გასულ უქმეებზე გამართულ ტესტთა უმრავლესობაში ბრძოლა თითქმის არ შედგა. სამხრეთის მე-2 ეშელონის გუნდებმა, პრაქტიკულად, უშანსოდ წააგეს, სამხრეთ აფრიკის ნაკრებმა ევროტურზე პირველი გამარჯვება იზეიმა, ახალი ზელანდია კი, კვლავაც დაუმარცხებელია.
ყველაზე დაძაბული შოტლანდიისა და ავსტრალიის ეროვნული ნაკრებების დაპირისპირება გამოდგა. სქოთებს მეტოქესთვის 1981 წლის შემდეგ არ მოეგოთ და შესაძლოა, ეს უსიამოვნო ტრადიცია ახლაც გაეგრძელებინა, მაგრამ ამჯერად იღბალმა მათ ზურგი არ აქცია, ჟიტომ საშინელი შეხვედრა ჩაატარა და ევროპელებმა 9:8 იმარჯვეს. შეხვედრის დასაწყისში ორივე გუნდმა, ტრავმის გამო, თითო-თითო მორაგბე დაკარგა - ავსტრალიელებს რობინსონი დაემტვრათ, შოტლანდიელებს კი - გუნდის კაპიტანი კუსიტერი, რომელმაც ეშლი-კუპერის კარგი გარღვევა მხრის ტრავმის ხარჯზე შეაჩერა.
“კენგურუებმა” დასაწყისშივე მოიპოვეს სათამაშო უპირატესობა, მაგრამ 27-ე წუთზე, თამაშის მსვლელობის საწინააღმდეგოდ, მასპინძლები გოდმენის ჯარიმით დაწინაურდნენ. ჟიტო ვალდებული იყო, რომ წონასწორობა მალევე აღედგინა, მაგრამ ორჯერ გასატანი ჯარიმა გააფუჭა, რაც იმას უნდა ნიშნავდეს, რომ შემდეგ შეხვედრაში ძირითად შემადგენლობაში ვეღარ მოხვდება. მე-2 ტაიმი 2 წუთის განახლებული იყო და ჟიტომ, ამჯერად, დაახლოებით 40 მეტრიდან ააცილა ჯარიმა, მაგრამ წინა ცდებთან შედარებით, ეს საპატიოდ უნდა ჩაითვალოს. ავსტრალიამ შეტევები განაგრძო და მათმა კაპიტანმა, როკი ელსომმა მასპინძელთა ჩათვლის მოედანში შეაღწია, მაგრამ ვიდეორეფერიმ ლელო არ ჩათვალა.
ამ ფონზე შოტლანდიელებმა კარგი კონტრშეტევა განახორციელეს, როდესაც დე ლუკამ ბურთი ფეხით მეტოქის ზურგს უკან გადაკიდა და ვილ გენიამ თამაშის წესი დაარღვია, გოდმანმა კი ჯარიმა გამოიყენა - 6:0. “კენგურუებმა” დიდი ძალებით შეუტიეს და 65-ე წუთზე კროსმა ლელო გაიტანა, მაგრამ გარდასახვა არაზუსტი გამოდგა. შეხვედრის დასრულებამდე 4 წუთი რჩებოდა, როდესაც შეცვლაზე შესულმა პატერსონმა, 25 მეტრიდან გატანილი არეკნით მასპინძელთა უპირატესობა ოთხ ქულამდე გაზარდა. ჟიტომ ისღა შეძლო, რომ კომპენსირებულ დროში გატანილი ჯარიმით სხვაობა მინიმუმამდე დაიყვანა და ეს დაძაბული შეხვედრა სქოთთა გამარჯვებით დასრულდა.
წარმატებულ ევროპულ ტურნეს განაგრძობს ახალი ზელანდია, რომელმაც ამ ჯერზე ინგლისის ნაკრები 19:6 იმსხვერპლა. არადა, წინა მატჩთან შედარებით, როდესაც ინგლისელებმა არგენტინას 16:9 მოუგეს, ისინი თვიქნემში უკეთ გაისარჯნენ, მაგრამ ზელანდიელებმა დაამტკიცეს, რომ მსოფლიო რეიტინგის სათავეში ტყუილად არ დგანან. მასპინძლები 3 ქულით ორჯერ დაწინაურდნენ, როდესაც უილკინსონის ორ ჯარიმას შორის, დენ კარტერმა ერთი გაიტანა. თუმცა, მასპინძლებმა მეტის გაკეთება ვერ შეძლეს, აი “შავებმა” კი მონაგარს კარტერის ორ ჯარიმასთან ერთად (ერთი პირველ ნახევარში და ტაიმი 6:6 დასრულდა), მე-2 ტაიმში კოუენის ლელო და იმავე კარტერის ზუსტი რეალიზაცია მიაყოლეს, რის შედეგადაც რეიტინგის სათავეში ადგილს კიდევ უფრო გაიმყარებენ.
როგორც იქნა, ევროპულ ტურნეზე მე-4 ცდიდან იმარჯვა მსოფლიოსა და “სამი ერის” მოქმედმა ჩემპიონმა, სამხრეთ აფრიკამ. ისინი უდინეში იტალიის ნაკრებს დაუპირისპირდნენ და მასპინძლებს 32:10 სძლიეს, თუმცა, ამ მოგებამ მსოფლიო ჩემპიონის შერყეული რეპუტაცია სულაც ვერ აღადგინა, რადგან იტალიელებმა მარცხი საკუთარ თავს უნდა დააბრალონ. მათ ბევრი ჯარიმა გაუცუდდათ და ასე რომ არ მოხმდარიყო, კაცმა არ იცის, შეხვედრა როგორი შედეგით დასრულდებოდა.
ტაიმი აფრიკელებმა სულ რაღაც 12:7 მოიგეს, მაგრამ მე-2 ტაიმის დასაწყისში 2 ლელო გაიტანეს და მეტოქისთვის მიუწვდომელნი გახდნენ. საგულისხმოა, რომ ევროპელებმა მეტოქეს შერკინებაში არაფერი დაუთმეს, “შპრინბოკის” ლელოები კი უკანახაზელთა ანგარიშზეა (ჰაბანა, ფური, დუ პრესი და ოლივიერი). იტალიელთაგან ერთადერთი ლელო გარსიამ მიითვალა.
შეინ უილიამსის ბრწყინვალე გარჯამ არგენტინის ეროვნულ ნაკრებს უელსთან შანსი არ დაუტოვა და მასპინძლებმა კარდიფში 33:16 იმარჯვეს. უელსელმა 2 ლელო მიითვალა, აქედან მეორე, საჭირო დროს ლამაზ ინდივიდუალურ გარღვევას მოჰყვა. სამხრეთელებმა შეხვედრა უხეშად ჩაატარეს. მხოლოდ როდრიგო რონსერომ, თამაშის წესი იმდენჯერ დაარღვია, რამდენჯერაც ლამის მთელმა უელსის ნაკრებმა, ევროპელებმა კი საწყისი 30 წუთი სუფთად ჩაატარეს და ერთი ჯარიმაც არ “აიკიდეს”. გარდა ამისა, უელსელებს ტექნიკური წუნიც ნაკლები ჰქონდათ და პირველ ტაიმში სტეფან ჯონსის ლელოთი, გარდასახვით და 2 ჯარიმით, 13:0 დაწინაურდნენ. როდრიგესმა, ზედ შესვენების წინ, ჯარიმით სხვაობა კი შეამცირა, მაგრამ მე-2 ტაიმი 21 წამის დაწყებული იყო, როდესაც უილიამსმა თავისი პირველი ლელო გაიტანა. არგენტინელთაგან კვლავ როდრიგესმა გაიბრძოლა და საათის თავზე 2 ჯარიმით, ლელოთი და გარდასახვით, ჩამორჩენა შვიდ ქულამდე დაიყვანა - 16:23, მაგრამ სამხრეთელებს შეხვედრის გადარჩენის იმედი 65-ე წუთზე უილიამსის ლელომ მოუსპო. მან თავისუფალი სწრაფად გაითამაშა და არგენტინელთა დაცვაში ტყვიასავით გაძვრა, რითაც მეტოქის გამოხტომას მომენტალური პასუხი გასცა.
ამრიგად, შეინ უილიამსი საერთაშორისო მატჩებში გატანილი ლელოებით მე-3 ადგილზე გადავიდა. ახლა მის ანგარიშზე 69 შეხვედრაში 50 სანაკრებო ლელოა და ამ მაჩვენებლით, ინგლისელ რორი ანდერვუდს გაუთანაბრდა.
“მსგავს მიღწევაზე არც კი მიფიქრია და არ მეგონა, რომ ამის გაკეთებას მოვახერხებდი. ახლაც ჩემი მიღწევის შესახებ სხვამ შემახსენა. ჯერ კიდევ მშიერი ვარ. ლელობს იქამდე გავიტან, სანამ დილაობით ლოგინიდან ადგომის თავი მექნება” - თქვა უილიამსმა ნამატჩევს.
აქვე იმ მოქმედ მორაგბეებს შეგახსენებთ, რომლებიც საერთაშორისო მატჩებში გატანილი ლელოებით ლიდერობენ - 1. დაისუკე ოჰატა (იაპონია) - 69 ლელო (58 თამაშში), 2. დავიდ კამპეზე (ავსტრალია) - 64 (101), 3-4. რორი ანდერვუდი (ინგლისი, ბრიტანელი და ირლანდიელი ლომები) - 50 (91), 3-4. შეინ უილიამსი (უელსი, ბრიტანელი და ირლანდიელი ლომები) - 50 (69), 5. დუგ ჰაულეტი (ახალი ზელანდია) - 49 (62), 6. კრისტიან კულენი (ახალი ზელანდია) - 46 (58), 7. ჯო როკოკოკო (ახალი ზელანდია - 45 (60)... 11-12. ბრაიან ოდრისკოლი (ირლანდია, ბრიტანელი და ირლანდიელი ლომები) - 39 (101)... 16. ბრაიან ჰაბანა (სამხრეთ აფრიკა) - 36 (56).
საფრანგეთის ნაკრებმა “სტად ფრანსეზე” სამოას 7 ლელო გაუტანა და მეტოქე 43:5 გაანადგურა. ერთი კვირის წინათ, სამხრეთ აფრიკასთან გამარჯვებულ შემადგენლობაში, ძალიან ბევრი ცვლილება იყო და ახლა მწვრთნელს თავსატეხი გაუჩნდა, თუ ვინ ათამაშოს მომავალ ტესტში ახალი ზელანდიის წინააღმდეგ. ფაქტი ერთია - საფრანგეთში ტალანტები მრავლად არიან და სავარაუდოდ, ამ გუნდს უახლოეს პერიოდში დიდი პროგრესი ელის. ფრანგებმა მხოლოდ ლელოს გატანაზე ითამაშეს და 43:0-ს იგებდნენ, როდესაც სამოელებმა ერთი პრესტიჟის ლელოს გატანა მოახერხეს.
თავის მხრივ, დუბლინში ირლანდიამ 5 ლელო გაუტანა ფიჯის და ის 41:6 დასცა. აღსანიშნავია, რომ დებიუტანტმა სექსტონმა ყველა რეალიზაცია გამოიყენა და მონაგარს ზედ 2 ჯარიმაც დაურთო. იაპონიამ კანადას ერთი კვირის წინანდელზე ცოტა სხვაობით აჯობა - 27:6, შოტლანდიის A ნაკრები კი ტონგას დაუხვდა და 38:7 იმარჯვა.

ზურა ქსოვრელი
P.S.  პორტუგალია - `იაგუარები~ 13:24