მართალია, საქართველოს მორაგბეთა 7-კაცა ნაკრებმა 2009./2010 წლების მსოფლიო სერიებზე თამაშის უფლება ვერ მოიპოვა, მაგრამ მის პირველ ეტაპს, რომელსაც დუბაი უმასპინძლებს, საქართველოს წარმომადგენელი მაინც ეყოლება. საქმე ისაა, რომ მსოფლიოს 16 ქვეყნის 7-კაცა ნაკრების მონაწილეობით პირველი ეტაპის პარალელურად, დუბაიში სრული სარაგბო ზეიმი შედგება და სამი დღის განმავლობაში 11 სხვადასხვა ტურნირი გაიმართება - ასაკობრივ გუნდებს, კლუბებსა და ქალთა ნაკრებებს შორის. ძირითადი ტურნირი და გადამწყვეტი შეხვედრები 4-5 დეკემბერს ჩატარდება. ქალთა ტურნირში საქართველოს 7-ქალა ნაკრებიც მიიღებს მონაწილეობას.
7-კაცა რაგბის ოლიმპიურ თამაშებზე დაშვების შემდეგ, დუბაიში ამ სახეობის ყველაზე მასიური შეჯიბრი გაიმართება. მთლიანობაში, 11 ტურნირში - 164 გუნდი და 2 000 მორაგბე ითამაშებს, “ემირატების ავიახაზების ტურნირის” ქალთა სანაკრებო გათამაშებაში კი, 10 გუნდი მიიღებს მონაწილეობას. ჯგუფური ეტაპის მატჩები 4 დეკემბერს გაიმართება, ხოლო ფინალურ შეხვედრებს 5 დეკემბერს დუბაის ცენტრალური, 50 000-იანი არენა უმასპინძლებს.
საქართველოს ქალთა ნაკრები B ჯგუფში შოტლანდიის, კენიელი ლომების, არაბეთის სრუტის ნაკრებთან და Wooden Spoon Rugby-სთან ერთად ითამაშებს, ხოლო A ჯგუფში საფრანგეთის, ამერიკის შეერთებული შტატების, მოსკოვის რეგიონალური ნაკრები, ბანგკოკის “ანგელოზები” და Tuks Ladies-ი მოხვდნენ.
ზურაბ დუგლაძის შეგირდებს ასეთი დონის ტურნირზე და მეტოქეებთან აქამდე არასდროს უთამაშიათ. თავდაპირველად, ისინი მხოლოდ აზერბაიჯანის ნაკრებთან ამხანაგური შეხვედრებით შემოიფარგლებოდნენ, გასულ წელს ახლადშექმნილი ევროპის პირველობის B ჯგუფი (მესამე დონე) დააჭაშნიკეს, წლეულს კი ევროპის ჩემპიონატის ამავე დივიზიონში კიდევ უკეთესი შედეგი (მე-6 ადგილი) აჩვენეს. საქართველოს ნაკრები დუბაიში 2 დეკემბერს გაემგზავრა და პირველ მატჩს შოტლანდიელებთან გამართავს, შემდეგ კენიას დაუპირისპირდება, მესამე ტურში დაისვენებს, მერე კი Wooden Spoon Rugby-ს და არაბეთის სრუტის ნაკრებს შეხვდება. ჯგუფში მე-4 ადგილის დაკავების შემთხვევაში, დუგლაძის გუნდი მეოთხედფინალს ითამაშებს და იქ ნაჩვენები შედეგის მიხედვით საუკეთესო ოთხეულში, ან მე-5-მე-8 ადგილებისათვის იბრძოლებს.
ზურაბ დუგლაძემ დუბაიში 12 მორაგბე წაიყვანა. ესენი არიან: ირინა ლეონიძე, ეკატერინე ბალარჯიშვილი, მარეხ მაისურაძე, ნინო ელოშვილი, ანა პოღოსიანი, შორენა გამსახურდია, ბელა გოგსაძე, ლია გვიანიძე, ნათია ცინცქილაძე, ნათია გიორგაძე, ქეთევან ქობალია, ელისო სურმანიძე.

A ჯგუფი
საფრანგეთი
აშშ
მოსკოვის რეგიონალური ნაკრები
ბანგკოკის “ანგელოზები”
Tuks Ladies

საფრანგეთი - აშშ (10:00)
მოსკოვის რეგიონი - ბანგკოკის “ანგელოზები” (10:20)
საფრანგეთი - Tuks Ladies (12:16)
აშშ - მოსკოვის რეგიონი (12:36)
საფრანგეთი - მოსკოვის რეგიონი (15:52)
ბანგკოკის ანგელოზები - Tuks Ladies (16:12)
საფრანგეთი – ბანგკოკის “ანგელოზები” (18:00)
აშშ - Tuks Ladies (18:20)
აშშ - ბანგკოკის “ანგელოზები” (19:58)
მოსკოვის რეგიონი - Tuks Ladies (20:18)


B ჯგუფი
შოტლანდია
საქართველო
კენიელი ლომები
არაბეთის სრუტის ნაკრები
Wooden Spoon Rugby

შოტლანდია - საქართველო (10:40)
კენია - არაბეთის სრუტე (11:00)
შოტლანდია - Wooden Spoon Rugby (12:40)
საქართველო - კენია (13:00)
შოტლანდია - კენია (16:00)
არაბეთის სრუტე - Wooden Spoon Rugby (16:20)
შოტლანდია - არაბეთის სრუტე (18:40)
საქართველო - Wooden Spoon Rugby (19:20)
საქართველო - არაბეთის სრუტე (20:38)
კენია - Wooden Spoon Rugby (20:58)

მეორე დღე. 5 დეკემბერი. ფლეიოფები
1. A ჯგუფის პირველი - B ჯგუფის IV (9:00)
2. B ჯგუფის II - A ჯგუფის III (9:20)
3. A ჯგუფის II - B ჯგუფის III (9:00)
4. B ჯგუფის პირველი - A ჯგუფის IV (9:20)

სინის ნახევარფინალები (V-VIII ადგილებისთვის)
5. პირველის წაგებული - მეორეს წაგებული (11:00)
6. მესამეს წაგებული - მეოთხეს წაგებული (11:20)
თასის ნახევარფინალები (I-IV ადგილებისთვის)
7. პირველის მოგებული - მეორეს მოგებული (11:40)
8. მესამეს მოგებული - მეოთხეს მოგებული (12:00)
სინის ფინალი (V-VI ადგილისთვის)
მეხუთის მოგებული - მეექვსეს მოგებული (14:40)
თასის ფინალი (I-II ადგილისთვის)
მეშვიდეს მოგებული - მერვეს მოგებული (17:40)

ზურა ქსოვრელი