მიმდინარე წელს საქართველოს შიდა სარაგბო სეზონის დასრულებამდე ორი მატჩიღა დარჩა. 21 ნოემბერს, 15:00 საათზე, “სინათლეზე”, საქართველოს თასის საპასუხო  შეხვედრაში, თბილისურ დერბში, “ლოკომოტივი” “აკადემიას” წინაშე წარსდგება და შვიდქულიანი ჰანდიკაპის შენარჩუნებას ეცდება.
წესითა და რიგით, თასის ნახევარფინალის მეორე წყვილის მატჩშიც უნდა გამართულიყო - ქუთაისის “აიას” კვირას თბილისში “ლელოსთან” უწევდა შეხვედრა, მაგრამ ქუთათურებმა, ტრავმებისა და გრიპიანობის გამო, საქართველოს დედაქალაქში სტუმრობა იუარეს და ქვეყნის მოქმედი ჩემპიონი ფინალში უბრძოლველად გავიდა. ისე კი, “ლელომ” პირველი შეხვედრა 30:12 მოიგო და ის გასულ წელს მოპოვებული თასის შენარჩუნებისთვის გადამწყვეტ ბრძოლაში მონაწილეობის უფლებას ალბათ მაინც მოიპოვებდა.
ზაფხულის არდადეგების შემდეგ, სეზონი სწორედ თასის ნახევარფინალებით განახლდა და მაშინ ფოთში შეკრებაზე მყოფმა გუნდებმაც პირველი ნახევარფინალური მატჩები სწორედ იქ მოილიეს. 28 აგვისტოს, მასპინძლის რანგში “აკადემია” თამაშობდა, თუმცა “ლოკომოტივმა” მისი ძლევა მაინც მოახერხა - 17:10 და ახლა ამ უპირატესობის შენარჩუნება მართებს. 2009 წელს, თასის გარდა, ამ გუნდებმა ერთმანეთთან ქვეყნის ჩემპიონატში ორჯერ ითამაშეს და ორივე შემთხვევაში “ლოკომოტივმა” იმარჯვა - პირველად 23:13 მოიგო, შემდეგ კი მეტოქე 43:7 გაანადგურა და ახლაც ფავორიტად ითვლება. 

ზურა ქსოვრელი