საქართველოს მორაგბეთა ეროვნული ნაკრები, 20 ნოემბერს უდინეს მახლობელ პალმანოვაში იტალიის A ნაკრებთან მიმდინარე წლის ბოლო საკონტროლო შეხვედრას გამართავს. 2010 წლის თებერვალ-მარტში, “ბორჯღალოსნებს” “ერთა თასისა” და 2011 წლის მსოფლიო თასის შესარჩევი ეტაპის უმნიშვნელოვანესი შეხვედრები ელის და ქართველთა ავსტრალიელ მთავარ მწვრთნელ ტიმ ლეინს, ეროვნული გუნდის კანდიდატებზე დასაკვირებლად ბოლო შანსი ეძლევა.
მართალია, ლეინს ამ შეხვედრაშიც უძლიერესი შემადგენლობის დაყენება სურდა, მაგრამ არგენტინის “იაგუარებთან” 24:22 გამარჯვების შემდეგ, მას სხვადასხვა მიზეზების გამო რამდენიმე წამყვანი მორაგბე დააკლდა. დავით ზირაქაშვილს და ირაკლი გიორგაძეს არგენტინის A ნაკრების წინააღმდეგაც არ უთამაშიათ. შეკრებაზე გამოცხადდა, მაგრამ კუნთების პრობლემის გამო მოედანზე ვერ გავიდა მალხაზ ურჯუკაშვილი, ახლა კი ლეინს თედო ზიბზიბაძე, აქვსენტი გიორგაძე, გოდერძი შველიძე, გია ლაბაძე, მამუკა გორგოძე და ლევან დათუნაშვილიც გამოაკლდნენ.
არგენტინელთა წინააღმდეგ ნათამაშები ძირითად შემადგენლობაში, ამ მიზეზით ექვსი ცვლილება მოხდა, თუმცა, შემცვლელთაგან “იაგუარების” წინააღმდეგ დიმიტრი ბასილაიას გარდა ყველამ ითამაშა და ისინი ახალბედები სულაც არ არიან. უკანა ხაზში მხოლოდ ერთი ცვლილება მიხდა - თედო ზიბზიბაძის ადგილი რევაზ გიგაურმა დაიკავა, ნახევარდაცვაში კი ირაკლი აბუსერიძის ნაცვლად ბიძინა სამხარაძე გაირჯება. უცვლელი დარჩა შერკინების მეორე ხაზი, პირველ და მეორე ხაზში კი ორ-ორი ცვლილება განხორციელდა - აქვსენტი გიორგაძეს და გოდერძი შველიძეს, ირაკლი ნატრიაშვილმა და დავით ქუბრიაშვილი ჩაანაცვლებენ, ხოლო მესამე ხაზში გია ლაბაძისა და მამუკა გორგოძის ნაცვლად, რატი ურუშაძე და დიმიტრი ბასილაია გაირჯებიან.
სათადარიგოთა შორის მყოფი 9 მორაგბიდან, არგენტინასთან მხოლოდ ირაკლი აბუისერიძემ ითამაშა, უკანახაზელი ირაკლი ჩხიკვაძე, თბილისურ მატჩში განაცხადში იყო, მაგრამ მოედანზე არ გამოჩენილა, დანარჩენები კი ეროვნულ გუნდში საქართველოს A ნაკრებიდან დაწინაურდნენ.
იტალიის A ნაკრებმა ერთი კვირის წინ რუმინეთის ეროვნულ ნაკრებს უმასპინძლა და 33:6 დაამარცხა, ასე რომ, “ბორჯღალოსნებს” მომავალ მატჩში იოლი გასეირნება არ ექნებათ. აღსანიშნავია, რომ იტალიის A ნაკრებთან, საქართველოს ეროვნულ გუნდს, რომელსაც წამყვანი მორაგბეები მაშინაც მრავლად აკლდა, რუმინეთის დედაქალ ბუქარესტში გამართულ IRB-ს “ერთა თასზე” ორჯერ აქვს ნათამაშები და ორივე შეხვედრა ქართველთა გამარჯვებით დასრულდა.

20 ნოემბერი. იტალია. პალმანოვა (უდინე)
იტალია - საქართველო (22:00 საათი. თბილისის დრო)
საქართველო: 15. მერაბ კვირიკაშვილი (“ფიჟაკი”, საფრანგეთი), 14. ირაკლი მაჩხანელი (“სენტ-ეტიენი”, საფრანგეთი), 13. დავით კაჭარავა (“ნიცა”, საფრანგეთი), 12. რევაზ გიგაური (“სენაკი”, საფრანგეთი), 11. ალექსანდრე თოდუა (“ლელო”, საქართველო), 10. ლაშა მალაღურაძე (“ბეზიე”, საფრანგეთი), 9. ბიძინა სამხარაძე (“ფარულ კონსტანცა”, რუმინეთი); 1. დავით ხინჩაგიშვილი (“ბრივი”, საფრანგეთი), 2. ირაკლი ნატრიაშვილი (“ფარულ კონსტანცა” რუმინეთი), 3.     დავით ქუბრიაშვილი (“ტულონი”, საფრანგეთი), 4. ილია ზედგინიძე (“კარკერენ იერი”, საფრანგეთი), 5. გიორგი ნემსაძე (“მასი”, საფრანგეთი), 6. გიორგი ჩხაიძე (“მონპელიე”, საფრანგეთი), 7. რატი ურუშაძე (“ენისეი-სტმ”, რუსეთი), 8. დიმიტრი ბასილაია (“ლე ბუგი”, საფრანგეთი).
სათადარიგოები: დავით დადუნაშვილი (“პერიგო”, საფრანგეთი), ჯაბა ბრეგვაძე (“ყოჩები”, საქართველო), ვასილ კაკოვინი (“ბრივი”, საფრანგეთი), სიმონ მაისურაძე (“ვილერბანი”, საფრანგეთი), ლაშა თავართქილაძე (“ფარულ-კონსტანცა”, რუმინეთი), ვიქტორ კოლელიშვილი (“ლელო”, საქართველო), ირაკლი აბუსერიძე (“ოსერი”, საფრანგეთი), ირაკლი ჩხიკვაძე (“აია”, საქართველო), ლაშა ხმალაძე (“ლელო”, საქართველო).
მთავარი მწვრთნელი: ტიმ ლეინი
ფიზ.მომზადების მწვრთნელი: ჯონი ნამო
მწვრთნელის ასისტენტი: ილია მაისურაძე

ზურა ქსოვრელი