ახალი ზელანდიის მორაგბეთა 7-კაცა ნაკრებმა, დუბაიში მოგებული მსოფლიო ეტაპიდან ერთი კვირის თავზე, სამხრეთ აფრიკის ქალაქ ჯორჯის ეტაპზეც იპირველა და სერიის სათავეში ქულათა მაქსიმუმით მოექცა.
ფინალურ მატჩში ზელანდიელები ფიჯის გადაეყარნენ და მეტოქე 21:12 დაამარცხეს, უფრო მძიმე თამაშები კი 1/4-ფინალსა და ნახევარფინალში გადაიტანეს. მეორე დღის პირველ დაპირისპირებაში “ოლ ბლექსს” ყველაზე მძიმე ჯახი ჰქონდა. თასისთვის ბრძოლას შემორჩენილმა ერთადერთმა ევროპულმა გუნდმა ინგლისმა, “შავებს” ლელო დასაწყისშივე გაუტანა, ტაიმის შუაში კი მეორედაც იხეირა და რადგან მეორე ჯერზე გარდასახვაც ზუსტი აღმოჩნდა, 12:0 დაწინაურდა. მე-6 წუთზე ზელანდიელებმა მეტოქეს ერთი ლელოთი უპასუხეს, მაგრამ შესვენების წინ ევროპელებმა თავიანთი მე-3 ლელო გაიტანეს, რეალიზაციაც ზუსტად შეასრულეს და ტაიმი 19:5 მოიგეს. მე-2 ტაიმში დუბაის სერიის გამარჯვებულმა აიწყვიტა, 3 უპასუხო ლელო გაიტანა, ერთი გარდასახვა ზუსტად შეასრულა და ჯამში 22:19 იმარჯვა.
ნახევარფინალში ზელანდიელები კენიამ გააწვალა, რომელმაც პირველ ნახევარში 2 ლელო გაიტანა, ორივე რეალიზაცია ზუსტად შეასრულა და რადგან 2 ლელოს შემდეგ ზელანდიელებმა მხოლოდ ერთი გარდასახვა გამოიყენეს, აფრიკელებმა ტაიმი 14:12 მოიგეს. “ოლ ბლექსმა” გამარჯვება კვლავ მე-2 ტაიმში მოიპოვა, როდესაც მე-3 წუთზე ლელო მიითვალა და 17:14 იმარჯვა.
მასპინძელი სამხრეთ აფრიკა, რომელიც 2008/2009 წლების სერიის გამარჯვებულია, 1/4-ფინალში მომავალ ფინალისტ ფიჯისთან დამარცხდა და სამოას ძლევის შემდეგ, დუბაის მსგავსად, ამჯერადაც, V-VI ადგილებისათვის ითამაშა, მაგრამ ინგლისელებთან 7:21 წააგო.
ამრიგად, 2009/2010 წლების ჯორჯის ეტაპზე, ახალმა ზელანდიამ 24 ქულა მოინაგრა და საერთო ჯამში, ქულათა მაქსიმუმით (48 ქულა) პირველ ადგილზეა, რითაც გასულ წელს დაკარგული პირველობის დასაბრუნებლად სერიოზული განაცხადი გააკეთა. მეორეადგილოსანმა ფიჯიმ 20 ქულა მიიღო და ჯამში 36 ქულით საერთო ჩათვლაშიც მეორეა. თასის ნახევარფინალისტებმა - არგენტინამ და კენიამ 16-16 ქულა ჩაიწერეს და ჯამში 22-22 ქულით, V-VI ადგილებს იყოფენ. ინგლისმა დუბაიში მიღებულ 16 ქულას ჯორჯში 12 შემატა და საერთო ჩათვლაში მე-3 ადგილი უჭირავს (28 ქულა), დუბაის ფინალისტი სამოა კი ამჯერად მხოლოდ ექვს ქულას დასჯერდა და 26- ქულით მე-4 პოზიციაზეა. მე-7 ავსტრალიაა, რომელსაც 18 ქულა დაუგროვდა (დუბაი - 12, ჯორჯი - 6). სერიის მეორე ეტაპის მასპინძელმა სამხრეთ აფრიკამ, დუბაის მსგავსად, 8 ქულა მიიღო და 16 ქულით მე-8 პოზიციაზეა, ორივე ეტაპზე მე-9 ადგილოსან უელსს კი 8 ქულით ჯამშიც მე-9 პოზიცია უკავია.
რაც შეეხება ინდივიდუალურ მაჩვენებლებს, ჯორჯში ფიჯელმა უილიამ რიდსერმა და ინგლისელმა კრისტიან ვაიდმა 7-7 ლელო გაიტანეს, კენიელი კოლინს ინჯერას ანგარიშზე კი 6 ლელოა. რიდერიმ 67 ქულით საუკეთესო მექულეებშიც იპირველა, ინგლისელმა ბენ გოლინსმა კი გუნდს 55 ქულა შესძინა. მიმდინარე მსოფლიო სერიას მექულეებში ასევე რიდერი ლიდერობს (107 ქულა), გოლინსი კი 101 ქულით მეორეა, ხოლო ორი ეტაპის ჯამში ყველაზე მეტი ლელო – 15, ახალზელანდიელმა შერვინ სტოუერსმა გაიტანა. 12 ლელოთი მე-2 ადგილზე კენიელი კოლინს ინჯერაა.

სინის 1/4-ფინალი. (IX-XVI ადგილები)
ზიმბაბვე - რუსეთი 17:22
შოტლანდია - აშშ 10:21
უელსი - ტუნისი 33:0
პორტუგალია - საფრანგეთი 28:17
თასის 1/4-ფინალი. (I-VIII ადგილები)
კენია - ავსტრალია 24:12
ინგლისი - ახალი ზელანდია 19:22
სამოა - არგენტინა 19:26
ფიჯი - სამხრეთ აფრიკა 21:17

ფიალის ნახევარფინალი (XIII-XVI ადგილები)
ზიმბაბვე - შოტლანდია 12:35
ტუნისი - საფრანგეთი 21:26
სინის ნახევარფინალი. (IX-XII ადგილები)
რუსეთი - აშშ 24:5
უელსი - პორტუგალია 24:7
ფარის ნახევარფინალი. (V-VIII ადგილები)
ავსტრალია - ინგლისი 5:24
სამოა - სამხრეთ აფრიკა 7:10
თასის ნახევარფინალი. (I-IV ადგილები)
კენია - ახალი ზელანდია 14:17
არგენტინა - ფიჯი 14:19
ფიალის ფინალი (XIII-XIV ადგილები)
შოტლანდია - საფრანგეთი 28:19
სინის ფინალი (IX-X ადგილები)
რუსეთი - უელსი 5:14
ფარის ფინალი (V-VI ადგილები)
ინგლისი - სამხრეთ აფრიკა 21:7
თასის ფინალი (I-II ადგილები)
ახალი ზელანდია - ფიჯი 21:12

ზურა ქსოვრელი