სამხრეთ აფრიკის რაგბის კავშირი, “შპრინბოკის” მიერ საფრანგეთის ეროვნულ ნაკრებთან ტულუზაში წაგებული (13:20) ტესტ-მატჩის წინ, მათი სახელმწიფო ჰიმნის შესრულებით უკმაყოფილო დარჩა და საფრანგეთის რაგბის კავშირს ოფიციალური წერილით მიმართა.
The Guardian-ის ინფორმაციით, ჰიმნი მომღერალმა რას დუმისანმა საკუთარ სტილში შეასრულა და ხშირ შემთხვევაში უადგილო პაუზებს აკეთებდა, რაც სავარაუდოდ, იმით იყო გამოწვეული, რომ სიტყვები ავიწყდებოდა.
დუმისანი სამხრეთ აფრიკაში დაიბადა, ახლა კი საფრანგეთის მოქალაქეა და როგორც ჩანს, თავისი ისტორიული სამშობლოს ჰიმნი დაავიწყდა. მისი შესრულება გულშემატკივრებში და თავად აფრიკელ მორაგბეებში სიცილს იწვევდა, რამაც სამხრეთ აფრიკის რაგბის კავშირის (SARU) პრეზიდენტ ორეგან ჰოსკინსის გულისწყრომა გამოიწვია.
“ჰიმნის შესრულებამ შოკში ჩამაგდო და საფრანგეთის რაგბის კავშირს საკუთარი უკმაყოფილება წერილობით მოვახსენე. შეურაცხყოფა მოგვაყენეს არა მარტო SARU -ს და “შპრინბოკს”, არამედ მთელს ქვეყანას. საფრანგეთის ნაკრებს გამარჯვებას ვულოცავ, მაგრამ მოუთმენლად ველი პასუხს ჩემს წერილზე” - აცხადებს ჰოსკინსი.
ამასობაში, მსოფლიოს მოქმედი ჩემპიონი და 2009 წლის “სამი ერის” გამარჯვებული “შპრინბოკი”, ევროპაში მარცხიან ტურნეს განაგრძობს. ინგლისურ “ლესტენთან” (17:22) და საფრანგეთის ეროვნულ გუნდთან მარცხის შემდეგ, “ქურციკები” ინგლისურ კლუბ “სარაცენს” გაეჯიბრნენ და ზედიზედ მესამედ დამარცხდნენ. არადა, ლონდონში, “უემბლიზე” გამართული მატჩის პირველი ტაიმი, “შავი კონტინენტის” წარმომადგენლებს ევროპულ ტურნეზე პირველ გამარჯვებას პირდებოდა - დე იონგის და ნოკვეს ლელოებს, პიენაარმა ერთი ზუსტი გარდასახვა და ორიც ჯარიმა დაურთო და აფრიკელები 18:3 იგებდნენ, მაგრამ მეორე ნახევარში მონაგარს მხოლოდ ნოკვეს ლელო შემატეს, თავად კი - 2 ლელო, ერთი გარდასახვა, ორი ჯარიმა და ერთიც არეკნი მიიღეს და “სარაცინმა” საბოლოოდ 24:23 იმარჯვა.
“შპრინბოკი” მომავალ შეხვედრას 21 ნოემბერს უდინეში, იტალიის ეროვნული ნაკრების წინააღმდეგ გამართავს.