიკული ფლეი-ოფის პირველ შეხვედრაში 18:13 იმარჯვეს და რეიტინგის 22-ე ადგილიდან ესპანეთი ჩამოაქვეითეს.
ვინაიდან მომდევნო შაბათს კიდევ არაერთი ტესტ-მატჩია დაგეგმილი, ცვლილებებს მომავალ რეიტინგშიც მრავლად უნდა ველოდეთ. მოახლოებული ბატალიებიდან შემდეგი თამაშები უნდა გამოვარჩიოთ: ირლანდია-ფიჯი, იტალია-სამხრეთ აფრიკა, ინგლისი-ახალი ზელანდია, უელსი-არგენტინა, საფრანგეთი-სამოა, შოტლანდია-ავსტრალია.

IRB-ს რეიტინგი 16 ნოემბრისთვის
1 (2). ახალი ზელანდია 90.52
2 (1). სამხრეთ აფრიკა 89.97
3 (3). ავსტრალია 85.63
4 (5). საფრანგეთი 83.20
5 (4). ირლანდია 83.20
6 (8). ინგლისი 81.07
7 (6). არგენტინა 80.49
8 (7). უელსი 80.39
9 (10). შოტლანდია 76.06
10 (9). ფიჯი 75.69
11 (11). სამოა 73.47
12 (12). იტალია 71.23
13 (14). იაპონია 69.68
14 (13). კანადა 68.76
15 (15). ტონგა 67.53
16 (16). რუსეთი 67.17
17 (18). აშშ 66.87
18 (17). საქართველო 66.85
19 (19). რუმინეთი 64.85
20 (20). ურუგვაი 61.07
21 (21). პორტუგალია 60.31
22 (23). ნამიბია 59.44
23 (22). ესპანეთი 59.01
24 (24). ჩილე 57.95
25 (25). ს.კორეა 57.90
26 (26). უკრაინა 55.47
27 (27). გერმანია 55.35
28 (29). ყაზახეთი 55.12
29 (30). ბრაზილია 54.97
30 (28). ტუნისი 54.30 

დათო მანჯავიძე