ამერიკის შეერთებული შტატების მორაგბეთა ეროვნულმა ნაკრებმა, 2011 წელს მსოფლიოს თასის ამერიკის ზონის ფლეი ოფში, ფლორიდაში გამართულ განმეორებით შეხვედრაში, ურუგვაის 27:6 სძლია და ახალი ზელანდიის საგზური მოიპოვა.
ერთი კვირის წინათ, მონტევიდეოში 27:22 გამარჯვების შემდეგ, ირლანდიელი ედი ოსალივანის გაწვრთნილებს ხუთ ქულაზე მეტი სხვაობით არ უნდა წაეგოთ, მაგრამ მათ ამოცანა გადაჭარბებით შეასრულეს და მეტოქეს ორი მატჩის ჯამში, 54:28 აჯობეს.
თამაშის დასაწყისში, რომელსაც 2237 მაყურებელი დაესწრო, მაიკ ჰერკუსმა მასპინძლები ჯარიმით დააწინაურა, რასაც ლუის სტენფილმა და კევინ სვირინმა ზედ 2 ლელო დაურთეს. ამაზე ურუგვაელებმა მხოლოდ ახალგაზრდა ეჩევერის 2 ჯარიმით უპასუხეს და ტაიმი აშშ-მა 13:6 მოიგო. მე-2 ნახევარში გუნდის კაპიტანმა, ტოდ კლევერმა თავი გამოიდო და 2 ლელო გაიტანა, რასაც ამ ჯერზე ზუსტი გარდასახვები მოჰყვა და საბოლოო შედეგი დაფიქსირდა.
აშშ-ის მთავარი მწვრთნელი, ედი ოსალივანი მსოფლიოს თასზე გასვლით და ორ შეხვედრაში გატანილი 8 ლელოთი კმაყოფილი დარჩა. “ძალიან ბედნიერი ვარ. ჩვენმა დაცვამ კარგად ითამაშა, თუმცა, მოსამზადებლად საკმარისი დრო არ გვქონდა. ნუ დაგავიწყდებათ, რომ ორ შეხვედრაში 8 ლელო გავიტანეთ და გასულ კვირასთან შედარებით, დღეს ბევრად უკეთ ვითამაშეთ. ურუგვაიმ დიდი წინააღმდეგობა გაგვიწია და რეპეშაჟში მათი თამაშის ხილვა მართლაც რომ საინტერესო იქნება” - თქვა ოსალივანმა.
ამრიგად, მსოფლიო თასის C ჯგუფში აშშ ავსტრალიის, ირლანდიისა და იტალიის ნაკრებებს შეუერთდა, მე-5 გუნდის ვინაობა კი მარტში, ევროპის შესარჩევი ზონის დასრულების შემდეგ გაირკვევა და ჯგუფს მეორეადგილოსანი შეავსებს. შესაძლოა, ის საქართველოს ნაკრებიც იყოს. საგულისხმოა, რომ აშშ-ს ამჟამინდელი მთავარი მწვრთნელი, ედი ოსალივანი, ადრე ირლანდიის ეროვნულ გუნდს წვრთნიდა და ახლა ყოფილი შეგირდების დასამარცხებლად იბრძოლებს. აშშ-ს ნაკრები ახალ ზელანდიაში ნიუ პლიმუთში, ველინგტონსა და ნელსონში ითამაშებს.
რაც შეეხება ურუგვაის, მას ახალ ზელანდიაში მოსახვედრად საკონტინენტთაშორისო რეპეშაჟში გამარჯვება მართებს და დიდი შანსია, რომ იქ ევროპის წარმომადგენელს შეხვდეს. ევროპის შესარჩევ ზონაში მე-3 ადგილზე გასული გუნდი, რეპეშაჟის პირველ ეტაპზე უკრაინას შეხვდება, ამ წყვილის გამარჯვებული აფრიკის ზონის ფლეი ოფში დამარცხებულ გუნდს დაუპირისპირდება (ამ ფლეი ოფში ნამიბიისა და ტუნისის გუნდები თამაშობენ და პირველ შეხვედრაში ნამიბიამ სტუმრად 5 ქულის სხვაობით იმარჯვა, განმეორებითი მატჩი კი მომავალ შაბათს გაიმართება), აფრიკისა და ევროპის გუნდებს შორის მოგებული კი, ახალი ზელანდიის ბოლო საგზურისთვის ურუგვაის მიმოსვლით შეერკინება.

ზურა ქსოვრელი