საქართველოს შიდა სარაგბო სეზონის მიწურულს, თბილისის “ლოკომოტივმა” ქვეყნის თასის ნახევარფინალის საპასუხო მატჩში “აკადემია” უპრობლემოდ  დაამარცხა და ტიტულისთვის 29 ნოემბერს “ლელოს” დაუპირსპირდება.
ამრიგად, სეზონის უმთავრესი ჯახი, რომელიც ქვეყნის ჩემპიონატის ფინალში “ბათუმი XV”-ის თავგამოდებული თამაშის გამო არ შედგა, 2009 წლის დასკვნით მატჩში მაინც გაიმართება. ბოლო წლებში საქართველოს ჩემპიონატსა თუ თასზე, “ლელო” და “ლოკომოტივი” მუდამ ფავორიტებად ითვლებოდნენ და გამონაკლისი არც მიმდინარე წელია. თუმცა, მცირე ფინალში ლევან მგელაძის გაწვრთნილმა ბათუმელებმა იმჟამად მოქმედი ჩემპიონი “ლოკომოტივი” დაამარცხეს და მომავალი ჩემპიონის წინაშე თავად წარსდგნენ. თასისათვის ბრძოლაში კი თემურ ბენდიაშვილის შეგირდებმა იყოჩაღეს და ახლა “ლელოსათვის” დუბლის შესრულებაში ხელის შეშლას ეცდებიან.
გასულ წელს, როდესაც ჩემპიონატის ფინალში “ლოკომოტივმა” “ლელო” დაამარცხა, “ლელომ” შური თასის ნახევარფინალში იძია, სადაც ორი მატჩის ჯამში სწორედ “ლოკომოტივს” სძლია და ფინალში “აკადემიაც” ზედ მიაყოლა. ახლა ექს-ჩემპიონს ეძლევა რევანშის შანსი, თუმცა, წლეულს “ლელო” მეტოქეებზე აშკარად უკეთ თამაშობს და მაყურებელსაც საინტერესო ბრძოლა ელის. აღსანიშნავია, რომ სწორედ “ლოკომოტივის” ძლევით დაიწყო “ლელოს” აღმასვლა და ამ გუნდს მას შემდეგ არცერთი თამაში არ დაუთმია. დასრულდება თუ არა მათი გამარჯვებათა სერია 29 ნოემბერს, “მიხეილ მესხზე” გამოჩნდება.
ახლა უშუალოდ ნახევარფინალს დავუბრუნდეთ. თასის ამ ეტაპზე გამარჯვებული გუნდი ორი მატჩის ჯამში ირკვევა და პირველი შეხვედრები საზაფხულო არდადეგების შემდეგ, ფოთში გაიმართა, სადაც გუნდები შეკრებას გადადიოდნენ. “ლელომ” ქუთაისის “აია” დიდი სხვაობით დაამარცხა, განმეორებითი მატჩი კი, რომელიც 22 ნოემბერს “სინათლეზე” უნდა გამართულიყო აღარ შედგა, რადგან ქუთათურებმა ტრავმებისა და ვირუსის გამო ძირითადი შემადგენლობის შეკრება ვერ მოახერხა და “ლელო” ფინალში უბრძოლველად გავიდა. მეორე წყვილის პირველ მატჩში, “აკადემიამ” “ლოკომოტივს” დიდი ბრძოლა გაუმართა და მხოლოდ 7 ქულის სხვაობით დამარცხდა - 10:17, რის გამოც “სინათლეზე” შეკრებილი 100-მდე მაყურებელი საინტერესო განმეორებით ჯახს ელოდა, მაგრამ მათი იმედები არ გაამართლდა.
ექსჩემპიონმა შეხვედრა მძლავრად დაიწყო, ჯარიმები აუტში გზავნა, მარჯვენა ფლანგზე 5-მეტრა დერეფანი მოიგო, მოლის შემდეგ შეტევა მოკლე ფრთაზე განავითარა და ლექსო გუგავამ ლელო გაიტანა, ბობა კვინიხიძეს კი გარდასახვა გაუფუჭდა - 5:0. “აკადემიამ” ცენტრიდან ბურთი უხიროდ შეიყვანა და მოედნის შუაში შერკინება დაინიშნა, საიდანაც გამოტანილი ბურთი “ლოკომოტივმა” კარგად ჩაათამაშა, ქავთარაძემ ხაზი გაჭრა, ლელო კი ხუციშვილმა გაიტანა და ამ ჯერზე კვინიხაძის რეალიზაციაც ზუსტი აღმოჩნდა - 12:0. “აკადემიას” თავისი ლელოს გატანა 30-ე წუთზე შეეძლო, როდესაც წაქაძემ რაქიდან შეუტია და ხაზი გაჭრა, მაგრამ დახმარებამ დაიგვიანა და მომენტი გამოუყენებელი დარჩა.
მეორე ნახევარი, პირველის მსგავსად, “ლოკომოტივის” აქტიურობით დაიწყო და პეტრიაშვილმა მესამე ლელო გაიტანა, 50-ე წუთზე კი ლოკომოტიველებმავე მარჯვენა ფლანგზე კარგად ჩაათამაშეს ბურთი და ხუციშვილმა თავისი წილი ლელო მიითვალა - 22:0. შეხვედრის ბოლოს “აკადემიამ” მეტოქის მოდუნებით ისარგებლა და ორი ლელო გაიტანა - ჯერ ჯარიმა გაითამაშეს სწრაფად და ლელო შეცვლაზე შესულმა ქოპილაშვილმა მიითვალა (რეალიზაცია ელიზბარაშვილმა გამოიყენა), 79-ე წუთზე კი ელიზბარაშვილმა ფინტებით გაიარა დაცვის ხაზი და სხვაობა კიდევ უფრო შეამცირა. თუმცა, ამჯერად გარდასახვა არაზუსტად დაარტყა - 22:12. “ლოკომოტივმა” მეტოქეს ეს გამოხტომა არ აპატია და ბოლოს კობერიძემ ერთი ლელოც ჩაიწერა, კვინიხიძეს კი გარდასახვა გაუფუჭდა და საბოლოო ანგარიშიც დაფიქსირდა - 27:12.

თბილისი. “სინათლე” (100)
ლოკომოტივი (თბილისი) - აკადემია (თბილისი) 27:12 (12:0)
ლოკომოტივი: 15. კავთიძე, 14. ქავთარაძე, 13. კობერიძე, 12. ხუციშვილი, 11. გუგავა, 10. კვინიხიძე, 9. ღვინჯილია; 1. პეტრიაშვილი, 2. ელოშვილი, 3. ნაცარაშვილი, 4. ოზგებაშვილი, 5. გუჯარაიძე, 6. ბერიშვილი (ნადირაძე 70), 7. ჩიტიძე (დონაძე 53), 8. ზ. მაისურაძე.
მწვრთნელი: თემურ ბენდიაშვილი
5 ლელო: გუგავა, ხუციშვილი (2), პეტრიაშვილი, კობერიძე
1 გარდასახვა: კვინიხიძე
აკადემია: 15. ი. დავითაშვილი (ქოპილაშვილი 45), 14. გოგოლაშვილი (მურღულია 53), 13. წაქიძე (ბატოიანი 70), 12. მოლოდინაშვილი, 11. ჭუაძე, 10. ელიზბარაშვილი, 9. შ. დავითაშვილი (კიზირია 41); 1. ლომსაძე, 2. მეკოკიშვილი, 3. ღამბაშიძე (ფირცხალავა 53), 4. დ. ობოლაძე (ზაქაშვილი 41), 5. ლ. ობოლაძე, 6. ნიბლაძე, 7. მაღლაკელიძე, 8. მურვანიძე (ჩხიკვაძე 41).
მწვრთნელი: პაატა ნარიმანიძე
2 ლელო: ქოპილაშვილი, ელიზბარაშვილი
1 გარდასახვა: ელიზბარაშვილი 

ზურა ქსოვრელი