საქართველოს შიდა სარაგბო სეზონი წლის უმთავრესი მატჩით დასრულდება - თასის ფინალში ჩემპიონატის არშემდგარი ფინალი აღსრულდება და “ლელო” “ლოკომოტივთან” ჯახში დუბლის შესრულებას ეცდება.
თუ ქვეყნის მოქმედ ჩემპიონს და თასის მფლობელს დუბლის შესრულება სურს, “ლოკომოტივი”, ჩემპიონობის დათმობის შემდეგ, სეზონის უტიტულოდ დასრულებას არ აპირებს. 
თასის გადამწყვეტ მატჩს ორივე გუნდი პრაქტიკულად უძლიერესი შემადგენლობით ხვდება, რადგანაც მიკროტრავმები ყურადსაღები არაა, სხვა მხრივ გუნდებს სრული საბრძოლო განწყობა აქვთ. ერთი ესაა, “ლელო”, რომელიც ფინალში მეტოქის უარის გამო მოხვდა, უთამაშებლობას უჩივის, “ლოკომოტივმა” კი 1/2-ფინალში კარგი გაკვეთილი გაირა. თასის ფინალი 29 ნოემბერს, “მიხეილ მესხზე” 14:00 საათზე დაიწყება და ტრადიციისამებრ, მასზე დასწრება უფასო იქნება.
ფინალის წინ გუნდების მზადყოფნის შესახებ მათმა მწვრთნელებმა რაგბის კავშირში გამართულ პრესკონფერენციაზე ისაუბრეს.
თემურ ბენდიაშვილი (“ლოკომოტივის” მთავარი მწვრთნელი): “ლელო” ახლა აღმავლობას განიცდის და ჩემპიონატის ფლეი-ოფშიც გვაჯობა, მაგრამ გვსურს ყველას ვანახოთ, რომ ჩვენ საუკეთესოები ვართ. ფინალი მუდამ დაძაბულია და ახლაც ასე იქნება. წინა მატჩებში რამდენიმე წამყვანი მორაგბე გვაკლდა და მარცხის ამის ბრალი იყო, ახლა კი ყველა მწყობრში გვყავს”.
ლევან მაისაშვილი (“ლელოს” მთავარი მწვრთნელი): “სამწუხაროდ, მზადებაში სერიოზული წყვეტა გვქონდა. კარგი იქნებოდა, საპასუხო 1/2-ფინალური შეხვედრა გვეთამაშა, მაგრამ “აია” სათამაშოდ ვერ ჩამოვიდა და ამ კუთხით პრაქტიკა გვაკლია, “ლოკომოტივს” კი ასეთი პრობლემა არ აქვს. მორაგბეებს მიკრო ტრავმები აწუხებთ, ძირითადის 4 მოთამაშე კი გაციებულია. მიუხედავად ყველაფრისა, ზედიზედ 25 თამაში გვაქვს მოგებული და ტრადიციის დარღვევას არც ახლა ვაპირებთ. “ლოკომოტივს” ფინალების მოგების დიდი გამოცდილება აქვს, მაგრამ ამ ჯერზე ჩვენ დუბლის შესრულებას ვეცდებით”.
საქართველოს თასი “ლოკომოტივს” აქამდე 6-ჯერ აქვს მოპოვებული, აქედან 4-ჯერ ზედიზედ, “ლელო” კი მას ჯერჯერობით ერთადერთხელ, შარშან დაეუფლა. მაშინ “ლელომ” ლოკომოტივი” 1/2-ფინალურ ეტაპზე ჩამოიცალა, როდესაც პირველ შეხვედრაში მარცხის შემდეგ, საპასუხო მატჩში უფრო დიდი სხვაობით იმარჯვა.

ზურა ქსოვრელი