მორაგბეთა მსოფლიოს 2011 წლის ჩემპიონატის დასაკომპელქტებლად 4 გუნდის გარკვევაღა დარჩა საჭირო. აქედან ერთი ადგილისთვის აზიის წარმომადგენლები იბრძოლებენ და უდიდესი სენსაცია მოხდება, ეს გუნდი იაპონიის ნაკრები თუ არ იქნება.
დანარჩენი 3 ადგილიდან 2 ევროპის ზონის შესარჩევი ეტაპის პირველ-მეორე ადგილოსანს ერგება, მე-4 ადგილისთვის კი, გუნდები საკონტინენტთაშორისო რეპეშაჟში იბრძოლებენ. რეპეშაჟში მონაწილე 4 გუნდიდან 3 ცნობილია - პირველ ეტაპზე, უკრაინის ეროვნული ნაკრები, ევროპის “ერთა თასის” 2 წლის ჯამის შედეგად მე-3 ადგილზე გასულ გუნდს შეხვდება, ამ წყვილის გამარჯვებულს აფრიკის ზონიდან ტუნისი ელის, ხოლო აქ მოგებულ გუნდს, ორმატჩიან ჯახში ურუგვაისთან მოუწევს სიტუაციის გარკვევა.
28 ნოემბერს, მსოფლიოს თასის მონაწილე მე-16 გუნდის სტატუსი ნამიბიამ მოიპოვა, რომელმაც ტუნისს ორი მატჩის ჯამში 40:23 აჯობა. ტუნისში 18:13 მოგების შემდეგ, ნამიბიელებს საკუთარ მოედანზე, ვინდჰუკში უფრო დიდი სხვაობით არ უნდა წაეგო. სხვათა შორის, ორი კვირის წინანდელი შედეგი, ამ გუნდების დაპირისპირებაში პირველი იყო, როდესაც გამარჯვება სტუმრებს დარჩათ და ახლა იგივეს განმეორებას ტუნისი ეცადა, მაგრამ დაძაბულ და რთულ ბრძოლაში 10:22 დამარცხდა, არადა, პირველი ტაიმის შემდეგ სტუმრები 10:9-ს იგებდნენ.
ტუნისელები უდისციპლინობამ დააღალატა, თამაშგარეს წესი არაერთხელ დაარღვიეს და მეტოქეს ბლომად ჯარიმები უბოძეს. შეცდომები ჰქონდათ შერკინებაში თამაშშიც. მთლიანობაში უხეშ შეხვედრაში, რომლის ბოლოსაც გუნდური ჩხუბი ატყდა, რეფერის 3 ყვითელი და 1 წითელი ბარათის ჩვენება მოუხდა. ტუნისელები სინბინით მე-3 წუთზევე დაისაჯნენ, როდესაც მათი კაპიტანი განზრახ ჯარიმისთვის გაასინბინეს, ნამიბია კი, ვესელსის ჯარიმით დაწინაურდა. ოთხ წუთში მასპინძლებს სალელოვე შანსი მიეცათ, მაგრამ ფეხით ფლანგზე გადაკიდებულმა ბურთმა ჩათვლის მოედანი დატოვა.
ტუნისმა მე-14 წუთზე, დაახლოებით, 22 მეტრიდან არეკნით წონასწორობა აღადგინა. ამან სტუმრები შეტევის იშტაზე მოიყვანა და მეტოქის ჩათვლის მოედანს ერთ მეტრამდე მიუახლოვდნენ, მაგრამ ხაზის გადაკვეთა ვეღარ შეძლეს, ვესელსმა კი 28-ე წუთზე ნამიბიას ლიდერობა დაუბრუნა, ოღონდ დროებით. ექვს წუთში ნამიბიელთა ფლანგელმა შეტევა დაიწყო, მაგრამ ის შებოჭეს, კონტრშეტევას კი ტუნისელთა ლელო მოჰყვა, ხოლო ზუსტმა გარდასახვამ მასპინძლები განმეორებითი შეხვედრისთვის სასურველ სხვაობას მიუახლოვა - 10:6. ტუნისელებს სასურველი შედეგის მისაღებად მეტოქეზე ერთით მეტი ჯარიმა უნდა გაეტანა, მაგრამ ჯერ კიდევ შესვენებამდე, მასპინძლებმა ორჯერ დაარტყეს გასატანი ჯარიმა, აქედან ერთი გამოიყენეს და ჩამორჩენა მინიმუმამდე დაიყვანეს.
მე-2 ტაიმი მასპინძლებმა კიდევ უფრო აქტიურად დაიწყეს და მალე ჯარიმის უფლება მოიპოვეს, მაგრამ ახლო მანძილიდან დარტყმა ამ ჯერზეც გაუცუდდათ, თუმც კი, რამდენიმე წუთში მსგავსი შანსი გამოიყენეს და 12:10 დაწინაურდნენ. თამაშის დაწყებიდან საათის თავზე, ნამიბიელებმა ხელდახელ კარგი შეტევა განახორციელეს, ლამის ნახევარი გუნდის მონაწილეობის შემდეგ კი, დიუ პლესმა ლელო გაიტანა, რასაც ზუსტი რეალიზაცია დაერთო და ცხადი გახდა, რომ მასპინძლები აღარ წააგებდნენ. მალე ტუნისელები სინბინის გამო კვლავ კაცნაკლულნი დარჩნენ, მაგრამ ბოლო ძალები მოიკრიბეს და ნამიბიელთა ჩათვლის მოედნიდან ხუთ მეტრში დასცეს ბანაკი. მათ 6-ჯერ ჰქონდათ ხაზის ძალისმიერი მეთოდით გადაკვეთის მცდელობა, მაგრამ მასპინძელთა დაცვამ გაძლო, ბოლოს კი სტუმრებმა არეკნი სცადეს და მიზანს ააცილეს. მასპინძლებმა დაცვაში ყურადღებით თამაშის შედეგად, მეტოქეს დაჯარიმება აიძულეს და საბოლოო ანგარიშიც დააფიქსირეს, რითაც ფინალის საგზური დამსახურებულად დაიბევეს.
ამრიგად, ახალ ზელანდიაში D ჯგუფი სრულად დაკომპლექტდა და იქ ნამიბიის ნაკრების მეტოქეები მსოფლიოს მოქმედი ჩემპიონი სამხრეთ აფრიკა, უელსი, ფიჯი და სამოა იქნებიან.

ზურა ქსოვრელი