საფრანგეთის მორაგბეთა პირველ ელიტარულ დივიზიონ Top 14-ის მე-14 ტურში, საკუთარი გუნდის რიგებში ყველა ქართველმა ლეგიონერმა ითამაშა, რაც იშვიათი მოვლენაა. მათგან ყველაზე მეტად დავით ზირაქაშვილი გამოირჩა, რომელმაც მიმდინარე სეზონში, “კლერმონის” რიგებში მერვე შეხვედრა დაიწყო ძირითად შემადგენლობაში, სულ 9 მატჩი აქვს ჩატარებული და ელიტარულ დივიზიონში, სეზონში ლელოთა ქართული ანგარიში გახსნა.
ზირაქაშვილის “კლერმონი”, რომელმაც ბოლო პერიოდში სვლას უკლო და 4 შეხვედრიდან ორჯერ დამარცხდა (ოღონდ 7 ქულაზე ნაკლები მარცხისათვის ორივეში თითო-თითო პრემიალური ქულა აიღო), დანარჩენ ორში მხოლოდ ფრეს დასჯერდა, ხოლო ბოლო მატჩამდე ჩატარებულ ექვს დაპირისპირებაში გამარჯვებას მხოლოდ ერთხელ მიაღწია, ამ ჯერზე “ბურგონი” საკუთარ მოედანზე გამოიჭირა და 15 230 მაყურებლის წინაშე, 32:3 გაანადგურა. მასპინძლებმა თავიდანვე აქტიურად დაიწყეს თამაში და 35-ე წუთზე 2 ლელოთი და თითო-თითო გარდასახვით, ჯარიმით და არეკნით 18:0 დაწინაურდნენ. სტუმრებმა საკუთარი წილი ჯარიმა მალევე გაიტანეს, ზედ შესვენების წინ კი, საქართველოს ნაკრების პირველხაზელის თავგამოდებამ შედეგი მოიტანა და ზედ სასტვენის წინ ლელო გაიტანა, რასაც ზუსტი რეალიზაცია მოჰყვა. მე-2 ტაიმში საინტერესო ისღა მოხდა, რომ “ბურგონი” 10-10 წუთით ორჯერ დარჩა კაცნაკლული, “კლერმონმა” კი 68-ე წუთზე მორიგი ლელო გაიტანა და გამარჯვების ოთხთან ერთად, ერთი პრემიალური ქულაც ჩაიწერა. ზირაქაშვილმა მოედანზე 70 წუთი დაჰყო, მის გუნდს კი, 41 ქულა მოუგროვდა და მე-3 ადგილზეა. აღსანიშნავია, რომ ღორის გრიპის გამო, ქვეყნის ჩემპიონმა “პერპინიანმა” “ბაიონთან” საკუთარი მატჩი ვერ გამართა, თამაშნაკლულს, “კლერმონის” მსგავსად, 41 ქულა აქვს და მეტოქეს მხოლოდ უკეთესი მაჩვენებლების წყალობით ჯობნის.
“პერპინიანის” გადადებული თამაშით კარგად ისარგებლა აქვსენტი გიორგაძის “კასტრმა”, რომელმაც დიმიტრი იაშვილის “ბიარიცი” 34:6 დაიბრიყვა, პრემიალური ქულაც მიითვალა და 46 ქულით სატურნირო ცხრილის სათავეში აღზევდა. გიორგაძე ძირითად შემადგენლობაში იყო და მოედანზე 52 წუთი გაატარა. იაშვილმა პირველ ტაიმში 2 ჯარიმა გაიტანა და 38-ე წუთამდე “ბიარიცი” სულ რაღაც 6:9-ს აგებდა, მაგრამ შესვენებამდე მასპინძლებმა ჯარიმის, ლელოს და გარდასახვის გატანა მოასწრეს და შესვენებაზე გასვლისას უკვე 19:6 იგებდნენ. მეორე ტაიმის დასაწყისში “კასტრმა” კიდევ ლელო მიითვალა, მერე რეფერიმ იაშვილი გაასინბინა და მასპინძლებმაც საქმე გამარჯვებამდე ზედმეტი გართულებების გარეშე მიიყვანეს.
მნიშვნელოვანი გამარჯვება, თანაც სტუმრად უშუალო კონკურენტ “სტად ფრანსესთან” მოიპოვა დავით ქუბრიაშვილის “ტულონმა”, ვინაც მეტოქე 22:18 დასცა. ქართველი ლეგიონერი ძირითად შემადგენლობაში იყო და 73 წუთი ითამაშა, შეხვედრამ კი დაძაბულა ბრძოლაში ჩაიარა. მასპინძლები ლელოთი მე-3 წუთზე დაწინაურდნენ, რასაც 4 წუთში უილკინსონმა ჯარიმით უპასუხა, 34-ე წუთამდე კი მასპინძლებმა არეკნით და ჯარიმით უპირატესობა 8 ქულამდე გაზარდეს - 11:3. სამაგიეროდ ტაიმის ბოლო “ტულონისა” იყო, ვინაც ჯერ ლელო გაიტანა, უილკინსონმა კი ზუსტ გარდასახვას ზედ სასტვენის წინ არეკნიც მიაყოლა და მისმა გუნდმა პირველი ნახევარი 13:11 მოიგო. უილკინსონმა ჯარიმა 52-ე წუთზეც დაჰკა, მაგრამ ერთ წუთში “სტად ფრანსემ” ლელოთი და გარდასახვით უპასუხა და 2 ქულით წინ გაიჭრა. ბოლო 20 წუთი კვლავ “ტულონისა” გამოდგა - უილკინსონმა მე-60 და 77-ე წუთებზე კვლავ ჯარიმებიდან იხეირა და საბოლოო ანგარიში დააფიქსირა. ამრიგად, ქუბრიაშვილის გუნდს 38 ქულით სატურნირო ცხრილში მე-5 ადგილი უჭირავს და მეშვიდეზე მყოფ “სტად ფრანსეს” ახლა უკვე 5 ქულით უსწრებს.
ქართული დერბი შედგა გასავარდნი ზონის სიახლოვეს მყოფი დავით ხინჩაგიშვილის “ბრივსა” და მამუკა გორგოძისა და გიორგი ჩხაიძის “მონპელიეს” შორის. სამივე მათგანი ძირითად შემადგენლობაში იყო და ხინჩაგიშვილი შერკინების პირველ ხაზში 77-ე წუთამდე გაისარჯა, ჩხაიძემ და გორგოძემ კი “მონპელიეს” შერკინების მესამე ხაზში სრულად ითამაშეს. “ბრივი” სტუმრად კი თამაშობდა, მაგრამ “მონპელიეს” ერთი ჯარიმის საპასუხოდ 3 ლელო, 2 გარდასახვა და 2 ჯარიმა გაუტანა და 25:3 იმარჯვა. ამრიგად, “ბრივმა” 3 ლელოს გატანისთვის პრემიალური ქულაც მიიღო, საერთო ჯამში 29 დააგროვა, ამდენივე ქულის მქონე “მონპელიეს” უკეთესი მაჩვენებლებით გადაასწრო და თავად მე-9 ადგილამდე აღზევდა, “მონპელიე” კი მე-10 საფეხურამდე დაეშვა.
26 ქულა აქვს და მე-11 პოზიციაზეა გოდერძი შველიძისა და ბექა შეყლაშვილის “მონტობანი”, რომელიც “ტულუზასთან” 12:17 დამარცხდა და მხოლოდ ერთ პრემიალურ ქულას დასჯერდა. შველიძე ძირითად შემადგენლობაში იყო და 58-ე წუთზე მის ნაცვლად მოედანზე შეყლაშვილი შევიდა. “ტულუზამ” პირველ ტაიმში 2 ჯარიმა გაიტანა, “მონტობანმა” კი ლელო და გარდასახვა და ტაიმი 7:6 მოიგო, თანაც 36-ე და მე-40 წუთებზე მორაგბეები გაუსინბინეს და გარკვეული პერიოდი 13 კაცის ამარა გაატარა, მაგრამ გაძლო. უფრო მეტიც, მეორე ნახევრის მე-2 წუთზე, ჯერ კიდევ 13-კაციანმა სტუმრებმა მეორე ლელო გაიტანეს და 12:6 იგებდნენ, მაგრამ შემადგენლობის შევსებამ მათზე ცუდად იმოქმედა. ჯერ ლელო მიიღეს, მერე კი მე-60 და 66-ე წუთებზე 2 ჯარიმაც გაუშვეს და საბოლოოდ დამარცხდნენ.
ტურის კიდევ ერთ შეხვედრაში “მეტრო რასინგმა” “ალბის” 9:6 სძლია, “ბაიონი” და “პერპინიანის” დაპირისპირება კი, როგორც ზემოთ ვახსენეთ, ღორის გრიპის გამო გაურკვეველი ვადით გადაიდო. Top 14-ის მომდევნო ტურის მატჩები სამ დღეზეა გაწერილი და ისინი 4-6 დეკემბერს გაიმართება.
ზურა ქსოვრელი