რუსეთის მორაგბეთა ეროვნულმა ნაკრებმა, "ერთა თასის" 2010 წლის გათამაშებისა და 2011 წლის მსოფლიოს ჩემპიონატის შესარჩევი ეტაპის მე-2 წრის პირველ შეხვედრაში, პორტუგალიის ნაკრებს 14:10 სძლია და სატურნირო ცხრილში მეტოქესთან უპირატესობა გაზარდა.
ექვს თებერვალს ცენტრალური შეხვედრა სწორედ სოჭში იმართებოდა და მთელი ყურადღება რუსეთისკენ იყო მიმართული. ამის დასტურად ის ფაქტიც გამოდგება, რომ IRB-ს თავკაცებმა რუსებს პატივი დადეს და მსოფლიო თასი, ანუ "ვებ ელისის თასი" სოჭში მიაბრძანეს. ევროპის ზონაში ახალი ზელანდიის საგზურისთვის 4 გუნდი იბრძვის - საქართველოს, რუსეთი, პორტუგალია და რუმინეთი. აქედან ორი, რომლებიც "ერთა თასის" 2 წლის ჯამით, სატურნირო ცხრილში პირველ-მეორე ადგილს დაიკავებენ, მსოფლიო თასზე ავტომატურად მოხვდებიან, მესამეადგილოსანი რეპეშაჟში გადაერთვება და ბოლო საგზურისთვის შორი გზიდან იბრძოლებს, მეოთხე გუნდი კი ოფსაიდში დარჩება.
პირველ წრეში, რუსეთმა პორტუგალია ლისაბონში 18:14 დაამარცხა და შესაბამისად, ამ თამაშსაც დიდი იმედით შეხვდა, რადგანაც, ქართველთა მსგავსად, ხუთიდან 3 თამაშის მოგების შემთხვევაში, ზელანდიაში გამგზავრება გარანტირებული ექნებოდა (გერმანიისა და ესპანეთის სუსტი ნაკრებები სათვალავში ჩასაგდები არაა).
პირველმა საწყისმა წუთებმა თანაბარ ბრძოლაში განვლო, მერე კი მასპინძლებმა იძალეს და 23-ე წუთზე იანუშკინმა ალამთან ლელო გაიტანა, მაგრამ იური კუშნარიოვს გარდასახვა გაუცუდდა და რუსეთი 5:0 დაწინაურდა. სამ წუთში სტუმრებმა ჯარიმიდან იხეირეს, თავი გარდნერმა გამოიჩინა და ჩამორჩენა ორ ქულამდე დაიყვანა.
შესვენებამდე 5 წუთით ადრე, კუშნარიოვის ჯარიმა ზუსტი გამოდგა და საკუთარი გუნდი კვლავ ლელოს ოდენობით დააწინაურა, ზედ ტაიმის ბოლოს კი იგივეს გაკეთება გარდნერმა ვერ შეძლო და პირველი ნახევარი რუსეთმა 8:3 მოიგო.
რუსებმა გამარჯვების სუნი იკრეს და დაძაბული მე-2 ტაიმის მე-8 წუთზე კუშნარიოვმა ჯარიმით უპირატესობა კიდევ უფრო გაზარდა. ანგარიშის შეცვლის შესაძლებლობა მასპინძლებს 65-ე წუთზე მიეცათ, მაგრამ კუშნარიოვმა ააცილა, თუმც კი ხუთ წუთში მისი ჯარიმა ზუსტი გამოდგა - 14:3. პორტუგალიელებმა გაიბრძოლეს, მათთვის მარცხი სიტუაციის გართულების ტოლფასი იყო და 72-ე წუთზე გარდნერმა საპასუხო ლელო გაიტანა, რეალიზაციაც ზუსტად შეასრულა თანაგუნდელებს მატჩის გადარჩენის იმედი გაუჩინა - 10:14. მაგრამ რუსეთმა გაძლო, სტუმრებს ქულის აღების საშუალება აღარ მისცა და ზელანდიას მაქსიმუმადე მიუახლოვდა, რადგანაც ძნელი დასაჯერებელია, რომ მათ გერმანიისა და ესპანეთის ნაკრებების დამარცხება ვერ შეძლონ, რის შემდეგაც პირველ-მეორე საფეხურზე უცილობლად აღმოჩნდებიან.
კიდევ ერთი თამაში რუმინეთის დედაქალაქ ბუქარესტში უნდა გამართულიყო და "ვლახებს" ესპანელებისთვის ემასპინძლათ, მაგრამ ყინვის გამო, ირლანდიელმა არბიტრმა მოთამაშეებს მოედანზე გასვლის უფლება არ მისცა. ეს პირველი შემთხვევა არაა, მსგავსი პრობლემის გამო ბუქარესტში თამაში რომ იშლება. რუმინელებმა რეფერის, სათადარიგო ვარიანტად, ხელოვნურ მოედანზე თამაში შესთავაზეს, მაგრამ უარი მიიღეს. ახლა FIRA გადაწყვეტს, თუ როდის ჩატარდება ეს შეხვედრა. სავარაუდო თარიღად 27 მარტი სახელდება, თუმცა, იმ პერიოდისთვის ყველა თამაში უკვე მოლეული იქნება და შესაძლოა, ამ თამაშმა მხოლოდ საბოლოო ოქმზეღა იმოქმედოს და პრაქტიკული თვალსაზრისით, აღარაფერი შეცვალოს.
რუსეთი. სოჭი
რუსეთი - პორტუგალია 14:10 (8:3)
რუსეთი: მაღლაკელიძე (ხროკინი 70), კორშუნოვი (მატვეევი 70), პრონენკო (ტრავკინი 67), ვოიტოვი, კულემინი, გრესევი, ოსტრიკოვი, ტემნოვი, იანუშკინი (შაკიროვი 55), ი. კუშნარიოვი, გვოზდოვსკი, ტრიშინი, ბაბაევი, არტიომოვი, კლუჩნიკოვი.
პორტუგალია: ფერნანდეში (ჟუნიორი), კორეია, მური, სტიკლინგი, პენალვა (გ. უვა), ჟირაუ (პალა), ვ. უვა, სევერინუ, ჟ. პინტუ (ლეალი), კ. პინტუ (კაბრალი), აგილარი (ფორო), მატეუში, სილვა, ოლივეირა, გარდნერი.
2011 წლის მსოფლიო თასის შესარჩევი ეტაპის სატურნირო მდგომარეობა
| 1. საქართველო | 6 | 5 | 1 | 0 | +164 | 17 |
| 2. რუსეთი | 6 | 5 | 0 | 1 | +89 | 16 |
| 3. პორტუგალია | 6 | 3 | 1 | 2 | +36 | 13 |
| 4. რუმინეთი | 5 | 2 | 0 | 3 | +16 | 9 |
| 5. ესპანეთი | 5 | 1 | 0 | 4 | -74 | 7 |
| 6. გერმანია | 6 | 0 | 0 | 6 | -231 | 6 |
შენიშვნა: გამარჯვებაზე იწერება 3 ქულა, ფრეზე 2, წაგებაზე 1
ზურა ქსოვრელი
კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია