ინგლისის ეროვნული ნაკრების მთავარმა მწვრთნელმა, მარტინ ჯონსონმა ის მორაგბეები დაასახელა, რომელთა იმედიც 2010 წლის “ექვსი ერის” გათამაშებაში ექნება.
Planet Rugby-ის ცნობით, გუნდის შემადგენლობაში მოხვდა “ბათისა” და რაგბილიგაში ახალი ზელანდიის ეროვნული ნაკრების ყოფილი ნახევარმცველი შონტეინ ჰეიპი.
გაფართოებულ შემადგენლობაში არიან ბენ ფოდენი, კორტნი ლოუსი, დელონ ერმიტეიჯი, რიკი ფლუტი, ტობი ფლადი, ნიკ ისტერი და ლი მირსი, რომლებმაც შემოდგომის ტესტ-მატჩები ტრავმის გამო გამოტოვეს. ნოემბერში წარმატებული თამაშის შემდეგ, შემადგენლობაში კვლავ მოხვდნენ ჯეიმს ჰასკელი, ლუის მუდი და სტივ ტომპსონი. რაც შეეხებათ შეინ გერაგტის და დენი სიპრიანის, ისინი მეორე გუნდში ითამაშებენ.
ტრავმირებული ენდრიუ შერიდანისა და ჯულიან უაიტის “ექვს ერზე” თამაშის საკითხი, საბოლოოდ, 25 იანვარს გადაწყდება. უახლოეს პერიოდში მწვრთნელები ტომ რისის, მაიკ ტინდოლას და ჯო უორსლის მდგომარეობასაც დაკვირდებიან. ინგლისელები იანვრის ბოლოს პორტუგალიაში გაივლიან შეკრებას, ტურნირის პირველ მატჩს კი 6 თებერვალს უელსის წინააღმდეგ გამართავენ.
The Guardian-ის ინფორმაციით, ინგლისელთა ორი მატჩი - უელსისა და ირლანდიის ნაკრებების წინააღმდეგ, 3D ფორმატით კინოთეატრებში იქნება ნაჩვენები. ჩვენებების ორგანიზება ინგლისის ნაკრების ერთ-ერთი სპონსორის, O2-ის მეშვეობით მოხერხდა, ბილეთის ფასი კი 12,50 გირვანქა იქნება. 3D ფორმატში სარაგბო შეხვედრის ტრანსლაცია პირველად 2008 წელს BBC-მ მოაწყო და ამ მატჩში ინგლისის ნაკრები შოტლანდიას ეთამაშებოდა. ტელეკომპანია Sky  უახლოეს პერიოდში 3D ფორმატის სპეციალური ტელეარხის გახსნას აპირებს.  

ინგლისის ნაკრების შემადგენლობა 2010 წლის “ექვსი ერის” გათამაშებაში:
შერკინების ხაზი: სტეფან ერმიტეიჯი (“ლონდონ აირიში”), სტივ ბორტვიკი (“სარაცინი”), ჯორდან კრეინი (“ლესტერი”), ტომ კროფტი (“ლესტერი”), ლუის დიკონი (“ლესტერი”), ნიკ ისტერი (“ჰალიკვინსი”), დილან ჰარტლი (“ნორთჰემპტონი”), ჯეიმს ჰასკელი (“სტად ფრანსე”), კორტნი ლოუსი (“ნორთჰემპტონი”), ლი მირსი (“ბათი”), ლუის მუდი (“ლესტერი”), ტიმ პეინი (“ლონდონ უოსპსი”), საიმონ შოუ (“ლონდონ უოსპსი”), ენდრიუ შერიდანი (სეილი”), სტივ ტომპსონი (“ბრივი”), ჯულიან უაიტი (“ლესტერი”), დევიდ უილსტონი (“ბათი”).
უკანა ხაზი: დელონ ერმიტეიჯი (“ლონდონ აირიში”), მეტ ბანაჰანი (“ბათი”), დენი კეირი (“ჰალიკვინსი”), მარკ კუეტო (“სეილი”), ჰარი ელისი (“ლესტერი”), ტობი ფლადი (“ლესტერი”), ბენ ფოდენი (“ნორთჰემპტონი”), რიკი ფლუტი (“ბრივი”), შონტეინ ჰეიპი (“ბათი”), დენ ჰიპკისი (“ლესტერი”), პოლ ჰოჯსონი (“ლონდონ აირიში”), უგო მონიე (“ჰალიკვინსი”), მეტიუ ტეიტი (“სეილი”), ჯონ უილკინსონი (“ტულონი”).


ზურა ქსოვრელი