საფრანგეთის მორაგბეთა პირველ ელიტარულ დივიზიონ Top 14-ის მე-13 ტურის პირველი შეხვედრა პარასკევს, გვიან ღამით გაიმართა და მასში სატურნირო ცხრილის სხვადასხვა პოლუსზე მყოფმა გუნდებმა ითამაშეს. მართალია, უიმედო აუტსაიდერ “ალბისა” და მოქმედი ჩემპიონის, მიმდინარე გათამაშების ლიდერ “პერპინიანის” რიგებში ქართველი მორაგბეები არ არიან, მაგრამ ამ შეხვედრის შედეგს აქვსენტი გიორგაძის “კასტრისათვის” და დავით ზირაქაშვილის “კლერმონისთვის” მაინც დიდი მნიშვნელობა ჰქონდა.
“ალბიმ” პატარა სასწაული მოახდინა და ზედიზედ 5 მარცხის შემდეგ, სეზონში მეორედ გაიმარჯვა. როგორც ჩანს, ლიდერმა მეტოქე სათანადოდ ვერ დააფასა, თითქმის მთელი შეხვედრა მდევრის როლში გაატარა, 73-ე წუთზე გატანილი ჯარიმით 23:21 დაწინაურდა, მაგრამ შეხვედრის დარულებამდე 2 წუთით ადრე, ჯარიმა თავადაც მიიღო და მინიმალური სხვაობით - 23:24 დამარცხდა, რის ხარჯზეც ერთი პრემიალური ქულა ჩაიწერა (უფრო სწორი იქნება თუ ვიტყვით, რომ 3 ქულა დაკარგა) და ჯერჯერობით, კვლავ სატურნირო ცხრილის სათავეშია, მაგრამ “კასტრმა” მასთან ქულებით გათანაბრება მოახერხა და მხოლოდ დამატებითი მაჩვენებლებით ჩამორჩება.
შეგახსენებთ, რომ წლეულს საფრანგეთის ჩემპიონატი განსხვავებული სისტემით ტარდება. რეგულარული პირველობის შემდეგ, პირველ-მეორეზე გასული გუნდები, საჩემპიონო ფლეი ოფში პირდაპირ ხვდებიან, მე-3-მე-6 ადგილზე გასულები კი, უპირველესად, ერთურთთან არკვევენ სიტუაციას და გამარჯვებული 2 გუნდი ფლეი ოფში პირდაპირ მოხვედრილ ლიდერებს მხოლოდ ამის შემდეგ უერთდება. სწორედ ამით იყო მნიშვნელოვანი ლიდერის აუტსაიდერთან მარცხი, მაგრამ ქართველ ლეგიონერთა გუნდებიდან “პერპინიანის” ფეხის დაცდომით მხოლოდ “კასტრმა” ისარგებლა.
მე-13 ტურში 2 ცენტრალური შეხვედრა გაიმართა და მათში სწორედ ზემონახსენებმა “კასტრმა” და “კლერმონმა” ითამაშეს. აქვსენტი გიორგაძის გუნდმა საუკეთესო ექვსეულში მოხვედრისთვის მებრძოლ “ტულუზას” უმასპინძლა და მეტოქე 30:10 დაამარცხა, თანაც 4 ლელოს გატანაც მოახერხა და გამარჯვების ოთხთან ერთად, ერთი პრემიალური ქულაც ჩაიწერა. საქართველოს ეროვნულ გუნდთან ერთად არგენტინელ “იაგუარებთან” ნაბრძოლები გიორგაძე გუნდის განაცხადში მოხვდა და მოედანზე 54-ე წუთზე შევიდა. მასპინძლებმა თამაში მძლავრად დაიწყეს და მე-11 წუთზე ორ-ორი ლელოთი და გარდასახვით უკვე 14:0-ს იგებდნენ, მე-15 წუთზე კი, მონაგარს ჯარიმაც შემატეს. შესვენებამდე გუნდებმა ჯარიმები გაცვალეს და ტაიმი “კასტრმა” 20:3 მოიგო. მეორე ნახევრის დებიუტში “ტულუზამ” ლელოთი და გარდასახვით სხვაობა ათ ქულამდე დაიყვანა, თუმცა, ორ წუთში “კასტრმა” მე-3 ლელო გაიტანა, 64-ე წუთზე კი, პრემიის მომტანი მე-4 ლელოს გატანით, საბოლოო შედეგი დააფიქსირა. ამრიგად, “კასტრი” 41 ქულით “პერპინიანს” კვალში უდგას, საქართველოს ეროვნული ნაკრების პირველხაზელი კი, კლუბშიც ერთ-ერთი ლიდერია, რაზეც ისიც მეტყველებს, რომ მან Top 14-ის 13-ვე შეხვედრაში მიიღო მონაწილეობა.
მეორე ცენტრალურ მატჩში დავით ზირაქაშვილის “კლერმონმა” ქართული ფესვების, მაგრამ საფრანგეთის მოქალაქეობის მქონე დიმიტრი იაშვილის “ბიარიცს” უმასპინძლა და სწორედ იაშვილის გამოისობით, 13:16 დამარცხდა. ქართველი პირველხაზელი ძირითად შემადგენლობაში იყო და სრულად ითამაშა, მისი გუნდი კი, 27-ე წუთზე ლელოთი და გარდასახვით 7:0 დაწინაურდა. ტაიმის მიწურულს რეფერიმ მასპინძლებს მორაგბე გაუსინბინა და დიმიტრი იაშვილმა სხვაობა შეამცირა, თუმცა, კაცნაკლულმა “კლერმონმა” ჯარიმით 7-ქულიანი უპირატესობა აღადგინა. რიცხვობრივ უმცირესობაში მყოფმა მასპინძლებმა, მე-2 ნახევრის დასაწყისში მორიგი ჯარიმა დაიმსახურეს და 10 ქულით დაწინაურდნენ, მაგრამ მეტი ვეღარ შეძლეს. დარჩენილ დროში იაშვილმა 2 ჯარიმა გაიტანა, 79-ე წუთზე სტუმრებმა ლელო მიითვალეს, რასაც იაშვილის ზუსტი გარდასახვა მოჰყვა და “კლერმონიც” მხოლოდ ერთი პრემიალური ქულის ამარა დარჩა. სხვათა შორის, ზირაქაშვილს საკუთარი გუნდის რიგებში, Top14-ის წლევანდელ გათამაშებაში სულ 8 თამაში აქვს ჩატარებული და ეს პირველი შემთხვევა იყო, როდესაც მოედანზე სათადარიგოთა სკამიდან შევიდა, სხვა შემთხვევებში კი, მუდამ ძირითად შემადგენლობაში ხვდებოდა. მიუხედავად მარცხისა, “კლერმონი” 36 ქულით, ჯერჯერობით, მესამეზეა და პირველ-მეორე ადგილზე აღზევების კარგ შანსსაც ინარჩუნებს. რაც შეეხება “ბიარიცს”, ის 32 ქულით საფლეიოფო ექვსეულში დაბრუნდა და თან ერთი შეხვედრით ნაკლები აქვს ჩატარებული.
არცთუ კარგი დასაწყისის შემდეგ, წარმატებულ სვლას განაგრძობს მამუკა გორგოძისა და გიორგი ჩხაიძის “მონპელიე”, რომელსაც აგერ უკვე ზედიზედ მე-4 გამარჯვება დაუგროვდა და საფლეიოფო ექვსეულსაც მიუახლოვდა. მე-13 ტურში “მონპელიე” “ბურგონს” ეწვია და დრამატულ ბრძოლაში გამარჯვება ბოლო წუთებზე მოიპოვა. პირველ ნახევარში, თითო-თითო ლელოს, გარდასახვისა და ჯარიმის საპასუხოდ, სტუმრებმა 3 ჯარიმა გაიტანეს და საწყისი 40 წუთი მინიმალური სხვაობით დათმეს (9:10), მე-2 ტაიმის მე-8 წუთზე კი, ლელო და გარდასახვა გაიტანეს და 6 ქულით დაწინაურდნენ. შეხვედრის დასრულებამდე 15 წუთით ადრე თავისი წილი ლელო-გარდასახვა მასპინძლებმაც მიითვალეს და ქართველ ლეგიონერთა გუნდი კვლავ მდევრის როლში აღმოჩნდა, 74-ე წუთზე კი “ბურგონმა” ჯარიმაც მიითვალა. მაგრამ მონპელიე არ დანებდა, შეხვედრის ბოლო წუთზე მიძალება ლელოთი დააგვირგვინა, რასაც ზუსტი რეალიზაციაც დაერთო და საბოლოო ჯამში, 23:20 იმარჯვა. ქართველ ლეგიონერთაგან ამ შეხვედრაში მონაწილეობა მხოლოდ გიორგაძემ მიიღო, რომელიც “მონპელიეს” ერთ-ერთ ლიდერად ითვლება და “იაგუარებთან” თამაშის შემდეგ კლუბს დაუბრუნდა. საქართველოს 2008 წლის საუკეთესო მორაგბე ძირითად შემადგენლობაში იყო და შერკინების მე-3 ხაზში სრულად ითამაშა. მას წლეულს საფრანგეთის ჩემპიონატში 9 შეხვედრა აქვს ჩატარებული, აქედან 8-ჯერ ძირითად შემადგენლობაში იყო და მთლიანობაში 622 სათამაშო წუთი დააგროვა. რაც შეეხება გიორგი ჩხაიძეს, მაჯაში ნავისებური ძვლის მოტეხილობის შემდეგ, ექიმებმა მას თამაშის ნება კი დართეს, მაგრამ კლუბის შემადგენლობაში ჯერ ვერ ხვდება და ეროვნულ გუნდთან ერთად “იაგურების” ძლევის შემდეგ, ნაკრებს იტალიაშიც ახლდა, რის გამოც, ბუნებრივია, ამ თამაშისთვის კლუბის განაცხადშიც ვერ მოხვდა. “მონპელიეს” 13 თამაშის შემდეგ 29 ქულა აქვს, ამჟამად მე-9 ადგილზეა და საფლეიოფო მე-6 ადგილს სულ რაღაც 3 ქულა აშორებს.
წესითა და რიგით Top 14-ის ამ ტურში ქართული დერბი უნდა შემდგარიყო, მაგრამ “ტულონელი” დავით ქუბრიაშვილი და “ბრიველი” დავით ხინჩაგიშვილი, ეროვნული გუნდის მაისურებით ერთურთის გვერდზე იდგნენ და მათმა გუნდებმაც უქართველებოდ იბურთავეს. მართალია, “ტულონის” საჩემპიონატო განაცხადში ლევან ჩილაჩავას სახელი და გვარიც ფიგურირებს, მაგრამ ის სათადარიგოთა სკამზეც ვერ ხვდება. “ტულონმა” “ბრივი” საკუთარ მოედანზე 19:10 დაამარცხა და 34 ქულით სატურნირო ცხრილში მე-5 საფეხურზეა, “ბრივი” კი 24 ქულით მე-11-ეა და გასავარდნი ზონის სიახლოვეს ტრიალებს - მას მე-13 ადგილთან ერთი ქულა აშორებს.
ზედიზედ მეორედ წააგო გოდერძი შველიძისა და ბექა შეყლაშვილის “მონტობანმა”, რომელიც თოპ 14-ში დასარჩენად ბრძოლაში ერთ-ერთ კონკურენტ “ბაიონს” ეწვია და 13:38 დამარცხდა, თანაც მეტოქისგან 5 ლელო მიიღო და მას პრემიალური ქულაც ააღებინა. შეყლაშვილი ძირითად შემადგენლობაში იყო და მოედანზე 69 წუთი გაატარა, შველიძე კი თამაშში 61-ე წუთიდან ჩაერთო, მაგრამ მათმა გარჯამ “მონტობანს” ვერ უშველა. შეხვედრა უხეში გამოდგა. პირველი ტაიმის მიწურულს რეფერიმ სტუმართა მოთამაშეს წითელი ბარათი უჩვენა და მთელი 40 წუთით 14 კაცის ამარა დატოვა. გარდა ამისა, მე-2 ნახევარში მასპინძელთა 3 და სტუმართა ერთი მორაგბე გაასინბინა. მასპინძლები თავიდანვე დაწინაურდნენ და უპირატესობა ხელიდან არ გაუშვეს, ტაიმი კი 18:7 მოგეს, ხოლო მე-2 ნახევარში უპირატესობა კიდევ უფრო გაზარდეს. “მონტობანი” 25 ქულით მე-10 ადგილზეა.
ტურის კიდევ ერთ შეხვედრაში “მეტრო რასინგმა” “სტად ფრანსეს” 20:18 სძლია. Top 14-ის მომდევნო რაუნდი 27-28 ნოემბერს გაიმართება.

ზურა ქსოვრელი